Tuifakamaau 9 - Tosi Tapu

¹ Na ano loa Apimeleke, vosa o Selupaale, ki Siseme, o masau ki tuagaane o lona tinana ti mo le famili katoa o lona tinana. Na pati loa a ia kia latou :

² E kau kole atu kia koutou ke kotou vesili ki tagata o Siseme pe lotou malie ia ake ke pule kia latou a vosa e tino fitu o Selupaale pe ko se tagata e toka tasi. Ti ke kotou manatui ko au ko lokoutou ivi mo lokoutou kanofi.

³ Na ano loa tuagaane o lona tinana o toe lau kiate ia le masau lena ki le kakai o Siseme, ti na maafe loa lolatou loto kia Amaleke, talie na lotou pati loa : Ko lotatou taina totonu a ia.

⁴ Ti na lotou soli loa kia Amaleke ni fa sikele paaga e kau fitu mei le fale tapu o Paale-Peliti. Na totogi loa e Amaleke, ki le paaga lena, ni tagata veli mo ni tagata folinoa ke lotou mulimuli iate ia.

⁵ Na ano loa a ia ki le fale o lona tamana i Ofala, ti na tamate loa e ia i ai ona fetaina, a vosa e tino fitu o Selupaale i aluga o le fatu e tasi. Na sao loa Sotame toka tasi, vosa mulimuli o Selupaale, talie na mumuni loa a ia.

⁶ Na fakatasi loa tagata fuli o Siseme mo le kakai fuli o Pete-Milo, ti na lotou ano loa ki le sene o Siseme, i tafa o le fatu tapu, o fakanofo Apimeleke ke sau.

Fakamalaia a Sotame

⁷ Na fakasa loa le nea lena kia Sotame. Ti na ano loa a ia o tuu i le tumutumu o le mauga ko Kalisimi, o kalagai fakamakeke le nea leinei : Ke kotou fakalogo mai tagata o Siseme, mo kapau e kotou loto ke fakalogo atu le Atua kia koutou !

⁸ I se aso, na loto loa a laakau ke afa solatou sau. Ti na lotou pati loa ki le olive : Au o sau kia matou.

⁹ Kae na tali loa le olive kia latou : Pe kau fakafiti loa ki loku lolo, leia e kau mauiga ai ki le Atua mo tagata, o ano o lagiaki ki laakau ?

¹⁰ Ti na pati loa a laakau ki le fiki : Au o sau kia matou !

¹¹ Kae na tali loa le fiki kia latou : Pe kau fakafiti loa ki oku fua suamalie mo kano malie, o ano o lagiaki ki laakau ?

¹² Ti na pati loa laakau ki le vite : Au o sau kia matou !

¹³ Kae na tali loa le vite kia latou : Pe kau fakafiti loa ki loku vino leia e fakafiafia ia le Atua mo tagata, o ano o lagiaki ki laakau ?

¹⁴ Ti na pati loa laakau fuli ki le laakau talatala : Au o sau kia matou !

¹⁵ Ti na tali loa le laakau talatala ki laakau fuli : Kapau e kotou loto maoki loa ke kotou fakanofo au ke sau kia koutou, ti kotou au nei o fakamalumalu i oku lalo ; kapau e leai, ti e natu loa se afi i le laakau talatala o tutu loa a sete o Lipane.

¹⁶ Ti ko leinei, pe na kotou fakanofo a Apimeleke ke sau, i se loto malie mo se loto maoki ? Pe na kotou agatonu kia Selupaale mo lona famili ? Pe na kotou fai kiate ia o fakatatau ki ana gaoi malilie na fai kia koutou ?

¹⁷ Na tau loku tamana o tupu ko koutou, na teiteiki e ia lona mauli ke saofaki ai koutou mei le lima o Matiane.

¹⁸ Ti ko leinei, i le aso nei, kua kotou tutuu loa ki aluga o fakafesagai ki le famili o loku tamana, kua kotou tamate ona vosa, tagata e tino fitu, i se fatu e tasi, kae kua kotou fakanofo ke sau ki Siseme a Apimeleke, vosa o lana fafine kaunaga, talie ko lokoutou taina aia.

¹⁹ Kapau e malie mo totonu kia koutou le nea leia kua kotou fai kia Apimeleke mo lona famili i le aso nei, ti ke kotou maua loa lokoutou fiafia ia Apimeleke, ti ke maua loa le fiafia o Apimeleke ia koutou.

²⁰ Kapau e leai ti ke ulu loa meia Apimeleke se afi o tutu a tagata o Siseme mo le fale o Milo, ti ke ulu loa mei tagata o Siseme mo le fale o Milo se afi, o tutu Apimeleke !

²¹ Ti na sola loa Sotame, ti na ano loa a ia o mumuni i Pela, talie na i loa a ia ki lona taina ko Apimeleke.

Tautea o Siseme ; mate veli o Apimeleke

²² Na pule loa Apimeleke i fetuu e tolu i Iselaele.

²³ Ti na kakau loa e le Atua se laumalie veli ke fakaveliveli ia Apimeleke mo le kakai o Siseme, ti na agatuu loa le kakai o Siseme kia Apimeleke,

²⁴ o tupu ke totogi ai le agaveli leia na fai ki vosa e tino fitu o Selupaale, ti ke vilo lolatou toto kia Apimeleke, lolatou taina, leia na tamate ia latou, ti mo le kakai o Siseme, leia na tokoi kiate ia o tamate ona fetaina.

²⁵ Na fakanonofo loa e le kakai o Siseme ni kau tagata ke lama ia i tumutumu o mauga, o kaia a koloa o latou fuli ala na fakalaka i olatou tafa i le ala. Ti na fakasa loa le nea lena kia Apimeleke.

²⁶ Na au loa Kaali, vosa o Epeti, mo ona fetaina ki Siseme. Na fanaki loa le kakai o Siseme kiate ia.

²⁷ Na lotou ano loa ki faisaga vite o le kakai o Siseme, o tau a fuai vite o tatau, ti na lotou fai loa ni fakafiafia. Na lotou ulu loa ki le fale tapu o lolatou atua, o kai mo inu i ai, ti na lotou fai loa ni masau fakaveli kia Apimeleke.

²⁸ Ti na pati loa Kaali, vosa o Epeti : Ko ai Apimeleke, ti ko ai Siseme, ke motou fakasausau ai kia Apimeleke ? Pe leaise ko le vosa a ia o Selupaale ? ti ko Sepule, pe leaise ko le kovana a ia leia na fakanofo e ia ke pule i le kolo ? Kotou fakasausau ki tagata a Amole, tamana o Siseme ; kae ko matou, kolea e motou fakasausau ai loa kia Apimeleke ?

²⁹ Kapau e tuku mai loa ke kau pule ki le kakai leinei, ti e kau fakaifo loa Apimeleke. Ti na pati loa a ia ke fakasa kia Apimeleke : Tanaki lau kau tau ke lasi, ti ke au loa ke ta tau !

³⁰ Na logo loa Sepule, kovana o le kolo, ki le nea na fakasa e Kaali, vosa o Epeti, ti na ita loa a ia.

³¹ Ti na kakau fakafufu loa e ia ni tagata ke ano kia Apimeleke, o pati : Ko leinei Kaali, vosa o Epeti, kua au mo ona fetaina ki Siseme, ti kua lotou lagai le kolo kiate koe.

³² Koia ke ke tuu ai loa i le pouli, a koe mo le kakai leia e nofo mo koe, ti ke mumuni loa i faisaga.

³³ I le usu, i le sopo o le laa, ke ke tuu ake loa ki aluga, o osoi le kolo. Ti ka ulu loa ki fafo a Kaali mo le kakai leia e nofo mo ia o tau kiate koe, ti ke ke fai loa kiate ia le nea leia e mafai e lou lima.

³⁴ Na tutuu ake loa Apimeleke mo le kakai katoa leia na nofo mo ia i le pouli o ano o mumuni i tafa o Siseme : Na vae fa loa e ia latou.

³⁵ I le temi leia na ulu ai loa ki fafo Kaali, vosa o Epeti, o tuu i mua o le matapa o le kolo, na mafuta ake loa ki aluga a Apimeleke mo le vaega leia na nofo mo ia mei lolatou mumuniaga.

³⁶ Na tio loa Kaali ki le kakai, ti na pati loa a ia kia Sepule : Ko leinei se kakai e ifo mei le tumutumu o le mauga. Na tali loa Sepule kiate ia : Ko le ata lena o mauga e ke pati ko ni tagata.

³⁷ Na toe pati loa Kaali : Ko tagata maoki ala e ifo mei le mauga lena e tuu i loto malie, ti e i ai se tasi kakai e au i le ala o le sene o le kau polofeta.

³⁸ Na tali loa Sepule : Kofea foki au masau malilie ? Na ke pati mai kia matou : Ko ai Apimeleke, ke motou fakasausau ai kiate ia ? Pe se ko le kakai lena na ke aga o katai ? Ano la i le temi nei o tau kiate ia !

³⁹ Na taki loa e Kaali le kakai o Siseme o tau kia Apimeleke.

⁴⁰ Na makeke loa Apimeleke, ti na sola loa Kaali i ona mua. Na toka api latou ala na lavelavea o mamate i mua o le kaku ki le matapa o le kolo.

⁴¹ Na tuu loa Apimeleke i Aluma. Kae na kapu loa e Sepule a Kaali mo ona fetaina i Siseme, o tapui loa e ia kia latou lalatou toe ulu ki le kolo.

⁴² I leia ake aso, na ulu loa le kakai o Siseme ki fafo o ano ki faisaga. Ti na fakasa loa le nea lena kia Apimeleke.

⁴³ Na too loa e Apimeleke lana kau tau, o vae tolu, ti na lotou mumuni loa i faisaga. I le temi leia na tio ai loa Apimeleke kua ulu ki fafo le kakai katoa o Siseme, na fakavilivili loa a ia o taui latou.

⁴⁴ Na fakatavili loa Apimeleke mo le vaega leia na nofo mo ia, o ano o tuu i mua o le matapa o le kolo, kae lolotoga osoi e la ake vaega e lua latou fuli ala na nonofo i faisaga, o tamate.

⁴⁵ Na taui loa e Apimeleke le kolo i le aso katoa ; ti na too loa e ia le kolo, ti na tamate loa e ia le kakai fuli leia na nofo i ai. Na maumaui loa e ia le kolo ti na laku loa e ia ki ai se patai.

⁴⁶ I le logo lena, na ano loa a kakai fuli o le tule o Siseme ki le nofolaga tau o le fale o le atua ko Peliti.

⁴⁷ Na fakasa loa kia Apimeleke kua fakatasi fuli a kakai o le tule o Siseme i le fale o le atua ko Peliti.

⁴⁸ Ti na pale loa Apimeleke ki aluga o le mauga o Tesalemoni, a ia mo le kakai katoa leia na nofo mo ia. Ti na too loa e Apimeleke le toki, o tuuti se laa o se laakau, ti na fa loa a ia ki ai o teki ki lona ua. Ti na pati loa a ia ki le kakai leia na nofo mo ia : Kua kotou tio ki le nea leia kua kau aga o fai, ke kotou fakavilivili loa o fai a ia !

⁴⁹ Ti na tasi tuuti loa e le kakai katoa lana laai laakau, o mulimuli ia Apimeleke. Na lotou fakatuu loa alatou laai laakau ki le fale o le atua ko Peliti, ti na lotou tutu loa le fale mo latou ala na nonofo i ai. Na mamate ai loa le kakai fuli o le tule o Siseme : ko lolatou api ko le tino afe, tagata mo fafine.

⁵⁰ Na ano loa Apimeleke ki Tepesi. Ti na taui loa e ia Tepesi, o maua.

⁵¹ Na tuu loa i loto malie o le kolo se tule makeke, ti kua sosola loa ki ai a tagata mo fafine fuli, ti mo aliki fuli o le kolo. Na lotou tapotapono loa a matapa kae lotou ano loa ki aluga o le tule.

⁵² Na ano loa Apimeleke o taui le tule, ti na kaku loa a ia ki tafa o le matapa ke tutu le tule.

⁵³ Kae na titi loa e se fafine le ulu o Apimeleke ki se tipii fatu o mafaa ai loa lona ulu.

⁵⁴ Ti na pati fakatavili loa Apimeleke ki le tama tupulaga leia na too ia ana masafu : ke ke tosoi lau seleta, ti ke ke fakaoki loku mauli, ke aua na lau loa kiate au : Na tamate a ia e le fafine. Na tooi loa e le tama tupulaga lana seleta kia Apimeleke, o mate ai loa a ia.

⁵⁵ I le tio o tagata a Iselaele kua mate loa Apimeleke, na lotou tasi ano loa ki lona kaiga.

⁵⁶ I le nea lena, na totogi loa e le Atua kia Apimeleke le veli leia na fai e ia ki lona tamana, o tamate ona vosa e tino fitu,

⁵⁷ Ti na totogi foki e ia ki le kakai o Siseme le veli katoa leia na lotou aga o fai. Na soko katoa loa le malaia leia na tuku kia latou e Sotame, vosa o Selupaale.