Balndi 11 - Fulfulde DC Bible

¹ Jawmiraawo ɗon wanya awnorɗum rikiciijum, ammaa poondol gooŋɗuŋgol fottanan mo.

² To mawnitaare wari, mbustu waran boo, ammaa yaŋkiniiɓe ngondan bee hikma.

³ Timmeendam gooŋɗuɓe ɗowan ɓe, ammaa lelaaki ɓerɗe zammbooɓe halkan ɓe.

⁴ Jawdi nafataa nyalaade tikkere Allah, ammaa adilaaku hisnan diga maayde.

⁵ Adilaaku laaɓɗo darnan laawol muuɗum, ammaa kalluɗo do'oto daliila halleende mum.

⁶ Adilaaku gooŋga'en hisnan ɓe, ammaa zammbooɓe naŋngeteeɓe nder suuno muuɗum'en.

⁷ Saa'i kalluɗo maayata, tammunde maako halkan, yela waɗooɓe sarru laatoto meere.

⁸ Adiliijo hisan ɓillaare, kalluɗo nastan nde mbattudi maako.

⁹ Gejjititɗo Allah halkan keeddiɗɗum bee hunnduko mum, ammaa adili'en kisran bee anndal muuɗum'en.

¹⁰ Berniwol seyorto jam adili'en, ngol yiman bee seyo, to halluɓe kalki.

¹¹ Barka gooŋɗuɓe nyiɓan berniwol, kunnduɗe halluɓe ngibbinan ngol.

¹² Koo moy yawi keeddiɗɗum, o paataaɗo, neɗɗo kakkilɗo jeeɗoto.

¹³ Baɗoowo tufle waŋginan sirri, ammaa gooŋgaajo suddan haala.

¹⁴ To baawal ɗowugo yimɓe woodaa, ummaatoore wonnoto, kisndam ɗon wondi bee ɗuuɗal dawrooɓe.

¹⁵ Mo fiyi dammaana ngam jananno, yaran bone. Mo wanyi nastugo haala coggu, hisan.

¹⁶ Debbo ŋarniiɗo heɓan tedduŋgal, gorko tiiniiɗo boo heɓan risku.

¹⁷ Enɗoowo woonanan hoore mum, ammaa cooyɗo enɗam torran ɓanndu mum.

¹⁸ Kalluɗo heɓan riba ka tabitittaa, ammaa baɗanɗo ko fotti heɓan mbarjaari tabitndi.

¹⁹ Adilaaku yahran haa ngeendam, taasnugo halleende yahran haa maayde.

²⁰ Jawmiraawo ɗon wanya sela-ɓerɗe'en, ammaa laaɓa-laawol'en pottanan mo.

²¹ Fakat, kalluɗo daɗataa kiita, ammaa adili'en kisan.

²² Bana halagaare kaŋŋeeri haa kine gaduuru, non debbo ŋarniiɗo to o walaa semteende.

²³ Yela adiliijo, ɗum mbooɗeeŋga tan, ammaa ko tammi heɓugo kalluɗo, ɗum tikkere.

²⁴ Oo ɗon hokka bee caahaaki, o ɓurtan heɓugo. Oya mooɓtan ko ɓuri haaje, o ɓurtan sooyugo.

²⁵ Boonanoowo woɗɓe, ɓe kaarnan ɗum, jarnoowo boo, ɓe njarnan ɗum.

²⁶ Cigotooɗo alkamaari, yimɓe naalan ɗum, ammaa ɓe mbarkiɗinan coorranɗo ndi.

²⁷ Ɗaɓɓitanɗo booɗɗum ɗaɓɓitan yerduye Allah, ammaa ɗaɓɓanɗo kalluɗum, ɗum heɓan mo.

²⁸ Koolotooɗo jawdi mum halkan, ammaa adili'en puɗan bana haako hecco.

²⁹ Pitinanɗo saare mum ronan henndu, paataaɗo laatoto maccuɗo hikmaajo.

³⁰ Adilaaku fuɗnan lekki ngeendam, ammaa yimɓe kooloto hikmaajo.

³¹ Adiliijo ma heɓan mbarjaari mum haa lesdi, sakko kalluɗo e marɗo hakke.