Tuifakamaau 21 - Tosi Tapu

Toe lagai o Pesamino

¹ Na fai loa e tagata o Iselaele se fakapapau i Misipa, o pati : Ke aua na soli loa e se tasi o tatou lona taine ke avaga mo se tagata o Pesamino.

² Na ano loa le kakai ki Petele, ti na lotou nonofo loa i ai i mua o le Eteleno o kaku ki le afiafi. Na lotou siki loa olatou leo, o tagi mamae,

³ ti na lotou pati loa : Ei Eteleno, Atua o Iselaele, kolea kua soko ai le nea leinei i Iselaele, talie kua puli i le aso nei se faasiga e tasi o Iselaele ?

⁴ I le apogipogi ake, na tuu ake loa le kakai ki aluga i le mafoata ; ti na lotou fakatuu loa se aletale i le ganea lena, ti na lotou momoli loa ni failaulau mo ni sakilifisio fakafetai.

⁵ Na pati loa a fanau a Iselaele : Ko ai i faasiga fuli o Iselaele na leaise pale loa ki le fakatasiga i mua o le Eteleno ? Talie na fai loa se fakapapau o uiga mo le tagata leia e leaise pale loa ki le Eteleno i Misipa, o pati : E tautea loa a ia ki le mate.

⁶ Na logoi loa e fanau a Iselaele se fakasemala o uiga mo lolatou taina ko Pesamino, ti na lotou pati loa : I le aso nei kua motusi loa le faasiga e tasi i Iselaele.

⁷ Kolea ke tou aga loa o fai ke maua ai ni avaga kia latou ala na mauuli, talie kua tou fakapapau i le Eteleno ke aua na soli loa kia latou o tou taineliki ke avaga mo latou.

⁸ Ti na lotou pati loa : Pe e i ai se famili i faasiga o Iselaele leia na leaise pale loa ki mua o le Eteleno i Misipa ? Ti ko leinei, na leaise pale loa se tasi o Sapesi i Kalaate ki le fakatasiga.

⁹ Na fai loa le lau o le kakai, ti na leaise maua loa se fa toka tasi o Sapesi i Kalaate i le ganea lena.

¹⁰ Ti na kakau loa e le fakatasiga ni tagata toa e tino lua afe ki Sapesi, mo le fakatotonu leinei : Kotou ano, ti kotou tamate loa ki le seleta le kakai fuli o Sapesi i Kalaate, mo fafine mo toe.

¹¹ Ko leinei le nea leia e kotou fai loa : Ke kotou tamate loa a tagata fuli mo fafine fuli ala kua momoe mo se tagata.

¹² Na lotou maua loa i le kakai o Sapesi i Kalaate ni taineliki taupoou e tino lelau fa ala na leikiaise momoe mo se tagata, ti na lotou ave loa latou ki le nofolaga i Silo, leia e tuu i le fenua o Kanaane.

¹³ Na kakau loa e le fakatasiga katoa ni tagata avelogo ke ano o masau ki vosa o Pesamino ala na nonofo i le utu o Limoni, ti mo fakasa kia latou le tokamalie.

¹⁴ I le temi lena, na toe au loa a vosa o Pesamino, ti na soli loa kia latou a fafine ala na fakamauuli i fafine o Sapesi i Kalaate. Kae na leaise tofu loa a tagata fuli.

¹⁵ Na logoi loa e le kakai se fakasemala o uiga mo Pesamino, talie kua fai loa e le Eteleno se pu i faasiga o Iselaele.

¹⁶ Na pati loa le pule o Iselaele : Kolea e tonu ke tou aga loa o fai ke maua ai ni avaga kia latou ala koi sala avaga i vosa o Pesamino, talie kua tamate a fafine o Pesamino ?

¹⁷ Ti na lotou pati loa : Ke taupau loa e vosa o Pesamino ala kua sao lolatou tofiga, o tupu ke aua na soloi loa le igoa o se faasiga e tasi i Iselaele.

¹⁸ Kae e leaise feala ke tou soli loa o tou taineliki ke avaga mo latou, o tupu ko le fakapapau leia na tou fai, o pati : Ke malaia leia e soli ia loa lona taine ke avaga mo se tagata o Pesamino.

¹⁹ Ti na lotou pati loa : Ko leinei e fai i fetuu fuli se aso lasi o le Eteleno i Silo, leia e tuu i le potu noleto o Petele, i le fetuu esite o le ala leia e pale ki Petele i Siseme, i le saute o Lepona.

²⁰ Ti na lotou tuku loa le fakatotonu leinei ki vosa o Pesamino : ke kotou ano loa o mumuni i faisaga vite.

²¹ Ti ke kotou lamalama loa i ai le temi leia e ulu ai loa ki fafo a taineliki o Silo o mako, ke kotou mavae loa mei faisaga vite, ti ke kotou tasi too loa sana taine i taineliki o Silo ke avaga loa mo ia, ti ke kotou liliu loa ki le fenua o Pesamino.

²² Kapau e au loa olatou tamana pe ko olatou tuagaane o tagi mai kia matou, e motou pati loa kia latou : Ke kotou tuku mai latou kia matou, talie na leaise motou maua ia se fafine ki le tagata taki toka tasi i le tau. E leaise ko koutou ala na soli ia latou kia latou ; koia e leaise kotou sala ai ki lakoutou fakapapau.

²³ Ti na fai loa ki ai a vosa o Pesamino : na lotou too loa a taineliki ala na aoga kia latou i taineliki ala na mako i Silo, ti na lotou ave loa latou. Na lotou toe liliu loa ki lolatou fenua, ti na lotou toe lagai loa olatou kolo, o lotou nonofo loa i ai.

²⁴ Ti na mavete loa a fanau a Iselaele, o tasi ano ki lona faasiga mo lona famili, ti na lotou toe liliu loa ki lona tofiga.

²⁵ I le temi lena, na leaise sau i Iselaele. Na tasi fai e le tagata le nea leia na malie kiate ia.