Balndi 12 - Fulfulde DC Bible

¹ Giɗɗo anndal yiɗi elto, ganyɗo feloore sooyi faamu.

² Jawmiraawo yerdoto booɗɗo, ammaa o hiitoto baɗoowo rikici.

³ Neɗɗo tabitittaa bee halleende, ammaa adiliijo dimmbataako sam.

⁴ Debbo tiiniiɗo woni daraja gorko mum, ammaa debbo cemtiniiɗo nanndi bee gilɗi nyaamooji i'e.

⁵ Numooji adili'en ɗon ndari dow gooŋga, dabareeji halluɓe ɗon ndari dow rikici.

⁶ Bolle halluɓe ɗaɓɓan mbarugo yimɓe, ammaa bolle adili'en ɗaɓɓan hisnugo ɓe.

⁷ Halluɓe ndo'oto, ɓe ngonataa fahin, ammaa danygol adili'en tabitan.

⁸ Goɗɗo heɓan manoore fodde hakkiilo mum, ammaa sela-ɓerndeejo, yawnaare heɓan mo.

⁹ Jawaaɗo marɗo suka gooto ɓuri teddinanɗo hoore mum mo walaa nyaamdu.

¹⁰ Adiliijo anndi haaje dabbaaji mum, ammaa enɗam woodaa haa ɓernde kalluɗo.

¹¹ Demanɗo gese mum haaran nyaamdu, ammaa cuklaniiɗo kuuje meereeje walaa hakkiilo.

¹² Suuno kalluɗo ɗum taasnugo kuuje kalluɗe, ammaa tiinaare adili'en waɗan nafuuda.

¹³ Kalluɗo nastan tuuforgol ngol pewe hunnduko mum, ammaa adiliijo daɗan ɓillaare.

¹⁴ Goɗɗo haaran booɗɗum bee nafuuda bolle mum, kuugal juuɗe maako wartanan mo.

¹⁵ Laawol paataaɗo fottanan ɗum, ammaa hikmaajo jaɓan sawari.

¹⁶ Paataaɗo waŋginan metteeŋga mum law, kakkilɗo nanan kuudi, jeeɗoto.

¹⁷ Bolwanɗo gooŋga anndinan ko fotti, ammaa ceedoowo fewre waɗan rikici.

¹⁸ Mo numaay bolle mum, yuwan bana labbo, ammaa ɗemŋgal hikmaajo hurgan.

¹⁹ Gooŋga ɗon tabiti haa foroy, ammaa fewre timman tippungel.

²⁰ Fewjere woni haa ɓerɗe nufotooɓe kalluɗum, ammaa seyo laatanto nufotooɓe jam.

²¹ Walaa sarru heɓata adiliijo, ammaa bone halluɓe ɗuuɗan.

²² Jawmiraawo ɗon wanya wolwooɓe fewre, ammaa waɗooɓe ko fotti pottanan mo.

²³ Kakkilɗo suuɗan anndal mum, ammaa ɓerɗe faataaɓe ngeynan faataare.

²⁴ Tiiniiɗo heɓan laamu, mbaateendamjo macciɗan.

²⁵ Mettamɓeram teddanan neɗɗo, ammaa wolde woonde seynan mo.

²⁶ Adiliijo ɗowan tokkiiɗo ɗum, ammaa laawol halluɓe majjinan ɓe.

²⁷ Mbaateendamjo juɗataa kusel ladde, ammaa tiiniiɗo heɓan maral booɗŋgal.

²⁸ Adilaaku yahran haa ngeendam, ammaa halleende yahran haa maayde.