Ayuba 33 - Fulfulde DC Bible

Elihu feli Ayuba

¹ Jonta, Ayuba, heɗita haala am, sey a fiɗɗita noppi, a hakkilana bolle am booɗɗum!

² Ndaa, woodi ko mi yiɗi wolwugo, mi taaskake wolwugo.

³ Bee ɓernde laaɓnde mi wolwirta, gooŋga laaɓka mi faamtinte.

⁴ Bee Ruuhu Allah tagraami, poofɗe Baawɗo ɗon ngeeɗina yam.

⁵ Jaabam to a waawi, sey a taasko, a dartano yam.

⁶ Yeeso Allah en poti kal en ɗiɗo fuu, mi tagraaɗo bee loope bana maaɗa.

⁷ Mi laataaki kulniiɗo haa maaɗa sam, baawɗe am teddantaa ma sam.

⁸ Ndaa, bee noppi am nanmi ko mbolwuɗa, ko mi nani bee laaɓɗum, ɗum bolle ma:

⁹ “Min mi laaɓɗo, mi walaa ɓeetaare sam, walaa aybe boo, walaa zunuuba sam.

¹⁰ Allah tefantam hujja ngam felugo yam, o ɗon laara yam bana mi konneejo maako.

¹¹ Callalluuji o haɓɓirta kosɗe am, o ɗon wiɗito laabi am fuu.”

¹² Nanam, Ayuba, kanjum a woofi ton, Allah ɓuri ɓii-Aadama mawnugo.

¹³ Koni puɗɗuɗa ngaaba bee maako ngam o jeeɗi dow koŋnguɗi maaɗa fuu na?

¹⁴ Allah wolwanan neɗɗo bee laabi feere feere, walaa mo hakkilanta ɗum.

¹⁵ Haa nder koyɗol, nder gi'ki kaayeefi boo, saa'i ɗoyŋgol ɗon teddana yimɓe fuu, nde ɓe ɗon dow be'itte, ɗon ɗaani boo,

¹⁶ bana nii Allah wolwanta yimɓe, haa o reentina ɓe,

¹⁷ haa o lortina neɗɗo diga hakke mum, haa o ittana goɗɗo cemmbiɗɗo ƴaggaare mum,

¹⁸ haa o hisna mo nastugo ngaska boo, ngam taa maayde e halkere heɓa mo.

¹⁹ Allah ɗon elta neɗɗo bee neldugo nyawu dow maako, ɓanndu maako wulan, tokkoto diwnugo.

²⁰ O yerdataako koo nyaamdu, koo ɓurndu welugo boo welantaa mo.

²¹ O foo'i jamum, sey i'e lutti.

²² Yoŋki maako ɗon ɓadi yenaande, o ɗon dilla haa jooɗorde maayɓe ton.

²³ Teema malaa'ikaajo ballanɗo mo, waato gooto nder ujineere haa asama, anndinooɓe yimɓe ko fottata,

²⁴ to o enɗi mo, nden kam o seedoto: “Taa o nasta yenaande, a hisna mo, ndaa mi heɓi coottaari ngam neɗɗo oo.”

²⁵ Nden fakat ɓanndu maako fuu hesɗita, bana ɓanndu sukaajo ndu semmbiɗa.

²⁶ To o torake Allah, o jaɓan mo, haa o teddina Allah bee welwelo. Allah hokkitan neɗɗo adilaaku mum,

²⁷ yeeso yimɓe o yiman, o yecca ɗum: “Hakke mbaɗmi, mi sottini gooŋɗuki, ammaa Allah warjaaki aybeeji ɗi'i.

²⁸ Diga maayde o hisni yam, mi ɗon yi'a jayŋgol fahin!”

²⁹ Ndaa fakat, Allah huuwanan neɗɗo fuu kuuje ɗe'e nde ɗiɗi, nde tati boo,

³⁰ haa o hisna mo diga maayde, haa jayŋgol ngeendam boo yaynana neɗɗo oo.

³¹ Hakkil booɗɗum, an Ayuba, nanam! Sey a jeeɗo siriw haa mi wolwane!

³² To a yiɗi waabaago kam, waaba! Sey a wolwa! Mi yiɗi adilingo ma.

³³ To a walaa ko mbolwa, a tokko nanugo yam, sey a jeeɗo, mi ekkitinte hikma.