Tuifakamaau 2 - Tosi Tapu

Valoki a le Eteleno ki lona kakai

¹ Na pale loa se aselo o le Eteleno mei Kilikale ki Pokimi, o pati : Na kau fakamavae koutou mei Esipito ti na kau aumai koutou ki le fenua leia na kau fakapapau ke soli ki okoutou tamana. Na kau fakasa loa kia latou : E leaise kau motusi loa i se aso laku fakapapau kia koutou,

² ti ko koutou, ke aua na kotou fai loa se sai mo le kakai o le fenua leinei, kae ke kotou maumaui loa olatou aletale. Kae na leaise kotou fakalogo ki loku leo. Kolea na kotou fai ai le nea lena ?

³ Na kau pati loa : E leaise kau kapu ia loa latou i okoutou mua ; kae e lotou nonofo loa i okoutou tafa, ti e liliu loa olatou atua ko ni masele kia koutou.

⁴ I le oki o le fakasa e le aselo o le Eteleno le folafola lena ki fanau fuli a Iselaele, na fetagisi fuli loa le kakai.

⁵ Ti na lotou tuku loa ki le ganea lena le igoa ko Pokimi, ti na lotou momoli loa i ai ni sakilifisio ki le Eteleno.

⁶ Na kakau loa e Sosue le kakai ke mavete, ti na tasi ano loa a fanau a Iselaele o too olatou tofiga i le fenua.

⁷ Na tausi loa le kakai ki le Eteleno i le temi katoa o Sosue, ti mo le temi katoa o le tautupu leia na olo atu kia Sosue ti na tio ki gaoi lalasi fuli na fai e le Eteleno ki Iselaele.

⁸ Na mate loa Sosue, vosa o Nune, tagata fakasausau a le Eteleno, i lona fetuu kau lelau kau agafulu.

⁹ Ti na tanu loa a ia i le fenua o lona tofiga i Timinati-Elesi, i le mauga o Efalaimi, i le noleto o le mauga ko Kaasi.

Veli o le tautupu foou : Tuifakamaau

¹⁰ Ti na mamate fuli loa le tautupu katoa lena, ti na nake loa i ona muli se tasi ake tautupu leia na leaise iloa ia le Eteleno mo gaoiaga lalasi ala na fai e le Eteleno ki Iselaele.

¹¹ Ti na fai loa e fanau a Iselaele le nea leia e veli ki mata o le Eteleno, ti na lotou tausi loa ki Paale.

¹² Na lotou tiaki loa le Eteleno, Atua o olatou tamana, leia na fakamavae ia latou mei le fenua o Esipito, ti na lotou tausi loa ki ni atua kese, o fenua ala na takatakai ia latou. Ti na lotou punou loa i mua o atua ana, o lotou fakatupu ai loa le sausau o le Eteleno.

¹³ Na lotou tiaki loa le Eteleno kae lotou tausi loa kia Paale mo Asetalate.

¹⁴ Ti na malaga loa le sausau o le Eteleno ki Iselaele. Ti na tuku loa e ia latou ki lima o ni kau tagata kaia ala na kaia ia loa latou. Ti na fakatau loa e ia latou ki lima o olatou fili i olatou tafatafa, ti na leaise lotou toe mafai ia loa ke tutuu i mua o olatou fili.

¹⁵ I temi fuli ala na lotou ano ai o tau, na fakafesagai loa le lima o le Eteleno kia latou, o fai kia latou se nea veli, o mulimuli ki le nea leia na fakasa e le Eteleno kia latou, o mulimuli ki le nea leia na fakapapau e le Eteleno kia latou. Ti na lotou nonofo loa i se mamae lasi ai.

¹⁶ Ti na soli loa e le Eteleno kia latou ni tui fakamaau ke saofaki ia latou mei lima o latou ala na kaia ia latou.

¹⁷ Kae na leaise lotou fakalogo foki ki olatou tui fakamaau, talie na lotou tausi loa ki ni atua kese, ti na lotou punou loa i olatou mua. Na lotou maliu vave ai mei le ala leia na saele ai olatou tamana ala na fakalogo ki folafola a le Eteleno : Na lotou fai loa ni nea faikese.

¹⁸ I le temi leia na tuku ai loa e le Eteleno kia latou ni tui fakamaau, na nofo loa le Eteleno mo le tui fakamaau o saofaki latou mei le lima o olatou fili i le temi katoa o le tui fakamaau ; talie na alofa loa le Eteleno kia latou o tupu ko alatou tagi i mua o latou ala na fakavelivelii ia latou ti mo fakamamae ia latou.

¹⁹ Kae i le mate o le tui fakamaau, na lotou toe liliu loa o veli ake i olatou tamana. Na lotou toe pipiki loa ki ni atua kese, o tausi loa kia latou ti mo atolasio loa kia latou. Na leaise lotou tiaki loa alatou aga fakalialia mo alatou agatuu.

²⁰ Koia na ita ai loa le Eteleno ki Iselaele, o pati : talie na tiaki loa e le puleaga leinei le fakapapau leia na kau fai ki olatou tamana, ti na leaise lotou fakalogo loa ki loku leo,

²¹ ti ko au foki, e leaise kau toe kapu ia loa i olatou mua se puleaga e tasi i puleaga ala na tuku e Sosue i le temi na mate ai.

²² Kae e kau fakaaoga loa a puleaga ana ke asiasii ia Iselaele, ke iloa ai pe maoki pe loi, e fia mulimuli a fanau a Iselaele ki le leo o le Eteleno, ofaipe le nea leia na fai e olatou tamana.

²³ Ti na tuku loa e le Eteleno ke nonofo fimalie i le fenua a puleaga ala na leaise tuku e ia ki lima o Sosue. Na leaise fakavilivili loa a ia o kapu latou.