Tuifakamaau 6 - Tosi Tapu

Seteone, tui fakamaau o Iselaele

¹ Na fai loa e fanau a Iselaele le nea e veli ki mata o le Eteleno, ti na tuku loa latou e le Eteleno ki lima o Matiane, i le lolotoga o fetuu e fitu.

² Na makeke loa le lima o Matiane ki Iselaele. O tupu ko Matiane, na fai loa e fanau a Iselaele ni pu i lalo o mauga, ti mo ni ana i potu fakakilakila o mauga.

³ I temi ala na to ai loa e fanau a Iselaele olatou faisaga, na pale ake loa Matiane, mo Amaleke ti mo ni kakai o le toafa, o taui Iselaele.

⁴ Na lotou fakatuu loa lolatou nofolaga tau i mua o Iselaele, ti na lotou maumaui loa a faisaga fuli o le fenua o kaku ki Kasa. Na leaise lotou toe tuku loa i Iselaele se nea kai, mo se ovi, mo se pipi, ti mo se asino.

⁵ Talie na lotou pale loa mo alatou kau manu ti mo olatou falela, na lotou ano ofaipe se ao seseivaka, na lotou api lasi ai, latou mo olatou kamelo, ti na lotou au loa ki le fenua ke maumaui a ia.

⁶ Na mativa lasi ai Iselaele o tupu ko Matiane, ti na lotou tagi loa ki le Eteleno.

⁷ I temi fuli ala na tagi ai loa a fanau a Iselaele ki le Eteleno o tupu ko Matiane,

⁸ Na tuku loa e le Eteleno se polofeta ki fanau a Iselaele. Na pati loa a ia kia latou : Ko leinei le folafola a le Eteleno, Atua o Iselaele : Na kau fakamavae koutou mei Esipito ti na kau fakamavae koutou mei le fale o le popula.

⁹ Na kau saofaki koutou mei le lima o le kau Esipito ti mo le lima o latou fuli ala na fakamamae ia koutou. Na kau kapu latou i okoutou mua ti na kau soli kia koutou lolatou fenua.

¹⁰ Na kau pati kia koutou : Ko au ko le Eteleno, lokoutou Atua : Ke aua na kotou fakaapaapa loa ki atua o le kau Amole i lolatou fenua leia ka kotou nofo ai loa. Kae na leaise kotou fakalogo loa ki loku leo.

Kalagai o Seteone

¹¹ Ti na au loa le aselo o le Eteleno, ti na tonatona loa a ia i lalo o le sene o Ofala, leia e tuu i le kele o Soasi, mei le faasiga o Apiesele. Na sasa loa e Seteone, vosa o Soasi, le fulumeto i loto o le fa tane tanaki vino, o tupu ke aua na iloa e Matiane.

¹² Na sa loa le aselo o le Eteleno kiate ia, o pati kiate ia : E nofo le Eteleno mo koe, tagata loto makeke mo toa !

¹³ Na pati loa a Seteone kiate ia : Ei loku Aliki, kapau e nofo le Eteleno mo matou, kolea e soko ai loa a nea fuli anei kia matou ? Ti kofea a nea fakamanamana fuli ala na fakamatala mai kia matou e omatou tamana, o pati : Pe na leaise fakamavae matou e le Eteleno mei Esipito ? I le aso nei kua tiaki matou e le Eteleno, ti kua tuku e ia matou ki lima o Matiane.

¹⁴ Na tagaki loa le Eteleno kiate ia, o pati : Ano mo le makeke lena e nofo mo koe, ti e ke saofaki loa Iselaele i le lima o Matiane. Pe leaise ko au leia e kakau ia a koe ?

¹⁵ Na tali loa Seteone kiate ia : Ei loku Aliki, e kau saofaki loa aia kilea ? Ko leinei e mativa toka tasi loa loku famili i le faasiga o Manase, ti ko au ko le mulimuli o le famili o loku tamana.

¹⁶ Na pati loa le Eteleno kiate ia : Kae e kau nofo loa mo koe ti e ke tamate loa Matiane ofaipe se tagata e tasi.

¹⁷ Na tali loa Seteone kiate ia : Ko leinei, kapau kua kau maua se kalasia i ou mua, ke ke tuku mai loa kiate au se fakamailoga ke fakamaoki ai ko koe leia e masau mai kiate au.

¹⁸ Ke aua na ke fakamamao loa i le ganea leinei, o kaku ki laku toe liliu mai loa kiate koe i leinei, o aumai kiate koe laku moliga o tuku ki ou mua. Na tali loa le aselo o le Eteleno : E kau nofo loa o kaku ki lau toe liliu mai.

¹⁹ Na ano loa a Seteone o teuteui se uviki koti ti mo ni keke sala fakatupu ki ni kilo falina e kau tolu. Na fafao loa e ia le kanoi manu ki se kete ti mo le sua ki se kulo, ti na ano loa a ia ki lalo o le sene, o momoli a nea ana ki le aselo o le Eteleno.

²⁰ Na pati loa le aselo o le Atua kiate ia : Too le kanoi manu mo pane sala fakatupu, ti ke teki latou ki aluga o le fatu leinei, ti ke liligi le sua i aluga. Ti na fai loa e Seteone ki ai.

²¹ Na falo loa e le aselo o le Eteleno le tokotoko leia na too e ia i lona lima o fakalave lona tumutumu ki le kanoi manu mo pane sala fakatupu. Ti na mafuta loa le afi i le fatu, o tutu le kanoi manu mo pane sala fakatupu. Ti na puli loa le aselo o le Eteleno i ona mata.

²² Na matala loa Seteone ko le aselo o le Eteleno. Ti na pati loa Seteone : Malaia kiate au ! Aliki Eteleno ! talie kua kau tio mata ki le aselo o le Eteleno.

²³ Ti na pati loa le Eteleno kiate ia : Nofo i le tokamalie, aua na ke tuania se nea, talie e leaise ke mate loa.

²⁴ Ti na fakatuu loa e Seteone i le ganea lena se aletale ki le Eteleno, ti na tuku loa e ia ki ai le igoa ko le Eteleno o le tokamalie : koi tuu a ia i le aso nei i Ofala o Apiesele.

Maumaui o le aletale o Paale

²⁵ I le pouli lena, na pati loa le Eteleno kia Seteone : Too loa le pipi tagata muli o lou tamana ti mo se tasi ake pipi tagata e fetuu fitu. Maumaui loa le aletale o Paale leia na fakatuu e lou tamana, ti ke sele loa ki lalo le pou tapu leia e tuu i ona tafa.

²⁶ Ti ke toe fakatuu loa i le tumutumu o le ganea taualuga lena, se aletale ki le Eteleno, lou Atua. Ti e ke too loa le lua o pipi tagata, ti e ke fai loa se failaulau, ki le fafie o le pou tapu leia na ke aga o tuuti.

²⁷ Na too loa e Seteone ni tagata e tino agafulu i ana tagata fakasausau, ti na fai loa e ia le nea leia na pati ki ai le Eteleno ; kae na leaise fai loa e ia a ia i le ao, na fai loa e ia a ia i le pouli, o tupu na tuania ia e ia lona famili mo le kakai o le kolo.

²⁸ I le ala ake a le kakai o le kolo i le usu, na lotou tio loa kua maumau le aletale o Paale, ti kua tuuti le pou tapu leia na tuu i ona tafa, ti kua fai se failaulau ki le lua o pipi tagata i aluga o le aletale leia kua fakatuu i ai.

²⁹ Na lotou fevesiliaki loa ia latou pe ko ai leia na fai ia le nea lena ? Na lotou fai loa ni fakavesili mo ni afaafa. Na pati ake loa kia latou : Ko Seteone, vosa o Soasi, leia na fai ia le nea lena.

³⁰ Ti na pati loa le kakai o le kolo kia Soasi : Aumai lou vosa ki fafo ke tamate, talie na maumaui e ia le aletale o Paale ti na tuuti e ia le pou tapu leia na tuu i ona tafa.

³¹ Na tali loa Soasi kia latou fuli ala na tutuu i ona tafa : Pe ko koutou ala e tonu ke puipui ia Paale ? Pe ko koutou ala e tonu ke saofaki ia a ia ? Ko le tagata leia e puipui ia loa Paale e mate loa a ia i mua o le usu apogipogi. Kapau ko Paale ko se atua, ti ke puipui loa e ia a ia totonu, talie ko lona aletale leia na maumaui.

³² I le aso lena, na tuku loa kia Seteone le igoa ko Selupaale, o tupu ko le pati a Soasi : Ke puipui loa e Paale a ia totonu, talie ko lona aletale leia na maumaui.

³³ Na fakatasi loa Matiane, mo Amaleke, ti mo le kakai leia nofo falela i le Esite, ti na lotou fakalaka loa i le Solotane o fakatuu lolatou nofolaga tau i le vaivailiua o Siseleele.

³⁴ Na kofu loa e Seteone le Laumalie o le Eteleno ; ti na pupusi loa e ia le fakatagi pupusi o fakatasi le kakai o Apiesele ke muli iate ia.

³⁵ Na kakau loa e ia ni tagata avelogo ke ano i le fenua katoa o Manase o kalagai a tagata ke muli iate ia. Na toe kakau foki e ia mo ni iki tagata avelogo ke ano ki le fenua o Asele, mo Sapulone, ti mo Nefetali, ala na pale ake loa o fakafelavei kia latou.

³⁶ Na pati loa Seteone ki le Atua : Kapau e ke loto ke saofaki Iselaele e loku lima, o mulimuli ki le nea na ke pati ki ai, ko leinei :

³⁷ E kau folasi loa se fului ovi i le sasaaga fulumeto. Kapau, i le pouli, e vilo loa le sasau ki le fului ovi tefua, kae malo loa le kele katoa i ona tafatafa, ti e kau iloa loa e ke saofaki ia loa Iselaele ki loku lima, ofaipe lau pati.

³⁸ Ti na soko loa le nea lena. I le pogipogi usu, na tuu ake loa Seteone i le mafoata, o tatau le fului ovi, ti na fakaapele loa e ia se ipu ki le vai o le sasau.

³⁹ Na toe pati loa Seteone ki le Atua : Ke aua se ke ita loa kiate au, mo kapau e kau toe fai loa kiate koe le kole fakaoki leinei : Ke malo tefua loa le fului ovi, kae susu fuli loa le kele i le sasau.

⁴⁰ Ti na fai loa e le Eteleno ki ai i le po lena. Na malo loa le fului ovi tefua, kae na susu katoa loa le kele i le sasau.