1 Timote 4 - Fulfulde DC Bible

Ekkitinooɓe pewe

¹ Ruuhu Allah wi'i laaɓɗum, nder nyalɗe ragareeje yimɓe woɗɓe accan nuɗɗinki, tokkoto ruuhuuji pewooji e ekkitinolji ginnaaji,

² ɗi naafiki'en fewooɓe ekkitinta. Numo ɓerɗe fewooɓe ɓe'e waati, bana njamndi ngulndi jaw wuli ngo.

³ Ɓe ɗon kaɗa ɓaŋgo e nyaamugo kuuje feere feere ɗe Allah tagi ngam haa nuɗɗinɓe mo, annduɓe gooŋga, nyaama ɗe bee yettoore.

⁴ Ngam ko Allah tagi fuu ɗum booɗɗum, walaa ko wudinte, to en njaɓi ɗum bee yettoore.

⁵ Ngam wolde Allah e tornde ceni ɗum.

Jaggiiɗo Almasiihu booɗɗo

⁶ To a anndini deerɗiraaɓe kuuje ɗe'e, nden kam a laatoto jaggiiɗo Almasiihu Yeesu booɗɗo, nyaamnoowo yoŋki mum bee kubaruwol dow nuɗɗinki e ekkitinol booɗŋgol ngol tokkiiɗa bee tiinaare.

⁷ Ammaa kiccaaji yedduɗi bana ɗi rewɓe nayeeɓe, sey a salo ɗi. Woownu hoore ma haa a yeeɗa nder kulol Allah.

⁸ Woownugo ɓanndu ɗon nafa seɗɗa, ammaa kulol Allah ɗon nafa koo ɗume fuu, ngam ngol waddanan en ngeendam jonta e nder wakkatiiji garanɗi boo.

⁹ Kanjum woni wolde hoolniinde he'iinde jaɓeego bilaa seko.

¹⁰ Ngam man en ɗon kuuwa bee bone, en ɗon kaɓda, ngam en njo'ini tammunde meeɗen dow Allah geeto. Kaŋko woni Kisnoowo yimɓe fuu, sakkomaa nuɗɗinɓe Almasiihu.

¹¹ Umru nuɗɗinɓe kuuje ɗe'e, ekkitin ɓe ɗe.

¹² Taa goɗɗo yawo ma ngam daliila nderkaaku ma. Laatana nuɗɗinɓe misaalu haa bolle e yahdu e yiide e nuɗɗinki e laaɓeeŋga.

¹³ Suklana jaŋngango ɓe defte ceniiɗe, wasa ɓe, ekkitin ɓe, haa to mi wari.

¹⁴ Taa yeeba dokkal Ruuhu Allah gonŋgal nder maaɗa, ngal keɓɗa nder annabaaku nde ndotti'en mballini juuɗe muuɗum'en dow maaɗa.

¹⁵ Suklana kuuɗe ɗe'e, huuw ɗe bee ɓernde ma fuu, ngam haa koo moy fuu yi'a no ɓesdortooɗa yeeso yeeso nder maaje.

¹⁶ Hakkilan hoore ma e ekkitinol ma bee tiinaare. To a tokkake waɗugo ɗum, a hisnan hoore ma e nananɓe ma.