Asta 1 - Fulfulde DC Bible

Juulde mawnde haa Suuza e toskaare Wasti

¹ Ndaa ko laati nder zamanu Ahasuwerus: Wakkati man o laamani lesɗe teemerre e noogas e joweeɗiɗi (127), diga Indiya haa yotti Etiyopiya.

² Saa'i o ɗon haa laamorde Suuza dow leeso laamu maako,

³ o waɗi nyaamduuji ngam mawɓe maako e saraaki'en maako fuu. Honooɓe iwɓe Persiya e Mediya e tedda-asli'en e ardiiɓe lesɗe maako ngari yeeso maako. O waɗi ɗum nder nduuɓu laamu maako tataɓu.

⁴ Nyalɗe teemerre e cappanɗe joweetati (180) o holli ɓe risku laamu maako pantuŋgu e tedduŋgal maŋngu maako kaayeefiiwal.

⁵ Nde wakkati man saali, o waɗi nyaamduuji feere ngam yimɓe nder laamorde Suuza fuu, mawɓe e leesɓe. Ɗum waɗi nyalɗe joweeɗiɗi haa daldal jarne laamorde.

⁶ Wiirndallooji daneeji e carwinaaɗi ɗon ɓili bee kalagaaje cardi haa ɓoggi daneeji ɗigguɗi e boɗeeji caka daŋraŋge kaa'e daneeje. Leese kaŋŋeeri e cardi ɗon mbe'iti dow taŋkol baɗaaŋgol bee kaa'e cehaaɗe ɗelkooje e daneeje e oole e ɓaleeje.

⁷ Yimɓe njari njaram nder njardukoy kaŋŋeeri feere feere. Laamiiɗo hokki ɓe inaboojam nguykinoojam ɗuuɗɗam fodde caahaaki laamiiɓe.

⁸ Koo moy yari bana ɓernde muuɗum yiɗi. Laamiiɗo umruno wakiili'en saare mum ɓe mbaɗana ewnaaɗo fuu ko o yiɗi.

⁹ Wasti, debbo laamiiɗo, kaŋko boo o waɗi nyaamduuji ngam rewɓe nder laamorde Ahasuwerus.

Toskaare debbo laamiiɗo Ahasuwerus

¹⁰ Nyannde joweeɗiɗawre, nde laamiiɗo yari, o seyi, o umri Mehuman e Bizzeta e Harbona e Bigeta e Abagata e Zetar e Karkas, sortaaɓe huuwanooɓe mo njoweeɗiɗo,

¹¹ ɓe ngadda Wasti debbo maako yeeso maako, meetiiɗo meetaleewol laamu. Laamiiɗo yiɗno hollugo ummaatooje e mawɓe no debbo oo wooɗiri, ngam o ŋarniiɗo masin.

¹² Ammaa Wasti, debbo laamiiɗo sali ɗowtanaago umroore nde sortaaɓe ngecci mo, o waraay. Ngam maajum ɓernde laamiiɗo metti, o ɓerni masin.

¹³ Nden o sarwotiri bee dawrooɓe maako annduɓe no goɗɗo huuwrata wakkatiiji fuu, ngam ɗum al'aada laamiiɗo o sarwotira haala fuu bee annduɓe umrooje e kiita.

¹⁴ Ndaa inɗe dawrooɓe maako ɓurɓe ɓadaago mo: Karsena e Setar e Adamata e Tarsis e Meres e Marsena e Memukan, mawɓe Persiya e Mediya njoweeɗiɗo, hoolaaɓe laamiiɗo, marɓe joole ɓurɗe teddugo nder laamu maako.

¹⁵ Laamiiɗo ƴami ɓe: “Fodde umrooje men, ɗume mbaɗeten debbo am Wasti mo ɗowtanaaki wolde am nde sortaaɓe ngecci ɗum?”

¹⁶ Memukan jaabi laamiiɗo e mawɓe: “Wasti, debbo laamiiɗo waɗi kalluɗum, naa dow laamiiɗo tan, ammaa dow mawɓe e ummaatooje nder lesɗe laamiiɗo Ahasuwerus fuu.

¹⁷ Ngam rewɓe fuu anndan ko o waɗi, ɓe njawoto worɓe maɓɓe, ɓe mbi'a: Laamiiɗo Ahasuwerus umri waddugo debbo mum Wasti yeeso muuɗum, ammaa o waraay.

¹⁸ Hannde rewɓe mawɓe nder Persiya e Mediya, nanɓe ko debbo laamiiɗo waɗi, mbi'an worɓe maɓɓe fuu bana non, yawaare e tikkere ɗuuɗan.

¹⁹ To ɗum fottani ma, barkaama, waɗ umroore, nde winnde nder umrooje Persiya'en e Mediya'en ngam taa nde waylo. Nde wi'a: Taa Wasti meeta waŋgugo yeeso laamiiɗo Ahasuwerus, laamiiɗo tammi hokkugo tedduŋgal maako haa debbo feere, ɓuranɗo mo wooɗugo.

²⁰ To a wooyni umroore nde'e nder njaajirka laamu maaɗa fuu, barkaama, rewɓe fuu teddinan worɓe muuɗum'en, koo mawɗo koo leesɗo.”

²¹ Haala man fottani laamiiɗo e mawɓe, laamiiɗo waɗi ko Memukan sarwini mo.

²² O neldi bataakeeji nder lesɗe maako fuu – haa lesdi koo ndiye bee binndol mum e ummaatoore koo ndeye bee wolde mum – ngam haa gorko fuu tabita o jawmu saare maako, o wolwa boo wolde maako.