Ayuba 19 - Fulfulde DC Bible

Nuɗɗinki Ayuba e no Allah warjorto mo

¹ Ayuba jaabi:

Ayuba

² Ndey accoton ɓillugo yam? Haa ndey tokkoton torrugo yam bee bolle mooɗon?

³ On kuɗi yam nde sappo! Koni torroton yam bilaa semteende?

⁴ Koo to gooŋga mi laatake aybuɗo, min aybe man laarani.

⁵ On fuu on tammi on ɓuri yam, on ɗon aybinammi daliila toskaare am.

⁶ Ammaa paame booɗɗum, ɗum Allah toonyi yam, bee tuuforgol maako o naŋngi yam.

⁷ To mi wooki daliila toonyaare nde'e, walaa mo jaabatammi. To mi wooki ngam ballal, walaa mo suklanta haala kiita am!

⁸ Allah maɓɓi laawol am, saalaago haa ton heɓataako sam. O nyiɓɓini laabi am.

⁹ O itti daraja am, o jaɓti yam hormu, o hooci boo meetalol hoore am.

¹⁰ O nattidini yam, mi majji, o ittani yam tammunde bana ɓe ɗoofirta lekki.

¹¹ O ukkani yam tikkere maako fuu, o laari yam bana gooto caka konne'en maako.

¹² Ndaa, mooɓe maako ɗon ngara. Ɗe mbaɗan buuwol haa yotto yam, ɗe ngaran taaraago laymaaru am.

¹³ Allah waɗi deerɗam'en fuu ndaayo yam, anndunooɓe yam naane, ɓe anndaa yam sam.

¹⁴ Banndiraaɓe am acci yam, soobiraaɓe am ngejjiti yam.

¹⁵ Bana koɗo, non hoɗɓe e horɓe am ɗon ndaarammi, bana goɗɗo mo iwi lesdi ngoɗndi.

¹⁶ To mi ewnake kuuwoowo am, o jaabataako sam, to mi torake ballal, o nanataa sam.

¹⁷ Koo foofaaŋgo am ɗon nyiddi haa debbo am, bana kaccuɗo laatiimi yeeso ɓiɓɓe am.

¹⁸ Ndaa, koo ɓikkoy pamaroy ɗon njawo yam, to koy ngi'i yam, koy ngaran haa koy njalammi.

¹⁹ Soobiraaɓe am hooliiɓe, kamɓe fuu ɓe ɗon ɗoylammi, koo yiɗaaɓe am ngayliti, ɗon konammi.

²⁰ Ndaa, mi foo'i jamum, sey laral bee i'e tan lutti.

²¹ Onon soobiraaɓe, enɗeeɗam, useni enɗeeɗam! Juŋngo Allah fiyi yam.

²² On ɗon taasnammi tum bana Allah waɗata, on ɗon torrammi ɗuuɗɗum. On caftataa na?

²³ Kadi, bolle am fuu, sey goɗɗo winnda ɗe, ko mi wi'i, o winnda ɗum haa deftere.

²⁴ Bee njamndi ceeɓndi, ɓe mbinnda ɗum dow hayre, dalma ɓalwina binndol haa ngol duumo.

²⁵ Mi anndi laaɓɗum, coottoowo yam o geeto, haa timmoode o daroto dow lesdi.

²⁶ Saa'i maajum, to nyolol nyaami laral am, nden kam mi yi'an Allah, min bee hoore am.

²⁷ Walaa seko, mi yi'an mo bee gite am. Naa jananno mi yi'ata, sey kaŋko tan! Kanjum ɓernde am yenwata nder am.

²⁸ On ɗon mbi'a: “Ngam ɗume taasneten mo? Sey en keɓa daliila wullaago mo.”

²⁹ Kayto! Kultorane ko'e mon kaafahi, irin tikkere nde'e he'i maayde non, haa on paama, on annda kiitotooɗo ɗon.