1 Samuyila 16 - Fulfulde DC Bible

Allah suɓi Daawuda

¹ Jawmiraawo wi'i Samuyila: “Ndey a accata sunoraago Sawulu? Mi wudini mo ngam taa o tokko laamanaago Isra'iila. Hebbin luwal ma bee nebbam cenirɗam, yah haa Baytilaama haa goɗɗo mo innde mum Yessa. Mi suɓani hoore am gooto nder ɓiɓɓe maako haa o laato laamiiɗo.”

² Samuyila wi'i: “Noy njahanmi ton? To Sawulu nani ɗum, o mbaratam.” Jawmiraawo wi'i: “Hoo'u wiige, yahru nge ton, wi' yimɓe a wari ngam lii'anaago Jawmiraawo kirseteeŋga.

³ Ewna Yessa haa juulde kirseteeŋga man, min boo mi wi'ete ko mbaɗata, moy nder ɓiɓɓe maako a moytata ngam o laato laamiiɗo.”

⁴ Samuyila ɗowtani Jawmiraawo, yehi Baytilaama. Nde ndotti'en berniwol ngi'i mo, ɓe kultori, ɓe ƴami mo: “Jam waddu ma boo?”

⁵ O jaabi: “Jam! Mi wari ngam lii'anaago Jawmiraawo kirseteeŋga. Cene ko'e mon, nden njahde bee am haa nyaamdu kirseteeŋga.” O seni Yessa e ɓikkoy muuɗum boo, o ewni ɓe ton.

⁶ Nde ɓe ngari, Samuyila yi'i Eliyabu ɓii Yessa, numi: “Kaŋko woni cuɓaaɗo Jawmiraawo.”

⁷ Ammaa Jawmiraawo wi'i mo: “Taa hakkilan darnde maako juutnde, mi suɓaay mo. Min kam mi laarataa bana yimɓe ndaardata. Neɗɗo laaran ko gite mum ngi'ata, ammaa min mi laaran ko woni nder ɓernde goɗɗo.”

⁸ Yessa ewni Abinadabu, yahri mo yeeso Samuyila. Ammaa Samuyila wi'i: “Jawmiraawo suɓaay mo.”

⁹ Yessa waddi Samma, ammaa Samuyila wi'i: “Kaŋko boo Jawmiraawo suɓaay mo.”

¹⁰ Bana nii Yessa waddi ɓiɓɓe muuɗum njoweeɗiɗo yeeso Samuyila. Ammaa Samuyila wi'i: “Jawmiraawo suɓaay koo gooto maɓɓe.”

¹¹ Nden o ƴami Yessa: “Kamɓe tan ngoni ɓiɓɓe ma fuu na?” Yessa jaabi: “Aa'a, lutti gaajiijo am, o ɗon dura dammooji.” Samuyila wi'i: “Nel goɗɗo wadda mo, ngam en puɗɗataa nyaamugo hiddeko o wara.”

¹² Yessa neli goɗɗo, nden Daawuda wari. O suka ŋarniiɗo, boɗeejo, gite maako ɗon njayna. Jawmiraawo wi'i Samuyila: “Ɗum kaŋko, moytu mo.”

¹³ Samuyila hoo'i luwal bee nebbam cenirɗam, moyti Daawuda yeeso deerɗiraaɓe muuɗum fuu. Diga saa'i maajum Ruuhu Jawmiraawo jippi dow Daawuda. Nden Samuyila ummi, yehi haa Rama.

Daawuda huuwani Sawulu

¹⁴ Ruuhu Jawmiraawo acci Sawulu, Jawmiraawo neli mo ruuhuwol kalluŋgol ngol hulna mo.

¹⁵ Sukaaɓe Sawulu mbi'i mo: “Ndaa, ruuhuwol kalluŋgol iwŋgol haa Jawmiraawo ɗon hulne, barkaama.

¹⁶ Naa ndikka min ɗaɓɓitane goɗɗo annduɗo fiyugo moolooru na? To ruuhuwol man wari dow maaɗa, o yimane bee moolooru haa keɓa daama.”

¹⁷ Sawulu jaabi: “Ndaaraneeɗam goɗɗo annduɗo fiyugo moolooru booɗɗum, ngadde mo haa am.”

¹⁸ Gooto nder sukaaɓe maako wi'i: “Mi anndi goɗɗo. Yessa mo Baytilaama woodi ɓiɗɗo baawɗo moolooru. O konoowo cemmbiɗɗo boo, o ŋarniiɗo, baawɗo wolwugo, Jawmiraawo ɗon wondi bee maako.”

¹⁹ Sawulu neli nelaaɓe haa Yessa, wi'i mo: “Neldam ɓiɗɗo ma Daawuda, duroowo dammooji.”

²⁰ Yessa hokki Daawuda jawgel mbeewa e wamnde rimdaande tamseeje e kanyakanyaawu inaboojam o yahra ɗum haa Sawulu.

²¹ Bana nii Daawuda wari, yehi haa laamiiɗo Sawulu. Sawulu yiɗi mo masin, waɗi mo doondoowo balmi mum.

²² Sawulu neli goɗɗo haa Yessa, wi'i mo: “Mi yiɗi Daawuda. Accu mo o jooɗo haa am, o huuwanammi.”

²³ Koo ndeye ruuhuwol iwŋgol haa Allah go wari dow Sawulu, Daawuda hoo'a moolooru, fiya ndu. Nden Sawulu foofta, heɓa daama, ruuhuwol boo acca mo.