Tuifakamaau 7 - Tosi Tapu

Malo o Seteone i le kau Matiane

¹ Na tuu ake loa i le mafoata a Selupaale, leia ko Seteone, mo le kakai katoa leia na nofo mo ia, o fakatuu lolatou nofolaga i tafa o le vai ko Alote. Na tuu loa le nofolaga solia o Matiane i le fetuu noleto o Seteone, i le mauga o Mole, i le vaivailiua o Siseleele.

² Na pati loa le Eteleno kia Seteone : E api le kakai leia e nofo mo koe, ke kau tuku ai loa a Matiane ki ou lima ; e feala loa ke fia nealasi Iselaele, o pati : ko loku lima leia na saofaki ia au.

³ Fakasa loa le nea leinei ki taliga o le kakai : Ko le tagata leia e i mo lulu, ke mavae nei a ia i le mauga o Kalaate ki lona fale. Na toe liliu loa a tagata e tino lua tupu lua afe o le kakai ki olatou fale, kae toe loa a tino afe e kau agafulu.

⁴ Na pati loa le Eteleno kia Seteone : Koi toka api le kakai : Fakaifo loa latou ki le liua, ti e kau fai loa i le ganea lena se filifili kiate koe : Ko le tagata leia e kau pati atu loa kiate koe : ko ia leinei ke ano loa mo koe, e ano loa mo koe. Kae ko tagata fuli ala e kau pati atu loa kiate koe : ko ia leinei ke aua na ano loa mo koe, e leaise ano loa a ia mo koe.

⁵ Na ave loa e Seteone le kakai ki le liua, ti na pati loa le Eteleno kia Seteone : Ko latou fuli ala e epo ia loa le vai ki le alelo ofaipe le inu a le kuli, e ke vaei kese loa latou fuli ana meia latou ala e tutuli loa o inu.

⁶ Ko latou ala na asu ia loa le vai ki olatou lima o ave ki le gutu ke epo na api loa ko tino lelau e tolu, kae na tutuli loa le toega fuli o le kakai o inu.

⁷ Na pati loa le Eteleno kia Seteone : E kau saofaki loa koutou ki tino lelau e tolu ana na epo ia le vai, ti e kau tuku atu loa Matiane ki ou lima. Ke tasi ano loa le toega fuli o le kakai ki lona kaiga.

⁸ Na too loa a nea kai a le kakai mo ana fakatagi pupusi. Ti na kakau loa e Seteone a tagata fuli o Iselaele ke tasi ano ki lona falela, kae na taofi loa e ia a kau tagata e tino lelau tolu. Na tuu loa le nofolaga tau o Matiane i lalo o Seteone i le vaivailiua.

⁹ Na pati loa le Eteleno kia Seteone i le po lena : Tuu ki aluga, ti ke ifo ki le nofolaga o Matiane, talie kua kau tuku atu a ia ki ou lima.

¹⁰ Kapau e ke i loa i le ifo toka tasi ki le nofolaga tau o Matiane, ti ke ifo loa mo lau tagata fakasausau ko Pula.

¹¹ E ke fakalogo loa ki le nea leia e lotou lau loa, ti ka oki loa a ia, e makeke loa ou lima : Koia ke ke ifo nei ki le nofolaga tau ! Na ifo loa a Seteone mo lana tagata fakasausau ko Pula, o kaku ki le uluaki kau leo o le nofolaga.

¹² Na mafola loa Matiane, mo Amaleke, ti mo le kakai o le Esite i le vaivailiua, ofaipe se ao seseivaka i lolatou api, ti na lasi olatou kamelo ofaipe le one o le mata tai.

¹³ I le temi na kaku ai loa Seteone ki le nofolaga o Matiane, ko leinei na fakamatala loa e se tagata se moe miti ki lona soa. Na pati a ia : na kau fai ia se moe miti. Ti na kau tio e teka se fa pane paku i le nofolaga solia o Matiane, ti na au a ia o tau ki le falela, o sigai a ia mo veuki a ia.

¹⁴ Na tali loa lona soa, o pati : Ko lona uiga e tasi : ko le seleta lena a Seteone, vosa o Soasi. Kua tuku e le Atua a Matiane mo le nofolaga solia katoa ki lima o Seteone.

¹⁵ I le logo a Setone ki le fakamatala o le moe miti mo lona uiga, na punou loa a ia ki le kele o fakafetai ki le Atua. Ti na toe liliu loa a ia ki le nofolaga tau o Iselaele, o pati : Kotou tutuu ki aluga, talie kua tuku e le Eteleno ki okoutou lima le nofolaga tau o Matiane.

¹⁶ Na vae tolu loa e Seteone le kau tagata e tino lelau tolu. Ti na soli loa e ia ki tagata fuli ni talai manu, mo ni gaati ipu, ti mo ni vavai malama i loto o ipu.

¹⁷ Na pati loa a ia kia latou : E kotou tio mai loa kiate au, ti e kotou faifaitaki mai loa kiate au. Ka kau kaku loa ki tafa o le nofolaga tau, ti kotou fai loa le nea leia e kau fai ia loa.

¹⁸ Ka kau pupusi loa le talai manu, o tatau mo latou ala e nonofo loa mo au, ti kotou toe pupusi ia loa akoutou talai manu i le takatakai katoa o le nofolaga tau ti ke kotou kalaga loa : Ki le Eteleno mo Seteone !

¹⁹ Na kaku loa Seteone mo le tino lelau tagata leia na nofo mo ia ki tafa o le nofolaga o Matiane i mua o le vaeluapo, i le temi leia na fetogi ai loa le kau leo. Na lotou pupusi loa a talai manu ti na lotou titi ia loa a gaati ipu ala na lotou too i olatou lima.

²⁰ Ti na fakatatau ake loa a la ake vaega e lua. Na lotou too fuli loa a fa malama i olotou lima sema ti mo talai manu i olotou lima atamai, ti na lotou kalaga loa : Ke tau ki le Eteleno mo Seteone !

²¹ Na lotou tasi tuu loa i lona tuuaga o takatakai le nofolaga tau o Matiane. Kae i loto o le nofolaga o Matiane, na oso saele loa le kakai, mo kalaga, ti mo sosola.

²² I le temi katoa na pupusi ai loa a talai manu e le kau tagata e tino lelau tolu, na fai loa e le Eteleno i le nofolaga tau o Matiane ke fetauaki le kau Matiane o mamate. Na sola loa le toega o le kau Matiane o kaku ki Pete-Sita i le ala o Selela, ti toe kaku ki le kolo ko Apele-Meola, i tafa o Tapati.

²³ Na fakatasi loa a tagata o Iselaele, mo la o Nefetali, mo la o Asele, ti mo la o Manase o tuli Matiane.

²⁴ Na kakau loa e Seteone ni tagata avelogo ki le mauga katoa o Efalaimi, o pati : Ke kotou ifo mai o fakatuu Matiane ti ke kotou tapono kia latou a ala o le Solotane o kaku ki Pete-Pala. Ti na fakatasi loa a tagata fuli o Efalaimi ti na lotou tapono loa a ala i le Solotane o kaku ki Pete-Pala.

²⁵ Na lotou fakapilisoni loa a sau e lua o Matiane ko Olepi mo Sepi ; ti na lotou tamate loa Olepi i le fatu o Olepi, ti mo Sepi i le tatauaga vino o Sepi. Na lotou soko atu loa le tuli o le kau Matiane. Ti na lotou ave loa a ulu o Olepi mo Sepi kia Seteone i le fetuu uesite o le Solotane.