Tuifakamaau 20 - Tosi TapuTautea o Pesamino o teitei ke puli 1 Ko fanau fuli o Iselaele, mei Tane o kaku ki Pele-Sepaki ti mo le fenua o Kalaate, na fakatasi loa i se loto e tasi i mua o le Eteleno, i Misipa. 2 Na kau loa a pule mo tagata o faasiga fuli o Iselaele i le fakatasiga lena a le kakai o le Atua : Ko tagata tau e tino lelau fa afe na poto i tau seleta. 3 Ti na logo loa a vosa o Pesamino kua pale ki Misipa a fanau a Iselaele. Na pati loa a fanau a Iselaele : ke kotou fakamatala, pe na soko feaki le agaveli lena ? 4 Ti na masau loa le tagata levita, avaga o le fafine leia na mate, o pati : Na kau kaku mai loa mo loku avaga ki Kipea o Pesamino, ke nofo ai i le pouli. 5 Na tutuu ake loa ni tagata o Kipea ke fai kiate au se nea fakalumaluma, ti na lotou takatakai loa i le pouli le fale leia na kau nofo ai. Ko au leia na lotou loto ke tamate, kae na lotou fakavalevale loa ki loku avaga, o kaku ki lona mate. 6 Na kau too loa loku avaga, ti na kau tuutuu loa a ia o fakamomoli ki faasiga fuli o Iselaele. Talie kua lotou fai se nea fakalialia mo fakalumaluma i Iselaele. 7 I le aso leinei, ko leinei kua kotou fakatasi fuli i leinei, fanau a Iselaele : ke kotou talaga, ti ke kotou fai se tonu ! 8 Na tuu ake loa le kakai katoa ki aluga ofaipe se tagata e tasi, o fakasa : Ke aua na toe liliu loa se tagata ki lona kaiga, mo lona falela pe ko lona fale. 9 Ko leinei le nea leia e tonu ke tou aga o fai ki Kipea : E tou ano loa o taui a ia, o mulimuli ki le toso ! 10 E tou filifili loa i faasiga fuli o Iselaele ni tagata e kau agafulu i le tino lelau, e kau lelau i le tino afe, e afe i le tino agafulu afe. E lotou ano loa o afa ni nea kai ki kau solia ala e ano loa o tau ki Kipea ke tautea ai le kolo lena o tupu ko le aga fakalialia leia na fai e lona kakai i Iselaele. 11 Ti na loto tasi loa a tagata fuli o Iselaele ke fakatasi o taui le kolo, o pipiki tasi pe se tagata e tasi. 12 Na kakau loa e faasiga o Iselaele ni tagata ke ano ki famili fuli o Pesamino, o fakasa : Na feaki ke fai loa se nea fakalialia felaaki ia koutou ? 13 Kotou tuku mai kia matou i le aso nei latou ala na fai ia le nea lena, a tagata veli o Kipea, ke motou tamate latou ti ke motou fakapuli ai le veli i loto malie o Iselaele. Kae na leaise fia logo loa a vosa o Pesamino ki le leo o olatou fetaina, fanau a Iselaele. 14 Ti na ulu loa a vosa o Pesamino ki fafo mei olatou kolo, ti na lotou fakatasi loa i Kipea, ke lotou ano o tau ki fanau a Iselaele. 15 I le aso lena na lau loa a vosa o Pesamino ala na nake i olatou kolo : ko tagata tau e tino lua tupu ono afe. Kae na leaise lau i ai a tagata o Kipea e tino lelau e fitu afe, ko tagata fuli na poto i le tau. 16 I le kau tau lena, na maua ai a tagata tau e tino lelau e fitu na sema. Na mafai e tagata fuli ana ke lotou titi se fa fatu ki se makamaka, o fakatusitusi ki se fa fului ulu, o leaise sala. 17 Na lau foki mo tagata o Iselaele, o leaise kau ai Pesamino : ko tino lelau e fa afe, tagata tau fuli. 18 Ti na tuu ake loa a fanau a Iselaele ki aluga, o ano ki Petele, ti na lotou kole loa ki le Atua, o pati : Ko ai leia ia matou e tonu ke uluaki ano loa o tau ki vosa o Pesamino ? Na tali loa le Eteleno : Ko Suta e kamata ia loa. 19 I le usu, na tuu ake loa a fanau a Iselaele ki aluga o pale, ti na lotou fakatuu loa lolatou nofolaga tau i mua o Kipea. 20 Ti na saele loa a tagata o Iselaele ke tau ki vosa o Pesamino, ti na lotou fakatuutuu tau loa ki vosa o Pesamino i mua o Kipea. 21 Na ulu loa a vosa o Pesamino mei Kipea, ti na lotou tamate loa i le aso lena le tino lua tupu lua afe o tagata o Iselaele. 22 Na pale loa a fanau a Iselaele o fetagisi i mua o le Eteleno o kaku ki le pouli ; ti na lotou kole loa ki le Eteleno, o pati : pe tonu ke motou toe ano o taui omatou fetaina, vosa o Pesamino ? Na tali loa le Eteleno kia latou : Kotou pale o taui a ia. 23 Ti na toe loto makeke loa le kakai, a tagata o Iselaele, ti na lotou toe fakatuutuu tau loa i le ganea leia na lotou nofo ai i le uluaki aso. 24 Na saele loa a fanau a Iselaele o tau ki vosa o Pesamino, i le lua o aso. 25 I le aso lena, na ulu ake loa a vosa o Pesamino mei Kipea o tamate le tino agafulu tupu valu afe o tagata o Iselaele, na poto fuli i le tau. 26 Na pale loa a fanau fuli o Iselaele mo le kakai katoa ki Petele. Ti na lotou fetagisi loa ti na lotou nonofo loa i ai i mua o le Eteleno, ti na lotou sesunio loa i le aso lena o kaku ki le afiafi, ti na lotou momoli loa ki le Eteleno ni failaulau mo ni sakilifisio fakafetai. 27 Ti na afa loa e fanau a Iselaele ki le Eteleno, - na nofo loa le aleka o fakapapau a le Atua i le ganea lena, 28 ti ko Finesi, vosa o Eleasale, vosa o Alone, leia na tuu loa i mua o le Eteleno i le temi lena, - ti na lotou pati loa : Pe tonu ke motou toe ano loa o taui omatou fetaina, a vosa o Pesamino, pe tonu ke motou fakafiti ki ai ? Na tali loa le Eteleno : Kotou pale, talie e kau tuku atu loa latou ki okoutou lima i le aso apogipogi. 29 Ti na fakatuu loa e Iselaele se kau tau ke mumuni i le takatakai o Kipea. 30 Ti na pale loa a fanau a Iselaele o tau ki vosa o Pesamino i le tolu o aso, ti na lotou fakaatu tau loa i mua o Kipea ofaipe la faiaga i mua. 31 Ti na ulu ake loa a vosa o Pesamino mei le kolo o fakafelavei ki le kakai, ti na ave loa latou e le kakai o mamao mei le kolo. Na lotou kamata tamate loa le kakai ofaipe la faiaga i mua, ti na tamate loa i ai a tagata e tino tolu o Iselaele, i faisaga, i le ala leia e ano ki Petele mo le ala leia e ano ki Kipea. 32 Ti na pati loa a vosa o Pesamino : kua lotou lava ofaipe la faiaga i mua ! Kae na pati loa a fanau a Iselaele : Tou sosola, tou ave le kau Pesamino ki ala o faisaga ke lotou mamao mei le kolo ! 33 Na mavae loa a tagata fuli o Iselaele i ganea ala na lotou nofo ai, ti na lotou fakaatu fuli loa ki Paale-Tamale, kae na oso fakapunamauli ake loa a tagata ala na mumuni i tafa o le kolo mei ganea ala na lotou mumuni ai, i le fetuu o Maale-Kipea. 34 Na kaku loa a tagata e tino agafulu afe ala na filifili i Iselaele katoa ki mua o Kipea. Na vevela ai le tau, ti na leaise iloa loa e vosa o Pesamino le veli leia ka vilo loa kia latou. 35 Na taai loa e le Eteleno a Pesamino o lava i mua o Iselaele, ti na tamate loa e fanau a Iselaele i le aso lena le tino lua tupu lima afe o tagata o Pesamino, ala na poto fuli i le tau seleta. 36 Na matala loa a vosa o Pesamino kua lotou lava. Na kamata solomuli loa a fanau a Iselaele i mua o vosa o Pesamino, talie na lotou fanaki ki le tokoi a le kau tagata tau leia na mumuni i le tua kolo o Kipea. 37 Na oso fakatavili ake loa a tagata ala na mumuni ki Kipea, o ulu ki loto, ti na lotou tamate loa le kakai katoa o le kolo. 38 Na lotou tuku loa se fakamailoga ki tagata o Iselaele, ke lotou tutu loa se afi ke afu ake i aluga o le kolo. 39 I le temi leia na solomuli ai loa a fanau a Iselaele i le tau, na tamate loa e vosa o Pesamino a tagata e kau tolu o Iselaele, ti na lotou pati loa kua lotou malo ofaipe la faiaga i mua. 40 Kae i le temi tonu lena, na malaga ake loa le afu o le afi leia na tuku ki ai i aluga o Kipea. Na maliu loa a vosa o Pesamino, o tio ki le afu o le afi leia kua malaga ake i lolatou kolo leia kua ulaula katoa. 41 Ti na maliu ake loa a tagata o Iselaele, o osoi fakapunamauli loa a vosa o Pesamino. Ti na ofolele loa a vosa o Pesamino i le tio ki le malaia kua soko kia latou. 42 Na lotou maliu loa i mua o tagata o Iselaele, ti na lotou sosola loa i le ala o le toafa. Kae na pipiki loa le kau tuli ki olatou vae, ti na lotou tamate loa latou ala na ulu mei kolo i le ala. 43 Na lotou takatakai loa Pesamino, o lotou tuli a ia, o lotou tamate a ia i le temi leia e manavanava ai, o kaku ki mua o Kipea i le fetuu esite. 44 Na mate loa i ai ni tagata e tino agafulu tupu valu o Pesamino, ko tagata toa fuli. 45 Ia latou ala na sola ki le toafa, ki le utu o Limoni, na tamate loa e tagata o Iselaele le tino lima afe i le ala ; na lotou tuli loa latou o kaku ki Kiteomi, ti na lotou tamate loa le tino lua o latou. 46 Ko le fakatasi o vosa o Pesamino ala na mate i le aso lena ko le tino lua tupu lima afe, ko tagata toa fuli. 47 Ko tagata e tino lelau e ono, ala na sosola loa ki le toafa ki le utu o Limoni, na nonofo loa i ai i masina e fa. 48 Na toe maliu loa a fanau a Iselaele ki vosa o Pesamino ala na toe, ti na lotou tamate loa ki le mata o le seleta, mei tagata o kolo o kaku ki manu, ti mo nea fuli na maua loa. Na lotou tutu foki ki le afi a kolo fuli. |
© Société Biblique de Genève, 2000-2020
Société Biblique de Genève