Tuifakamaau 4 - Tosi Tapu

Malo o Tepola mo Palaki i le kau Kanaane

¹ I le sili o le mate o Euti, na toe fai loa e fanau a Iselaele le nea leia e veli ki mata o le Eteleno.

² Ti na tuku loa latou e le Eteleno ki lima o Sapini, sau o Kanaane, leia na nofo i Atesoa. Ko le pule o lana solia ko Sisela, ti na nofo a ia i Aloseti-Koimi.

³ Na maua e Sapini ni saliote ukamea e kau lelau iva, ti na fakamamae lasi ai e ia a fanau a Iselaele i fetuu e kau lua. Ti na tagi loa fanau a Iselaele ki le Eteleno.

⁴ I le temi lena na tui fakamaau i Iselaele a Tepola, fafine polofeta, avaga a Lapitoti.

⁵ Na nofo a ia i lalo o le palemie o Tepola, i le vasa o Lama mo Petele, i le mauga o Efalaimi ; ti na pale ake loa kiate ia a fanau a Iselaele ke fakamaaui latou.

⁶ Na kakau loa e Tepola ke nake kiate ia Palaki, vosa o Apinoame, mei Ketesi-Nefetali, ti na pati loa a ia kiate ia : Ko leinei le fakatotonu kua tuku mai kiate koe e le Eteleno, Atua o Iselaele. Ano ki le mauga o Tapole, o too ni tagata e tino agafulu afe i fanau a Nefetali mo fanau a Sapulone.

⁷ E kau toso mai loa kiate koe, ki le liua o Kisoni, Sisela, pule o le solia a Sapini, mo ana saliote ti mo ana kau solia, ti e kau tuku loa a ia ki ou lima.

⁸ Na pati loa Palaki kiate ia : Kapau e ke au loa mo au, ti e kau ano loa ; kae kapau e leaise ke au loa mo au, ti e leaise kau ano loa.

⁹ Na tali loa Tepola kiate ia : E kau ano loa mo koe ; kae e leaise ke maua ia loa se kololia i le tau leia ka ke ano loa o fai, talie e tuku loa e le Eteleno a Sisela ki lima o se fafine. Ti na tuu ake loa Tepola ki aluga o ano mo Palaki ki Ketesi.

¹⁰ Na pati loa Palaki ke nake ki Ketesi a Sapulone mo Nefetali ; na saele loa se kau tagata e tino agafulu afe i ona muli, ti na ano loa Tepola mo ia.

¹¹ I tafa o Ketesi na nofo ai Epeli, le tagata Kenia. Na mavae loa a ia mei fanau o Kenia, vosa o Opapi, tamana o le avaga o Moisese, ti na fakatuu loa e ia lona falela i tafa o le sene o Saananimi

¹² Na fakasa loa kia Sisela kua pale Palaki, vosa o Apinoame, ki le mauga o Tapole.

¹³ Ti na fakatasii loa e Sisela ana saliote ukamea e kau lelau iva mo lana solia katoa i Aloseti-Koimi, ti na lotou mavae loa i lena o ano ki le liua o Kisoni.

¹⁴ Ti na pati loa Tepola kia Palaki : Tuu ki aluga, talie ko leinei le aso leia e tuku ai loa e le Eteleno a Sisela ki ou lima. E saele le Eteleno i ou mua. Ti na ifo loa Palaki mei le mauga o Tapole, ti na mulimuli loa iate ia se kau tagata e tino agafulu afe.

¹⁵ Na veuki loa e le Eteleno i mua o Palaki, ki le mata o le seleta, Sisela, mo ana saliote fuli ti mo lona nofolaga solia katoa. Na ifo loa Sisela mei lana saliote, o sola lalo.

¹⁶ Na tuli loa e Palaki a saliote mo le solia a Sisela o kaku ki Aloseti-Koimi ; ti na vilo loa le solia katoa a Sisela ki le mata o le seleta : na leaise toe sao fua se tagata e tasi.

¹⁷ Na sola lalo loa Sisela ki le falela o Saele, avaga o Epele, tagata Kenia ; talie na tokamalie Sapini, sau o Atesoa, mo le fale o Epele, tagata kenia.

¹⁸ Na ulu loa Saele ki fafo o fakafelavei kia Sisela, o pati kiate ia : Ulu mai, ei loku aliki, ulu mai ki loku loto fale, aua se ke i ! Na ulu loa Sisela ki le falela o Saele, ti na ufiufi loa e ia Sisela ki se kie kafu.

¹⁹ Na pati loa Sisela kiate ia : e kau kole atu kiate koe, ke ke soli mai kiate au se ga vai ke kau inu, talie kua kau mate i le fia inu ! Ti na fakamavaa loa e Saele le utele sua manu, ti na soli loa e ia ke inu Sisela, ti na toe ufiufi loa e ia a ia.

²⁰ Na toe pati loa Sisela kia Saele : Ke ke tuu loa i mua o le falela ; ti kapau e au loa se tasi o vesili atu kiate koe : Pe i ai se tasi i leinei ? Ke ke tali loa kiate ia : leai !

²¹ Na gaegae veli ai Sisela, ti na moe mate loa a ia. Na taaki loa e Saele se pike o le falela, ti na kukumi loa e lona lima se amale, ti na fakafeofi fakaeteete loa a ia kia Sisela, ti na tutuki loa e ia le pike ki lona ulu o fakamau a ia ki le kele. Ti na mate ai loa Sisela.

²² Kae ko Palaki, i lana tuli Sisela, na kaku loa ki le falela o Saele. Na ulu ake loa Saele ki fafo o fakafelavei kiate ia, o pati : Au, ti e kau fakasa atu loa kiate koe le tagata leia e ke afa ia. Na ulu loa Palaki ki le falela, o tio kia Sisela kua tuku mate i le kele, mo le pike o le falela kua ulu i lona ulu.

²³ I le aso lena, na fakagaegae loa e le Atua a Sapini, sau o Kanaane, i mua o fanau a Iselaele.

²⁴ Ti na asilisili mamafa loa le lima o fanau a Iselaele kia Sapini, sau o Kanaane, o kaku ki lalatou maumaui katoa Sapini, sau o Kanaane.