1 Samuyila 7 - Fulfulde DC Bible

¹ Yimɓe Kiriyat-Ye'arim ngari, koo'i sundukru Jawmiraawo, njahri ndu haa saare Abinadabu wonnde dow towndiire. Ɓe ceni ɓiɗɗo maako Eli'azaaru haa o ayna sundukru Jawmiraawo.

Samuyila alkaaliijo Isra'iila

² Diga garki sundukru alkawal haa Kiriyat-Ye'arim, duuɓi noogas caali. Wakkati man fuu Isra'iila'en ɗon uumo yeeso Jawmiraawo.

³ Samuyila wi'i Isra'iila'en: “To on muuyi loraago haa Jawmiraawo bee ɓernde woore, nden kam itte suuraaji labbi jananni e Astarot fuu. Ɗakkotire bee Jawmiraawo, njaggane mo kaŋko feere maako. Nden kam o hisnan on juuɗe Filisti'en.”

⁴ Isra'iila'en ɗowtani mo, itti suuraaji Ba'al e Astarot, njaggani Jawmiraawo feere mum.

⁵ Nden Samuyila wi'i: “Sey Isra'iila'en fuu mooɓto haa Mispa. Ton mi toroto Jawmiraawo ngam mooɗon.”

⁶ Ɓe mooɓti haa Mispa. Ɓe nyeɗi ndiyam, ɓe ndufi ɗam yeeso Jawmiraawo, ɓe cuumi nyalaade man, ɓe mbi'i: “Min mbaɗi hakke dow Jawmiraawo.” Ton haa Mispa, Samuyila wonno alkaaliijo maɓɓe.

⁷ Nde Filisti'en nani haala mooɓtorde Isra'iila'en haa Mispa, laamiiɓe maɓɓe njowo fuu ummi, kamɓe e jama'aare konu maɓɓe, haa ɓe ukkano Isra'iila'en. Nde Isra'iila'en nani ɗum, ɓe kultori.

⁸ Ɓe mbi'i Samuyila: “Taa accu toraago Allah Jawmiraawo men haa o hisna en juuɗe Filisti'en.”

⁹ Samuyila hirsi jawgel musinanŋgel, lii'ani ngel Jawmiraawo guleteeŋgel, tori mo haa o walla Isra'iila'en. Jawmiraawo boo jaɓi tornde maako.

¹⁰ Saa'i Samuyila ɗonno lii'o guleteeŋgel, Filisti'en ɓaditi Isra'iila'en haa ɓe kaɓa. Ammaa Jawmiraawo hulni ɓe bee pelmaali cemmbiɗɗi, jiiɓi hakkilooji maɓɓe, Isra'iila'en njaali ɓe.

¹¹ Isra'iila'en ngurti Mispa, taasni ɓe, puɗɗi mbarugo ɓe haa yotti les Bayti-Kar.

¹² Samuyila hoo'i hayre mawnde, darni nde hakkunde Mispa e Seen. O wi'i: “Haa wargo ɗo Jawmiraawo walli en.” Ngam maajum o wi'i hayre maajum Eben-Ezer.

¹³ Bana nii Filisti'en njaalaama. Ɓe meetaay nastugo lesdi Isra'iila. Jawmiraawo tikkani ɓe balɗe ngeendam Samuyila fuu.

¹⁴ Berniiji Isra'iila hakkunde Ekuruun e Gaat ɗi Filisti'en njaɓtuno, ɗi lorti nder maral Isra'iila, lesdi maɓɓe kisi juuɗe Filisti'en. Ammaa sulhu ɗonno hakkunde Isra'iila'en bee Amoori'en.

¹⁵ Samuyila laati alkaaliijo Isra'iila balɗe mum fuu.

¹⁶ Hitaande fuu o yaalti Baytila, Gilgal e Mispa, o waɗani Isra'iila'en kiita ton.

¹⁷ Nden o lorti haa Rama haa saare maako woni. Ton boo o mahani Jawmiraawo hirsirde, o huuwi kuugal alkaaliijo Isra'iila.