Balndi 22 - Fulfulde DC Bible

¹ Innde woonde ɓuri jawdi ɗuuɗndi, heɓugo yerduye ɓuri cardi e kaŋŋeeri saman.

² Diskuɗo e laafuɗo poti kal, ngam Jawmiraawo waɗi ɓe ɗiɗo fuu.

³ Kakkilɗo to yi'i sarru, o nyukkoto, ammaa sooya-anndal'en tokkitinan laawol, ɓe naawnoto.

⁴ Mbarjaari yaŋkinaare e kulol Jawmiraawo, ɗum risku, tedduŋgal e ngeendam.

⁵ Gi'e e tuuforli ɗon haa laawol faasikiijo, aynanɗo yoŋki mum daayoto e maajum.

⁶ Woownu derkeejo laawol ngol haani o tokko, nden kam o selataa ngol, koo to o naywi.

⁷ Laafuɗo ɗon haa juŋngo diskuɗo, jaɓɗo nyamaande laatoto maccuɗo dokkuɗo mo nde.

⁸ Aawanɗo halleende sodan sarru, sawru tikkere maako yewan.

⁹ Barka laatanto koo moy enɗi talakaajo, nyaamni mo.

¹⁰ Riiw jancoowo, nden kam jokkirgol dillan, haɓre e mbustu boo njinnan.

¹¹ Giɗɗo ɓernde laaɓnde, bolwanɗo bee maslahaaku, laamiiɗo laatoto soobaajo maako.

¹² Gite Jawmiraawo ɗon ayna anndal kakkilɗo, ammaa o do'an bolle faasikiijo.

¹³ Mbaateendamjo wi'an: “Mbarooga ɗon yaasi, nga mbaratam, to mi wurtake haa laawol.”

¹⁴ Hunnduko debbo jananno woni ngaska lugguka, mo Jawmiraawo tikkani ɗum, yanan nder maaka.

¹⁵ Faataare ɗon haa ɓernde derkeejo, ɓoccol elto riiwan nde haa ton.

¹⁶ Ɓillanɗo laafuɗo mawninan mo, ammaa hokkugo diskuɗo laafinan.

Bolle hikma cappanɗe tati ( 22:17—22:24 )

¹⁷ Heɗitam haa mi yecce ko anndinooɓe marɓe hikma mbi'i. Jaɓ anndal maɓɓe haa ɓernde ma.

¹⁸ Ɗum booɗɗum to a dursi bolle maɓɓe, haa keɓa lornugo ɗe foroy.

¹⁹ Mi anndinte ɗe hannde, ngam mi yiɗi a hoolo Jawmiraawo.

²⁰ Mi winndani ma bolle hikma'en cappanɗe tati, ɗe fuu ɗe anndal tabitŋgal e sawariiji booɗɗi.

²¹ Ɗe anndinte ko haani anndugo fuu, haa keɓa wartirango nelɓe ma bolle gooŋga.

1

²² Taa jaɓtu laafuɗo ngam o laafuɗo, taa fewnu gooŋga leesɗo yeeso kiita,

²³ ngam Jawmiraawo jiŋngan ɓe, o ittanan jaɓtuɓe ɓe ngeendam.

2

²⁴ Taa soobru bee yaawa-tikkereejo, taa yahdu bee goɗɗo mo waawataa naŋgtugo hoore mum,

²⁵ ngam taa a woowa laabi maako, a waɗana yoŋki ma tuuforgol.

3

²⁶ Taa fiy dammaana ngam goɗɗo, taa nastu haala nyamaande maako.

²⁷ Ngam to a woodaa ko a yoɓra, ɓe koocan koo be'itte maaɗa.

4

²⁸ Taa sottin keerol maral ma ɓooymawol ngol kaakiraaɓe ma mbaɗi.

5

²⁹ To a yi'i goɗɗo goniijo nder kuugal mum, anndu o huuwanan laamiiɓe, o huuwantaa leesɓe.