Balndi 29 - Fulfulde DC Bible

¹ Caatinanɗo hoore mum nde woɗɓe ɗon pela ɗum, o geweteeɗo bee juhuki, walaa hurgaago.

² To adili'en ɗuuɗi, ummaatoore seyoto, ammaa to kalluɗo laamake, ummaatoore uuman.

³ Giɗɗo hikma ɗon seyna baaba mum, ammaa ɗakkotooɗo rewɓe daakaare'en halkan jawdi mum.

⁴ Laamiiɗo kiitortooɗo gooŋga tabitinan lesdi, ammaa ɗuɗɗinanɗo jomorli wilan ndi.

⁵ Estanɗo keeddiɗɗum bee welnugo hunnduko tuufnanto kosɗe mum tuuforgol.

⁶ Kalluɗo nastan tuuforgol hakke mum, ammaa adiliijo ɗon heewi seyo.

⁷ Adiliijo ɗon suklano haala laafuɓe, ammaa kalluɗo faamataa haala maajum.

⁸ Jancooɓe pitinan berniwol, ammaa hikma'en peewtinan tikkere.

⁹ To hikmaajo waabotiri bee paataaɗo, koo o tikki, koo o jali, de'ere woodaa.

¹⁰ Mbarooɓe ko'e ɗon nganya laaɓɗo, ammaa gooŋga'en kakkilanan yoŋki maako.

¹¹ Paataaɗo yeeynan metteeŋga mum fuu, ammaa hikmaajo naŋgtan nga.

¹² To ardiiɗo ɗon nanana fewooɓe, sukaaɓe maako fuu laatoto halluɓe.

¹³ Woodi ko hawtata talakaajo e ɓilloowo ɗum: Jawmiraawo hokki ɓe gite ɓe ɗiɗo fuu.

¹⁴ Laamiiɗo kiitortooɗo laafuɓe bee gooŋga, leeso laamu maako tabitan haa foroy.

¹⁵ Ɓoccol e feloore mbaɗan hikma, ammaa derkeejo jooftaaɗo semtinan daada mum.

¹⁶ To halluɓe ɗuuɗi, hakkeeji boo ɗuuɗan, ammaa adili'en ngi'an do'ere halluɓe.

¹⁷ To a elti ɓiya, o siwtinte, o hebbinan ɓernde ma welwelo.

¹⁸ To annabaaku woodaa, yimɓe mbonnoto. Ammaa to ɓe ɗowtanake tawreeta, barka laatanto ɓe.

¹⁹ Maccuɗo eltataake bee bolle, o faaman ɗe ammaa o ɗowtataako.

²⁰ To a yi'i goɗɗo jaawananɗo wolwugo, tammanaago mo ɗuuɗaay, ndikka paataaɗo.

²¹ Ɗelmananɗo maccuɗo mum diga o ɓiŋngel, laatinan mo tuurtoowo.

²² Tikkoowo umminan jokkirgol, yaawa-ɓerndeejo ɗuɗɗinan hakkeeji mum.

²³ Mawnitaare neɗɗo leesnan mo, ammaa yaŋkina-ɓerndeejo heɓan tedduŋgal.

²⁴ Cenndanɗo keɓal bee gujjo ɗon wanya yoŋki mum, ngam o nani naaloore dow wuyɓe, ammaa o feftaay gujjo man.

²⁵ Hulugo yimɓe woni tuuforgol, ammaa koolotooɗo Jawmiraawo jooɗoto jam.

²⁶ Ɗuuɗɓe ɗaɓɓitan yerduye mawɗo, ammaa kiita ngooŋɗuka iwan haa Jawmiraawo tan.

²⁷ Baɗoowo zunuuba woni nyidduɗo haa adili'en, gooŋgaajo woni nyidduɗo haa halluɓe.