Alkaali'en 21 - Fulfulde DC Bible

Puɗɗititki lenyol Benyamin

¹ Wakkati Isra'iila'en ɗonno mooɓti haa Mispa, ɓe kunino hunayeere, ɓe mbi'no: “Walaa koo gooto nder meeɗen te'nata ɓiyum debbo haa goɗɗo Benyamin.”

² Ɓe njehi haa Baytila, ɓe njooɗi ton yeeso Allah haa kiikiiɗe. Ɓe ɓaŋgti sawtuuji maɓɓe, ɓe mboyi bojji ɗuuɗɗi.

³ Ɓe mbi'i: “Yaa Jawmiraawo, Allah Isra'iila, ngam ɗume naawɗum ɗu'um waɗi? Ngam ɗume lenyol gootol nder le'i ɓadake majjugo?”

⁴ Jaŋngo maajum ɓe ndawi cub, ɓe mahi hirsirde ton, ɓe lii'i guleteeɗi e kirseteeɗi ngam kawtal maɓɓe bee Allah.

⁵ Ɓe ƴami: “Moy nder le'i Isra'iila mo waraay haa mooɓtorde Jawmiraawo?” Ngam ɓe kunino hunayeere, ɓe mbi'no: “Koo moy waraay, o mbareteeɗo.”

⁶ Isra'iila'en njurmini banndiraaɓe muuɗum'en yimɓe Benyamin, ɓe mbi'i: “Hannde lenyol gootol nder le'i Isra'iila ɗon majja.

⁷ Ko mbaɗeten haa luttuɓe Benyamin keɓa rewɓe? Ngam en kunori bee innde Jawmiraawo en ndokkataa ɓe ɓiɓɓe men rewɓe.”

⁸ Ngam maajum ɓe ƴami: “Woodi goɗɗo nder le'i Isra'iila mo waraay yeeso Jawmiraawo haa Mispa na?” Ɓe tawi walaa garɗo diga Yaabes nder lesdi Gile'at.

⁹ Nde ɓe ewni yimɓe fuu ngam limugo ɓe, walaa iwɗo berniwol maajum jaabi.

¹⁰ Jama'aare Isra'iila neli honooɓe semmbiɗɓe ujine sappo e ɗiɗo (12.000) haa Yaabes. Ɓe umri ɓe: “Njehe, mbare yimɓe Yaabes fuu, koo rewɓe e ɓikkoy boo.

¹¹ Nattine worɓe fuu, non boo rewɓe meeɗɓe waaldugo bee worɓe fuu.”

¹² Ɓe tawi nder yimɓe Yaabes faanyɓe rewɓe teemeɗɗe nayo (400) ɓe meeɗaay worɓe tawon. Ɓe njahri ɓe haa saŋngeere haa Silo nder lesdi Kanaana.

¹³ Nden jama'aare neldi habaru sulhu haa worɓe Benyamin luttuɓe haa tapaare Rimmon.

¹⁴ Kamɓe ɓe ngarti, Isra'iila'en ndokki ɓe faanyɓe Yaabes go. Ammaa faanyɓe man ke'aay haa maɓɓe.

¹⁵ Isra'iila'en njurmini yimɓe Benyamin ngam Jawmiraawo usti le'i Isra'iila.

¹⁶ Ndotti'en jama'aare mbi'i: “Walaa rewɓe lutti nder lenyol Benyamin. Ko mbaɗeten ngam haa worɓe luttuɓe keɓa rewɓe?

¹⁷ Noy mballirten luttuɓe haa lenyol Benyamin keɓa danygol, ngam taa lenyol koo gootol nder le'i Isra'iila majja?

¹⁸ Ammaa en mbaawataa hokkugo ɓe ɓiɓɓe men rewɓe, ngam en mbi'i: Koo moy te'ni ɓiyum debbo haa goɗɗo Benyamin, o naalaaɗo.”

¹⁹ Nden ɓe numi: “Nde hitaande yaalti fuu, en mbaɗana Jawmiraawo juulde haa Silo.” Silo ɗon haa woyla Baytila, haa fombina Leboona, haa fuunaaŋge laawol jahranŋgol diga Baytila haa Sikem.

²⁰ Ɓe mbi'i worɓe Benyamin: “Njehe, nyukke nder gese inabooje.

²¹ Kakkile, to ɓiɓɓe rewɓe ngurtake Silo ngam wamugo, onon boo ngurte gese. Koo moy mooɗon jaɓta gooto nder ɓiɓɓe rewɓe, dillira mo lesdi Benyamin.

²² To baabiraaɓe maɓɓe malla deerɗiraaɓe maɓɓe ngari haa amin ngam haa ɓe njokkira bee amin, min mbi'an ɓe: Ngerde ɓe njogito ɓe, ngam min keɓanaay koo moy maɓɓe debbo mum nder haɓre haa Yaabes. Onon on ndokkaay ɓe rewɓe. To naa non, on mbaɗanno aybe.”

²³ Worɓe Benyamin mbaɗi bana non, koo moy maɓɓe jaɓti gooto nder faanyɓe rewɓe Silo wamooɓe. Nden ɓe kooti lesdi maɓɓe. Ɓe nyiɓti berniiji maɓɓe, ɓe njooɗi ton.

²⁴ Isra'iila'en boo ndilli, koo moy haa lenyol mum e jabbere mum, ɓe kuuci haa mare maɓɓe.

²⁵ Zamanu man walaa laamiiɗo haa Isra'iila, koo moy ɗon waɗa ko ɓernde mum yiɗi.