1 Timote 3 - Fulfulde DC Bible

Ardiiɗo jama'aare nuɗɗinɓe

¹ Ndaa wolde hoolniinde: To goɗɗo yiɗi laataago ardiiɗo jama'aare nuɗɗinɓe, o yelake kuugal booɗŋgal.

² Ngam maajum, sey ardiiɗo wona goɗɗo mo walaa feloore, marɗo debbo gooto, naŋgtiiɗo, kakkilɗo, ne'iiɗo, beernoowo hoɗɓe, baawɗo ekkitingo.

³ Taa o laato guykoowo malla toonyoowo, ammaa o laato ɗelma-gikkuujo, naa o jokkiroowo malla cuunaaɗo ceede.

⁴ Sey o ɗowa saare maako booɗɗum, o elta ɓikkoy maako haa koy ɗowtano mo, ɗum laato nder neɗɗaaku timmuŋgu.

⁵ Ngam to goɗɗo anndaa ɗowugo saare mum, noy o waawrata aynugo jama'aare nuɗɗinɓe Allah?

⁶ Taa o wona keso nder nuɗɗinki. Ngam taa o mawnito, o do'o nder kiita bana Iblisa.

⁷ Sey o mara innde woonde koo haa yimɓe ɓe nuɗɗinaay boo, ngam taa ɓe nyo'a mo, nden o do'o nder tuuforgol Iblisa.

Wallooɓe jama'aare nuɗɗinɓe

⁸ Wallooɓe jama'aare nuɗɗinɓe, kamɓe boo, ɓe mara neɗɗaaku, taa ɓe laato naafiki'en malla wuykooɓe malla suunaaɓe riba.

⁹ Sey ɓe kakkilana gooŋga nuɗɗinki ka Allah waŋgini ɗum, ɓe njogo ka bee numo ɓernde laaɓŋgo.

¹⁰ Kamɓe boo, sey jama'aare aarta, linya ɓe. To ɓe ngalaa feloore, nden kam ɓe nasta kuugal.

¹¹ Rewɓe laatiiɓe wallooɓe jama'aare nuɗɗinɓe boo sey mara neɗɗaaku, taa ɓe laato nyo'ooɓe, ammaa ɓe naŋgtiiɓe, hoolaaɓe nder koo ɗume fuu.

¹² Balloowo jama'aare laato marɗo debbo gooto, sey o ɗowa saare maako e ɓikkoy maako booɗɗum.

¹³ Ngam mo huuwi kuugal mum booɗɗum, heɓanan hoore mum darnde woonde, non boo dartaare ɗuuɗnde haa nuɗɗinki nder Almasiihu Yeesu.

Baŋginki sirri nuɗɗinki meeɗen

¹⁴ Mi winndani ma ɗu'um bee tammunde wargo haa maaɗa yeeso seɗɗa.

¹⁵ Ammaa to mi warlawaay, bataakewol ngo'ol anndinte no kuuwrata nder saare Allah, waato nder jama'aare yimɓe Allah geeto. Kayre woni daŋraŋgal gooŋga e caɓɓawal maaka.

¹⁶ Fakat, baŋginki sirri nuɗɗinki meeɗen mawni: O waŋgi bee ɓanndu neɗɗo, Ruuhu gooŋɗini mo. Malaa'ika'en ngi'i mo. Ummaatooje ngaazinaama kubar maako. Yimɓe duniyaaru nuɗɗini mo, o eeŋginaama nder tedduŋgal haa asama.