Balndi 16 - Fulfulde DC Bible

Jawmiraawo ɗon waɗa koo ɗume fuu bee daliila

¹ Neɗɗo waɗan anniya, ammaa Jawmiraawo tan laatinan ɗum.

² Laabi neɗɗo fuu laaɓɗi haa gite muuɗum, ammaa Jawmiraawo ɗon linya anniyaaji.

³ Halfin Jawmiraawo kuuɗe ma, nden kam nufayeeje ma laatoto.

⁴ Jawmiraawo ɗon waɗa koo ɗume fuu dow daliila, o waɗi kalluɗo boo ngam nyalaade sarru.

⁵ Jawmiraawo ɗon wanya koo moy mawnitiiɗo, fakat, o hisataa kiita.

⁶ Mbooɗeeŋga e gooŋgaaku cuddan aybe goɗɗo, bee kulol Jawmiraawo goɗɗo daayoto halleende.

⁷ To laabi goɗɗo pottani Jawmiraawo, o sulhindiran mo koo bee konne'en maako.

⁸ Pamarum bee adilaaku ɓuri risku maŋngu bee sooynde adilaaku.

⁹ Ɓernde neɗɗo ɗon nufo laawol mum, ammaa Jawmiraawo ɗon yahra palanɗe maako.

Ko laarani laamiiɓe

¹⁰ Koŋngol Allah ɗon haa hunnduko laamiiɗo, hunnduko maako woofataa nder kiita.

¹¹ Jawmiraawo ɗon ɗaɓɓa etirɗum e awnorɗum pottuɗum, ngam haa coggu fuu laato dow gooŋga.

¹² Waɗugo halleende ɗum nyidduɗum haa laamiiɓe, ngam leeso laamu ɗon tabita bee adilaaku.

¹³ Laamiiɗo yiɗi nanugo gooŋga, bolwanɗo ka fottanan mo.

¹⁴ Tikkere laamiiɗo neldan maayde, ammaa hikmaajo feewtinan nde.

¹⁵ To yeeso laamiiɗo laaɓi, ɗum ngeendam, yerduye maako nanndi bee duule iyeende arannde.

Joonde nder kulol Allah caka yimɓe

¹⁶ Heɓugo hakkiilo e hikma ɓuri marugo cardi e kaŋŋeeri piw.

¹⁷ Laawol gooŋga'en selan halleende, kakkilananɗo laawol mum aynan yoŋki mum.

¹⁸ Juro aartan yibbere, mawnitaare aartan do'ere.

¹⁹ Yaŋkinaago caka leesɓe ɓuri senndugo keɓal bee mawnitiiɓe.

²⁰ Kakkilananɗo wolde Allah heɓan hayru, barka laatanto koolotooɗo Jawmiraawo.

²¹ Mo ɓernde mum mari hikma, o ewneteeɗo kakkilɗo, bolle belɗe cemmbiɗinan anndinol.

²² Hakkiilo woni seeɓoore ngeendam haa marɗo ngo, ammaa ko eltata faataaɓe, ɗum faataare maɓɓe.

²³ Hikmaajo numan hiddeko o wolwa, kanjum gooŋɗinta bolle maako.

²⁴ Bolle ɗelemɗe nanndi bee njumri, ɗe mbelani yoŋki, ɗe kurgan ɓanndu.

²⁵ Goɗɗo ɗon laara laawol mum bana ngol darnuŋgol, Asee boo ngol ɗon yahra mo haa maayde.

²⁶ Weelo kuuwoowo tiɗɗinan mo, ngam hunnduko maako huuwnan mo.

²⁷ Meereejo ɗon taaskitina sarru, koo bolle maako boo ngulan bana yiite.

²⁸ Faasikiijo umminan jokkirgol, baɗoowo tufle senndan sooba'en.

²⁹ Toonyoowo estan keeddiɗɗum, yahran mo dow laawol kalluŋgol.

³⁰ Mumnanɗo gite mum e ŋatanɗo hunnduko mum ngam nufo halleende, waɗi nde timmi.

³¹ Dandanndi ngoni meetaleewol booɗŋgol masin, goɗɗo heɓran ngol bee waɗugo adilaaku.

³² Neeɓa-tikkereejo ɓuri cemmbiɗɗo, naŋgtanɗo hoore mum ɓuri nyaamɗo berniwol.

³³ Neɗɗo waɗan kur'u, ammaa muuyo Jawmiraawo waŋginta ɗum.