2 Piyer 2 - Fulfulde DC Bible

Jaŋnginooɓe fewooɓe

¹ Bana no fewooɓe wi'anɓe ɓe annabi'en ɗon caka yimɓe naane, non fewooɓe wi'anɓe ɓe ekkitinooɓe ngonan caka mooɗon. Ɓe ngaddan ekkitinol fewre, kalkowol, ɓe ngeddan maa Jawmiraawo mo hisni ɓe. Ngam maajum halkere heɓan ɓe law.

² Koo non, ɗuuɗɓe tokkoto daakaareeku maɓɓe. Ngam daliila maɓɓe, yimɓe mbolwan kalluka dow ekkitinol gooŋgawol.

³ Daliila suuno, fewooɓe ɓe'e estan on bee bolle rikiciije ngam heɓugo riba. Diga naane, kiita maɓɓe taaskaama, halkere maɓɓe neeɓataa!

⁴ Koo malaa'ika'en waɗɓe hakke maa ndaɗaay, Allah sakkini ɓe haa yiite jahannama, ɓe maɓɓaama nder nyiɓre bee callalluuji, ɓe ɗon ndeena nyannde kiita.

⁵ Yimɓe ɓe duniyaaru ɓooymaaru ndaɗaay, ammaa o waddi ilam tuufaana dow duniyaaru halluɓe. Sey Nuuhu, gaazoowo adilaaku tan hisi, non boo yimɓe muuɗum njoweeɗiɗo.

⁶ Allah hiiti gure Sodoma e Gomorra, nattini ɗe e laatini ɗe doɗɗe. Ɗum laatani halluɓe ɓe'e misaalu ko tammi heɓugo ɓe.

⁷ O hisni Ludu, goɗɗo adiliijo, cuniiɗo daliila gikku daakaareeku ngu yedduɓe ɓe'e.

⁸ Ngam adiliijo oo ɗonno jooɗodi bee maɓɓe, halleende maɓɓe nde o yi'i e o nani ɗonno torra ɓernde maako masin.

⁹ Ammaa Jawmiraawo anndi no hisnirta hulɓe mo diga jarribeeki. O anndi boo no o aynirta halluɓe ngam haa o hiito ɓe nyannde kiita,

¹⁰ sakkonta yiɗɓe coɓki, tokkiiɓe suunooji ɓanndu, yawiiɓe baawɗe Allah. Fewooɓe ɓe'e, ɓe kulataa, ɓe elewɓe, ɓe ɗon njawo tedduɓe asama, ɓe ɗon kuɗa ɓe.

¹¹ Koo malaa'ika'en ɓuranɓe ɓe maŋngu e baawɗe maa ngullataako e kuuɗataa mawɓe asama yeeso Jawmiraawo.

¹² Ammaa kamɓe ɓe nanndi bee kuuje ladde, ɗe ngalaa hakkiilo, ɗe tagaama ngam naŋngeego e mbareego, ɓe ɗon kuɗa ɗum ko ɓe paamataa. Ɓe halketeeɓe bana kuuje ladde,

¹³ ɓe torreteeɓe bana ɓe torriri woɗɓe, ɗum laatoto ngeenaari sooynde adilaaku maɓɓe. Ɓe ɗon ceyo humtugo suunooji ɓalli maɓɓe yeeso yimɓe. Ɓe ɗon nyaamda bee mooɗon nder juulɗe, ɓe ɗon ceyoro zammba maɓɓe.

¹⁴ Ɓe ɗon keewi suuno to ɓe ngi'i rewɓe fuu, ɓe comataa waɗugo hakke sam. Ɓe ɗon esta tampuɓe. Ɓerɗe maɓɓe keewi suuno, ɓe naalaaɓe!

¹⁵ Ɓe acci laawol gooŋga, ɓe majji, ɓe tokki laawol Balaama ɓii Be'or, giɗɗo ngeenaari sooynde adilaaku,

¹⁶ ammaa o felaama ngam boofol maako. Ngam wamnde wolwani mo bee sawtu neɗɗo koo to nde wolwataa no, nde haɗi faataare annabiijo oo.

¹⁷ Yimɓe ɓe'e nanndi bee ɓulndu yoorndu, ɓe nanndi bee duule ɗe henndu soggata. Nyiɓre ɓurdunde nyiɓɓugo ɗon reeni ɓe.

¹⁸ Bee bolle meereeje, elewɗe masin e bee suunooji cemtiniiɗi, ɓe ɗon esta daɗɓe yeeɗanɓe nder majjere bee daker.

¹⁹ Ɓe ɗon iino ɓe ndimu, asee boo kamɓe maa ɓe maccuɓe gikkuuji kalkooji. Ngam ko jaali goɗɗo fuu, laatini ɗum maccuɗo maajum.

²⁰ To yimɓe ngurtake coɓe duniyaaru ngam ɓe anndi Jawmiraawo e Kisnoowo meeɗen Yeesu Almasiihu, nden ɓe ndokki ɗe laawol fahin, ɗe njaali ɓe, joonde maɓɓe jontaare halli ɓuri nde naane.

²¹ Ndikkano ɓe to ɓe meeɗaayno anndugo laawol adilaaku dow anndugo ngol e accugo umroore maagol seniinde nde ɓe anndinaama!

²² Ko waɗi ɓe, gooŋɗini balndol ngo'ol: “Rawaandu lorake haa tuure mum” malla: “Gaduuru yiiwaandu lorake, talliti nder loope.”