Efesu'en 4 - Fulfulde DC Bible

Ɓanndu wooru

¹ Mi ɗon wasa on, min, kaɓɓaaɗo ngam daliila Jawmiraawo: Ngeeɗe fodde ko fottanta ewnaandu ndu Allah ewnori on.

² Laate tum yaŋkiniiɓe e ɗelma-gikku'en e munyɓe, munyindire bee yiide.

³ Tiine aynugo ngootaaku Ruuhu nder joonde salaaman hawtunde on:

⁴ Woodi ɓanndu wooru e Ruuhu gooto non boo tammunde woore daliila ewnaandu ndu Allah ewnori on,

⁵ woodi Jawmiraawo gooto e nuɗɗinki gooti e baptisma ngoota.

⁶ Woodi Allah gooto tan, kaŋko woni Baabiraawo yimɓe fuu, o ɗon laamano ɓe fuu, o ɗon huuwra bee maɓɓe fuu, o ɗon nder maɓɓe fuu boo.

⁷ Koo moy meeɗen heɓi mo'ere deydey geɗal ngal Almasiihu hokki mo.

⁸ Ngam man, Deftere wi'i: “O eeŋgi haa nokkuure townde, o yahri naŋngaaɓe. O hokki yimɓe dokke.”

⁹ “O eeŋgi”: Ɗume ɗum yiɗi wi'go? Naa ɗum yiɗi wi'go o aarti o jippi haa nokkuuje lesdi ɓurɗe leesugo na?

¹⁰ Jippiiɗo oo, kaŋko woni eeŋguɗo haa dow asamanji fuu ngam haa o hebbina tagefooji fuu.

¹¹ Kaŋko woni dokkuɗo dokke: O waɗi woɗɓe nelaaɓe, woɗɓe annabi'en, woɗɓe waazooɓe, woɗɓe boo waynaaɓe e ekkitinooɓe

¹² ngam haa ɓe taaskitina senaaɓe ngam kuuɗe muuɗum'en, ngam mawningo ɓanndu Almasiihu boo,

¹³ haa to en fuu en kawriti bee nuɗɗinki gooti e anndal Ɓiɗɗo Allah gootal, en mawni bana goɗɗo mawɗo, en njotto darnde Almasiihu timmunde,

¹⁴ en meetataa laataago ɓikkoy koy ƴuuge ndimmbinta, tokkotookoy ekkitinolji pewooji e rikici yimɓe, dabareeji maɓɓe estataa en.

¹⁵ Ammaa bee wolwindirgo gooŋga bee yiide, sey en mawna gal bakeeje fuu heedi Almasiihu, laatiiɗo hoore ɓanndu.

¹⁶ Ngam daliila maako terɗe ɓanndu fuu ɗon pottotira, ɓanndu ɗon hawti bee jokke mum koo ɗeye, ɗe ɗon njogi ndu, kala tergal fuu ɗon huuwa kuugal mum, ɓanndu ɗon ɓesdo, ɗon mawna bee yiide.

Ngeendam kesam nder kawtal bee Almasiihu

¹⁷ Ndaa ko mbi'anmi, mi ɗon tiɗɗina on bee innde Jawmiraawo: Taa tokke yeeɗugo bana heefeerɓe ngeeɗirta. Kamɓe, numooji maɓɓe ɗon majjina ɓe.

¹⁸ Hakkiilooji maɓɓe nyiɓɓi, ko'e maɓɓe caati daliila sooynde anndal maɓɓe. Ngam maajum ɓe cenndi bee ngeendam ɗam Allah hokkata.

¹⁹ Ɓe cemtataa, ɓe njoofi ko'e maɓɓe haa daakaareeku ngam huuwugo kuuɗe coɓɗe koo ɗeye bee suunooji maɓɓe fuu.

²⁰ Onon kam naa kuuɗe ɗe'e on ekkiti haa Almasiihu.

²¹ Ɗum Yeesu nanɗon e ɗum ekkitinol maako njaɓɗon, ngam gooŋga ɗon haa maako:

²² O ekkitini on ngam haa on ceeda bee neɗɗo mon ɓooymaajo e bee gikku mum ɓooymaawu, mo suunooji mum ɗonno majjina, kalka ɗum,

²³ non boo on acca Ruuhu Allah hesɗitina hakkiilooji mon,

²⁴ on ɓorno neɗɗo keso mo Allah tagi nder adilaaku e senaare gooŋga muuɗum.

²⁵ Nden kam acce fewugo, mbolwindire gooŋga, ngam en fuu en terɗe haa ɓanndu wooru.

²⁶ To on tikki, taa mbaɗe hakke. Taa on nyalla bee tikkere,

²⁷ taa on ndokka Iblisa laawol naŋngugo on.

²⁸ Laatinooɗo gujjo, taa meeta wujjugo. Sey o huuwa kuugal laaɓŋgal bee juuɗe maako, haa o wuura, o walla laafuɓe boo.

²⁹ Taa mbolwe bolle naawɗe, sey nafooje, mawninooje, kaanduɗe, haa on mo'ana nananɓe on.

³⁰ Taa mettine Ruuhu Ceniiɗo, ngam bee maako Allah waɗani on lammba maral muuɗum, haa o sootto on nder nyalaade coottuki.

³¹ Cottine mettamɓeram e ɓernuki e tikkere e haa'inaare e tufle fuu diga nder ɓerɗe mon. Itte nganyaandi fuu boo caka mooɗon.

³² Mboonindire, enɗootire, njaafotire bana Allah yaaforani on nder Almasiihu.