Tuifakamaau 3 - Tosi Tapu

¹ Ko nei a puleaga ala na tuku loa e le Eteleno ke nonofo i le fenua, o tupu ke asiasii ai latou fuli ala na leaise kau ki tau fuli o Kanaane.

² Na loto loa le Eteleno ke tau a tautupu foou o Iselaele, o tupu ke lotou ako ia le fai o le tau, tafito ala na leikiaise kau ki se tau i mua.

³ Ko latou ala na nonofo loa i le fenua : ko kakai o puleaga e lima o le kau Filisitini, mo le kau Kanaane fuli, mo le kau Sitone, ti mo le kau Evi ala na nonofo i le mauga o Lipane, mei le mauga o Paale-Elemoni o kaku ki le matapa o Amate.

⁴ Na fakaaoga loa e le Eteleno a puleaga ana ke asiasii ai a fanau a Iselaele, ke iloa ai pe lotou fia fakalogo maoki ki folafola a le Eteleno ala na tuku e ia ki olatou tamana ia Moisese.

⁵ Ti na nonofo loa fanau o Iselaele i loto malie o le kau Kanaane, mo le kau Iti, mo le kau Amole, mo le kau Pelesi, mo le kau Evi, ti mo le kau Sepusi.

⁶ Ti na avaga loa a vosa o Iselaele mo taineliki o puleaga ana. Ti na lotou soli loa olatou taineliki totonu ke avaga mo vosa o Kanaane, ti na lotou tausi loa ki olatou atua.

Malo o Oteniele i le kau Mesopotamia

⁷ Na agaveli loa fanau a Iselaele ki le Eteleno, ti na lotou galoi ia loa le Eteleno, lolatou Atua, kae na lotou atolasio loa kia Paale mo Akelase.

⁸ Na malaga loa le ita o le Eteleno ki Iselaele, ti na fakatau loa e ia latou ki lima o Kusani-Liseataimi, sau o Mesopotamia. Na popula loa fanau a Iselaele, na lotou popula loa kia Kusani-Liseataimi i le lolotoga o fetuu e valu.

⁹ Ti na tagi loa fanau a Iselaele ki le Eteleno, ti na soli loa e le Eteleno ki fanau a Iselaele se fakamauli ke saofaki ia latou, ko Oteniele, vosa o Kenasi, taina lua o Kalepo.

¹⁰ Na ifo loa le Laumalie o le Eteleno kiate ia. Ti na liliu loa a ia ko le tui fakamaau o Iselaele, ti na ano loa a ia o tau. Na tuku loa e le Eteleno ki ona lima a Kusani-Liseataimi, sau o Mesopotamia, ti na tamate loa e lona lima Kusani-Liseataimi.

¹¹ Na fimalie loa le fenua i le lolotoga o fetuu e kau fa. Ti na mate loa Oteniele, vosa o Kenasi.

Malo o Euti i Moape

¹² Na toe agaveli loa fanau a Iselaele ki le Eteleno ; ti na fakamakeke loa e le Eteleno a Ekeloni, sau o Moape, ke malo i Iselaele, talie na fai loa e fanau a Iselaele le nea na veli ki mata o le Eteleno.

¹³ Ti na fakatasi loa Ekeloni mo vosa o Amone ti mo le kau Amaleke, ti na ano loa a ia o tau ki Iselaele. Na malo loa a ia i Iselaele ti na maua loa e ia Seliko.

¹⁴ Ti na popula loa a fanau a Iselaele kia Ekeloni, sau o Moape, i le lolotoga o fetuu e kau agafulu tupu valu.

¹⁵ Na fetagisi loa fanau a Iselaele ki le Eteleno, ti na soli loa e le Eteleno kia latou se fakamauli, ko Euti, vosa o Kela, tagata Pesamino, leia na sema. Na kakau loa e fanau a Iselaele a Euti ke ano o ave ni moliga kia Ekeloni, sau o Moape.

¹⁶ Na fai loa e Euti kiate ia se seleta mata lua, ti na tukilima katoa lona loa. Ti na sunuki loa e ia le seleta ki lona kilipipi, i loto o lona kofu, o lave ki lona tega atamai.

¹⁷ Ti na ano loa a ia o momoli a moliga kia Ekeloni, sau o Moape. Kae ko Ekeloni ko se tagata na peti lasi ai.

¹⁸ I le oki o lana soli a moliga, na toe liliu loa a ia mo tagata ala na too ia a moliga.

¹⁹ Na lotou kaku loa ki taulaatua fatu ala na tuu o feofi ki Kilikale, ti na toe liliu loa Euti, o pati ki le sau : ei sau, e kau au mo se logo fakafufu kiate koe. Ti na pati loa le sau : ke fakalologo ! Ti na ulu loa ki fafo latou fuli ala na nonofo mo ia i le fale.

²⁰ Na ano loa Euti kiate ia kae lolotoga ekeeke loa a ia i lona kogafale fakamokomoko leia na tuu i le fata. Na pati loa Euti kiate ia : E kau au mo se folafola mei le Atua kiate koe. Ti na malaga loa Ekeloni mei lona ekeekeaga.

²¹ Ti na fafa loa le lima sema o Euti ki le seleta, o tosoi a ia mei lona fetuu atamai, ti na tooi loa e ia le seleta ki le manava o Ekeloni.

²² Na ulu loa le seleta katoa ki loto, o puli ai mo le kau o le sele, talie na tapono loa e le gako le sele, ti na leaise tosoi loa e ia le sele mei le manava.

²³ Na ulu loa Euti ki fafo i le matapa o le muli fale, kae na tapotapono mua e ia a matapa o le kogafale, o lokai.

²⁴ I le oki o lona mavae, na ano loa a tagata fakasausau o le sau ki le kogafale, ti na lotou tio loa kua lokai a matapa o le kogafale fakamokomoko. Ti na lotou pati loa : e lagi lolotoga faikauga le sau i loto.

²⁵ Ti na lotou talitali loa o fualoa : ti ko leia na leaise fakamavaa loa e le sau le kogafale malolo, na lotou too loa le kalavi ti na lotou fakamavaa loa le kogafale, ti ko leinei kua tuku i le kele lolatou sau, kua mate a ia.

²⁶ I le temi fuli lena, na sola loa Euti. Ti kua fakalaka foki a ia i taulaatua fatu, ti na ano loa a ia ki Seila.

²⁷ I lana kaku ki Seila, na pupusi loa e ia le fakatagi pupusi i le mauga o Efalaimi ke tanaki ai a fanau a Iselaele ki le tau. Ti na nofo loa a ia ko lolatou pule, ti na lotou ifo loa mei le mauga.

²⁸ Na pati loa a ia kia latou : Ke kotou muli mai iate au, talie kua tuku e le Eteleno ki okoutou lima le kakai o Moape, lokoutou fili. Na lotou muli loa ia Euti, ti na lotou too ia loa i le fenua o Moape a aleso o le Solotane, ti na leaise lotou tuku ia loa se tasi ke toe fakalaka i le vaitafe.

²⁹ I le aso lena, na lotou tamate loa le tino agafulu afe o tagata o Moape, tagata makeke mo toa fuli, ti na leaise toe sao loa se fa toka tasi.

³⁰ I le aso lena, na fakalogo loa Moape ki le lima o Iselaele. Ti na tokamalie loa le fenua i fetuu e kau valu.

Malo o Samika i le kau Filisitini

³¹ Na soko mai loa kiate ia Samika, vosa o Anate. Na tamate loa e ia a tagata e tino lelau e ono o le kau Filisitini ki se ukamea suki pipi, ti na saofaki loa e ia Iselaele.