Ayuba 26 - Fulfulde DC Bible

Ayuba seedi maŋngu Allah

¹ Ayuba jaabi:

Ayuba

² Kay! A anndi no kisnirta laafuɗo, no a wallirta juŋngo tampuŋgo.

³ Kay! A anndi sarwango cooyɗo hakkiilo mum, A ɗon waŋgina anndal lugguŋgal!

⁴ Moy mbolwanɗa bolle ɗe'e? Moy loŋngi ma bolle ɗe'e?

⁵ Yimɓe maayɓe ɗon ndiwna les lesdi, non ndiyamji e kuuje nder maaji boo.

⁶ Joonde maayɓe suuɗanaaki Allah, pellel halkere suddaaki yeeso maako.

⁷ Allah we'iti woyla dow cookum tan, kaŋko ɓili duniyaaru haa ko walaa sam.

⁸ Allah saawan ndiyamji nder duule mum, ammaa duule ceekataa daliila teddeeŋga man.

⁹ Leeso laamu ɗon wiirni e gite fuu, ngam o we'iti ruulde dow maago.

¹⁰ Sera mbeela o diidi taariiŋgol ɗum, keerol cennduŋgol jayŋgol e nyiɓre tum.

¹¹ To o telɓani daŋraŋge asama, ɗe ndimmboto, ngam ɗe ɗon kultora.

¹² Allah seeki mbeela bee semmbe mum. Allah fusi Rahab bee faamu mum.

¹³ Poofɗe maako ɗon laɓɓina asama. Juŋngo maako boo sumpiti mboodi ndoggoori.

¹⁴ En ngi'aay kuuɗe maajum, sey sera man, ko en nani, ɗum woni sofndaaŋgo tan. Baawɗe maako fakat kam, neɗɗo anndaa sam.