1 Timote 6 - Fulfulde DC Bible

¹ Laatiiɗo jeyaaɗo goɗɗo fuu, sey o laara jawmiiko bana ke'iiɗo heɓugo daraja fuu, ngam taa goɗɗo hallina innde Allah e ekkitinol men.

² Jeyaaɗo goɗɗo Masiihiŋkeejo boo, taa o yawo jawmiiko ngam ɓe laati deerɗiraaɓe. Sey o huuwana mo bee tiinaare fantunde, ngam jawmiiko naftortooɗo kuugal maako, o giɗaaɗo Allah. Sey a ekkitina kuuje ɗe'e, a waso ɗe jama'aare.

Ekkitinol pewoowol e risku mbooɗŋgu

³ To goɗɗo waddi ekkitinol goɗŋgol, to o tokkaaki bolle gooŋgaaje ɗe Jawmiraawo men Yeesu Almasiihu e ekkitinol fodde kulol Allah,

⁴ nden kam o mawnitiiɗo mo anndaa koo ɗume. O ginnaaɗo, cuunaaɗo gaabotiral e jokkirgol dow bolle. Ko iwata haa maajum, ɗum kaajal e jokkirgol e kuudi naawɗi e gikkuuji kalluɗi

⁵ e haɓre nde walaa keerol hakkunde yimɓe halla-hakkiilo'en e sooya-gooŋga'en. Ɓe ɗon ndaara nuɗɗinki bana laawol heɓugo riba.

⁶ Fakat, nuɗɗinki, ɗum riba makka, to goɗɗo ɗon seyoro ko o mari,

⁷ ngam walaa ko ngadduɗen haa duniyaaru e walaa boo ko mbaaweten wurtodaago.

⁸ Ngam maajum, to en ngoodi nyaamdu e limce, ɗum he'an en.

⁹ Ammaa yiɗɓe riskugo ndo'oto nder estooji. Ɓe nastan tuuforgol e suunooji paataaɗi, torranɗi, do'anɗi yimɓe nder nattere e halkere.

¹⁰ Ngam suuno ceede woni ɗaɗol halleende fuu. Woɗɓe cuunaama ɗe, haa ɓe celi laawol nuɗɗinki, ɓe ngaddani ko'e maɓɓe torraaji naawɗi ɗuuɗɗi.

Haɓre nuɗɗinki woonde

¹¹ Ammaa an, goɗɗo Allah, doggu kuuje ɗe'e. Ɗaɓɓu adilaaku e kulol Allah e nuɗɗinki e yiide e dartaare e yaŋkinaare.

¹² Sey a haɓa haɓre nuɗɗinki woonde haa keɓa ngeendam nduumiiɗam. Allah ewni ma haa ngeendam man saa'i mbaɗɗa seedamku nuɗɗinki ma mbooɗŋgu yeeso seedooɓe ɗuuɗɓe.

¹³ Yeeso Allah, geeɗinoowo kuuje fuu e yeeso Yeesu Almasiihu, baɗɗo seedamku mbooɗŋgu yeeso Pontiyus Pilaatu, umranmaami:

¹⁴ Ɗowtan umroore nde'e bee laaɓɗum, bilaa feloore, haa nyalaade Jawmiraawo men Yeesu Almasiihu waŋgata.

¹⁵ Baŋguki man laatoto nder saa'iire nde Allah ta'ino ɗum. O Allah ke'iiɗo maŋgteego, Baawɗo feere muuɗum, Laamiiɗo laamlaamɓe, Jawmiraawo jawmiraaɓe.

¹⁶ Kaŋko feere maako mari duumaare, o ɗon jooɗi nder annoora ka ɓadataake, walaa neɗɗo meeɗi yi'ugo mo, waawataa yi'ugo mo boo. Tedduŋgal e baawɗe duumiiɗe laatano mo. Aamiina!

¹⁷ Umru riskuɓe nder duniyaaru ndu'u, taa ɓe mawnito. Taa ɓe koolo risku ngam ngu tabitittaa, ammaa ɓe koolo Allah, dokkanɗo en koo ɗume fuu bee caahaaki haa en ceyoro ɗum.

¹⁸ Umru ɓe ɓe kuuwa mbooɗeeŋga, kuuɗe booɗɗe laato risku maɓɓe, ɓe laato saahiiɓe, ɓe mballa woɗɓe bee jawdi maɓɓe.

¹⁹ Bana nii ɓe cigoranto ko'e maɓɓe ndesaari mboondi, ngam garanɗum, haa ɓe keɓa ngeendam gooŋgaajam fakat.

²⁰ An Timote, hakkilan ekkitinol ngol kalfinaaɗa booɗɗum. Daaya haalaaji baaɗɗi e geddi e gaabi paataaɗi dow ko wi'ete anndal, ammaa naa ɗum anndal gooŋgawal.

²¹ Woɗɓe ɗon mbi'a ɓe ngoodi anndal nga'al, ammaa ɓe celi laawol nuɗɗinki. Mo'ere Allah wondu bee mooɗon!