Ayuba 3 - Fulfulde DC Bible

Ayuba naali nyalaade danyeeki muuɗum

¹ Ɓaawo maajum Ayuba maɓɓiti hunnduko muuɗum, naali nyalaade danyeeki muuɗum.

Ayuba

² Ndaa ko o wi'i:

³ Nyalaade nde ndanyaami halka, non boo jemmaare nde wi'i: “Gorgel reedaama.”

⁴ Nyalaade man laato nyiɓre! Taa Allah Ɓaŋiiɗo siftora nde fahin! Taa jayŋgol yayna dow maare sam!

⁵ Nyiɓre nyiɓɓunde mara nde. Sey duule caŋngina dow maare, mojaaki naaŋge hulna nde.

⁶ Sey nyiɓre jaɓta jemmaare maajum, taa nde lime caka nyalɗe nduuɓu, taa nde nasta lisaafi lebbi fahin.

⁷ Taa jemmaare maajum waɗa barka, taata nde nana hoolo seyo sam.

⁸ Naalooɓe nyalɗe naala jemmaare maajum, non boo hiila'en tikkinooɓe kuuŋga.

⁹ Sey koode baɓɓol maare nyiɓɓa. Nde tammoro jayŋgol, ammaa ngol waŋgataa, taa nde yi'a beɗgol naaŋge.

¹⁰ Ngam nde maɓɓanaay yam reedu daada, haa gite am nde suuɗaay torra.

¹¹ Koni mi maayaay diga mi danyaaka, mi sooytaay nde mi wurti reedu daada am?

¹² Koni o jaɓi yam dow koppi? Koni mi musini haa enɗi maako boo?

¹³ Hannde mi wonanno nder de'ere nder yenaande am, mi ɗaanotono, mi siwtotono

¹⁴ bee laamiiɓe e sarwooɓe lesdi, mahitananɓe ko'e muuɗum'en bille,

¹⁵ maaboo bee mawɓe marɓe kaŋŋeeri e hebbinɓe cuuɗi mum'en bee cardi

¹⁶ malla boo mi wonataano, bana ɓiŋngel ngel wardaay bee yoŋki, ngel yi'aay annoora.

¹⁷ Nder yenaande, halluɓe ndimmbataako fahin, ton somɓe e tampuɓe ɗon ciwto.

¹⁸ Haɓɓaaɓe fuu njooɗoto jam ton, ɓe nanataa hoolo helman.

¹⁹ Ton pamaro e mawɗo ngondan, maccuɗo boo rimɗan e jawmum.

²⁰ Koni Allah hokki torraaɓe jayŋgol, e laska-ɓerɗe'en fuu ngeendam?

²¹ Ɓe ndeenan maayde, nde warataa, ɓe ɗaɓɓan nde ko ɓuri jawdi.

²² Ɓe keewanno welwelo e seyo, ɓe ngamanno to ɓe keɓno yenaande.

²³ Ndaa goɗɗo mo anndaa haa o yahata, goɗɗo mo Allah maɓɓi, taarni ɗum kowaagol.

²⁴ Uumaali laatani yam nyaamdu e gonɗi am ɗon ila bana ndiyam.

²⁵ Ko kulmi, kanjum ukkantammi, ko ceekanmi, ɗon waranammi.

²⁶ Mi walaa jam, walaa siwtaare, de'ere walaa, sey ɓillaare!