Amos 6 - Fulfulde DC Bible

Halkere Isra'iila

¹ “Bone laatanto on, onon neeminiiɓe haa Siyona e hoolɗiniiɓe dow hooseere Samariya, mawɓe nder ummaatoore ɓurnde mawnugo. Isra'iila'en ɗon njaha haa mooɗon!

² Njehe haa berniwol Kalne, ndaare. Umme ton, njehe haa Hamat, berniwol maŋngol. Nden njippe haa Gaat, berniwol Filisti'en. On ɓuri laamuuji ɗi'i na? Koo maral mon ɓuri ngal maaji na?

³ On tammi nyalaade hallunde daayi masin, ammaa on ɓaditini laamu toonyaare.

⁴ On ɗon mbaali dow leese kuuwraaɗe bee nyii'e nyiibi, on ɗon porto dow be'itteeji. On ɗon nyaama kusel jawɗi e na'i payɗi.

⁵ On ɗon ngima bee moolooji, on ɗon mbaŋgina kuuɗe gimruɗe kese bana Daawuda.

⁶ On ɗon njara inaboojam nder taasaaje, on ɗon nguja ɓalli mooɗon bee nebbam ɓurɗam wooɗugo. Ammaa halkere lenyol Yusufu naawataa on.

⁷ Ngam maajum on aartan daheego. Juulɗe neeminiiɓe jinnan.”

⁸ Jawmiraawo Allah hunori bee hoore muuɗum: Ndaa ko Jawmiraawo Allah honooɓe asama wi'i: “Mi ɗon wanya mawnitaare yimɓe Yaakubu, mi ɗon wanya cuuɗi maɓɓe cemmbiɗɗi. Ngam man njoofanmi berniwol e ko woni nder maagol fuu haa konne'en mum.”

⁹ Koo to worɓe sappo lutti nder saare woore, ɓe maayan.

¹⁰ Banndiraawo uwanɗo waran ngam o wurtina maayɓe e suudu. O ƴaman nyukkiiɗo nder suudu: “Goɗɗo ɗon wondi bee maaɗa na?” Kaŋko o jaaboto: “Aa'a, woodaa.” O wi'an: “Jeeɗa! Taa ewna innde Jawmiraawo!”

¹¹ Ndaa ko Jawmiraawo umri: “Campite cuuɗi mawɗi, puse cuuɗi pamari!”

¹² Pucci njaawan dow tapaaje na? Goɗɗo yahran ga'i ngam remugo nokkuure nde'e na? Ammaa onon on ngartiri kiita ngooŋɗuka tooke mbarooje, gooŋgaaku boo njaram kaaɗɗam.

¹³ On ɗon ceyoro jaalorgal dow berniwol Loodebar, on ɗon mbi'a: “Min nyaami Karnayim bee semmbe amin!”

¹⁴ Ngam maajum kakkile, onon Isra'iila'en! Jawmiraawo, Allah honooɓe asama wi'i: “Mi umminan ummaatoore dow mooɗon, nde ɓilla on diga nastirde Hamat, haa yotto Maayo Araba, diga woyla haa fombina.”