2 Korintu'en 1 - Fulfulde DC Bible

Koofŋgol

¹ Min Pol nelaaɗo Yeesu Almasiihu fodde muuyo Allah, min bee Timote, deerɗiraawo meeɗen, min ɗon mbinndana on, onon yimɓe jama'aare Allah wonɓe haa Korintu e senaaɓe nder lesdi Akaya fuu:

² Allah, Baabiraawo men e Yeesu Almasiihu, Jawmiraawo men, ndokka on mo'ere e salaaman.

Yettoore Pol haa Allah

³ Maŋgtoore laatano Allah, Baabiraawo Jawmiraawo meeɗen Yeesu Almasiihu, Baabiraawo keewɗo enɗam, o Allah mo ɗon de'itina yimɓe foroy.

⁴ O ɗon de'itina min nder ɓillaaje amin fuu, ngam haa minin boo min mbaawa de'itingo yaranɓe boneeji feere feereeji bee de'itinki ki min keɓi haa maako.

⁵ Bana no boneeji ɗi min njari daliila Almasiihu ɗon ɗuuɗani min, bana non de'itinki iwki haa Almasiihu boo ɗon ɗuuɗani min.

⁶ To min ɗon njara bone, ɗum laatoto ngam haa on nde'ita, on kisa. To Allah de'itini min boo, ɗum laatoto ngam on cemmbiɗa, on munyana irin boneeji ɗi min njarata.

⁷ Min ɗon tammo fakat, ngam min anndi nde nii on ɗon kawta bee amin nder boneeji, on kawtan boo bee amin nder de'itinki boo.

⁸ Deerɗiraaɓe, min ngiɗi anndingo on ɓillaaje keɓɗe min nder lesdi Asiya. Ɗe teddani min masin haa ɓuri semmbe amin. Min tammaakino min ngeeɗan fahin.

⁹ Min maati nder ɓerɗe amin bana min ndo'aaɓe kiita mbareego. Non ɗum laatori ngam taa min koolo ko'e amin, ammaa min koolo Allah, ummitinoowo maayɓe.

¹⁰ Kaŋko hisni min joote maayde irin nde'e, o hisnan min fahin. Min ɗon tammoro mo o hisnan min yeeso fahin.

¹¹ Onon boo on ɗon mballa min bee do'aaje mooɗon. Allah woonanan min ngam daliila do'aaje yimɓe ɗuuɗɓe. Ɗuuɗɓe boo ngettan mo ngam amin.

Daliila ka Pol faasitini jahaaŋgal mum

¹² Numooji ɓerɗe amin ɗon ceedano min, min njooɗi nder gooŋgaaku e laaɓeeŋga nder duniyaaru, sakkomaa caka mooɗon. Kanjum iwi haa Allah, kanjum min mantorto. Min ndaraaki dow faamu yimɓe, sey dow mo'ere Allah.

^13-14 Walaa goɗɗum saawi nder bataakeeji amin, sonaa ko on njaŋngata, ko on paamata. Mi ɗon tammo on paaman nder timmididɗum ko paamoton jonta dow dow: Nyalaade loraaki Yeesu, Jawmiraawo meeɗen, on ceyorto min bana minin boo min ceyorto on.

¹⁵ Nde nii mi nuɗɗini ɗum, mi yelino yaalugo haa mooɗon nder jahaaŋgal am ngam haa keɓon mo'ere Allah ɗiɗawre.

¹⁶ Diga mooɗon mi yahanno Makedoniya, nden mi lorotono fahin diga Makedoniya haa mooɗon, ngam haa on mballammi nder haaje jahaaŋgal am yahugo Yahudiya.

¹⁷ Nde mi waɗno anniya ka'a, mi numaayno bee hakkiilo am na? Malla to mi waɗi anniya, mi waɗi ɗum bana no yimɓe duniyaaru mbaarata, haa mi wi'a “ooho” warta mi wi'a fahin “aa'a” na?

¹⁸ Fakat Allah o koolniiɗo, ko min mbi'ata on laataaki ooho bee aa'a ɗiɗi fuu.

¹⁹ Yeesu Almasiihu, Ɓiɗɗo Allah mo min anndini on, min e Silas e Timote, kaŋko o laataaki ooho bee aa'a, sey ooho tan.

²⁰ Ngam kaŋko woni ooho mo tabitini ko Allah iini fuu. Ngam daliila maako boo mbi'eten “aamiina” ngam teddingo Allah.

²¹ Allah bee hoore mum tabitinta en nder kawtal bee Yeesu Almasiihu. Kaŋko suɓi en,

²² o waɗani en lammba maako, o hokki en Ruuhu maako nder ɓerɗe meeɗen bana jeŋngina hayruuji ɗi o resani en.

²³ Allah woni ceedoowo yam, o hiito yam to mi fewi! Mi loraaki haa Korintu, ngam taa mi saatana on.

²⁴ Min ngiɗaa doolugo on nuɗɗingo koo ɗume, ngam on ɗon tabiti nder nuɗɗinki. Ammaa min ngiɗi huuwdugo bee mooɗon ngam haa seyo mooɗon ɓesdo.