Tuifakamaau 19 - Tosi Tapu

Nea fakalumaluma a Pesamino i Kipea

¹ I le temi lena, na leaise sau i Iselaele. Na i ai loa se tagata levita, leia na nofo loa i le taupotu o le mauga o Efalaimi, na toe avaga loa a ia mo se fafine o Peteleemi o Suta.

² Na agatuu loa le fafine kiate ia, ti na mavae loa a ia meiate ia, o ano ki le fale o lona tamana i Peteleemi o Suta, ti na nofo loa a ia i ai i ni masina e fa.

³ Na tuu ake loa le tagata levita, o ano ki lona avaga, ke masau ki lona loto ti ke toe liliu mo ia. Na ano loa a ia mo lana tagata fakasausau tupulaga mo asino e lua. Na fakaulu ake loa e le fafine a ia ki le fale o lona tamana, leia na tali fakafiafia ia loa a ia, i lana tio kiate ia.

⁴ Na taofi loa a ia e le tamana o le fafine, ti na nofo loa a ia i aso e tolu i lona kaiga. Na la kai loa mo inu, ti na la momoe loa i le pouli i ai.

⁵ I le fa o aso, na la tuu ake loa ki aluga i le usu, ti na la malaga loa ke la ano. Kae na pati loa le tamana o le fafine tupulaga ki lona fugao : kai mua se ga pane ke fakamakeke ai lou mafu, ti kolua ano loa !

⁶ Ti na la tonatona loa, ti na la kakai loa mo inu toka lua mo ia. Ti na pati loa le tamana o le fafine tupulaga ki le Levi : Toe nofo mua i le po leinei, o toe fakafiafia lou loto.

⁷ Na tuu ake loa le Levi ki aluga ke ano, kae i le kole fakamakeke ake a le tamana o le fafine kiate ia, na toe nofo loa a ia i le po lena i lona kaiga.

⁸ I le lima o aso, na tuu ake loa a ia i le usu ke ano. Kae na pati loa le tamana o le fafine tupulaga kiate ia : E kau kole atu kiate koe ke ke fakamakeke mua lou loto, ti kolua nonofo mua o kaku ki le malumalu o le laa. Ti na la kai loa toka lua.

⁹ Na tuu ake loa le tagata Levi ki aluga ke ano, mo lona avaga ti mo lana tagata fakasausau ; kae na pati loa kiate ia le tamana o le fafine tupulaga : Ko leinei, kua malu loa le aso, ti kua tausala, ke kotou toe nonofo loa i le po leinei. Ko leinei, kua oki loa le aso, toe nofo mua i leinei i le po nei, ti ke fakafiafia lou loto ; i apogipogi e kotou alaala loa i le usu o toe liliu ki lokoutou kaiga.

¹⁰ Na leaise loto loa le tagata Levi ke toe nofo i le po lena, ti na tuu ake loa a ia ki aluga o ano. Na kaku loa a ia o tio ki Sepusi, leia ko Selusalemi, mo ana asino e lua kua teuteui ti mo lona avaga.

¹¹ I lalatou feofi ki Sepusi, kua vave fua le vilo o le pouli, ti na pati loa le tagata fakasausau ki lona pule : Tou afe ki le kolo, ti tou nonofo loa i ai i le pouli.

¹² Na tali loa lona pule kiate ia : E leaise tou ulu loa ki se kolo o ni kakai matapule, ala e leaise nonofo ai ni fanau a Iselaele, e tou ano loa o kaku ki Kipea.

¹³ Na toe pati loa a ia ki lana tagata fakasausau : Tou ano, tou fakafeofi ki se kolo o kolo ana, Kipea pe ko Lama, ti e tou nonofo ai loa i le pouli.

¹⁴ Na lotou soko atu loa lolatou fanoga, ti na vilo loa le laa kae lotou fakafeofi atu ki Kipea, i le fenua o Pesamino.

¹⁵ Na lotou afe loa ki le kolo lena, ke nonofo ai i le pouli. Na lotou ulu loa ki le kolo, ti na lotou tonatona loa i le lapalasi lasi o le kolo, kae na leaise fakaafe loa latou e se tasi ke ulu ki lona kaiga.

¹⁶ Ti ko leinei, na liliu mai loa se matua i le afiafi, mei lana gaoi i faisaga ; ko le tagata lena mei le mauga o Efalaimi, na nofo a ia i Kipea, ti ko le kakai o le kolo ko le kau Pesamino.

¹⁷ Na siki ake loa a mata o le matua, ti na tio loa a ia ki le tagata fanoga i le lapalasi o le kolo. Ti na pati loa le matua kiate ia : E ke ano kifea ? E ke au meifea ?

¹⁸ Na tali loa le tagata Levi kiate ia : e motou au mei Peteleemi o Suta, ti e motou ano ki le potupotu o le mauga o Efalaimi. Ko lena le ganea leia e kau nofo ai, ti e kau toe liliu ki loku kaiga, i le oki o se fanoga na kau fai ki Peteleemi o Suta. Ti ko leinei, e leaise tasi e fakaafe ia matou ki lona kaiga.

¹⁹ Kae e motou maua se mutie mo se nea kai ki amatou asino ; ti e motou maua foki se pane mo se vino kiate au, mo lau fafine fakasausau ti mo laku tagata fakasausau. E leaise aoga mai se nea kia matou.

²⁰ Na pati loa le matua : Ke nofo le tokamalie mo koe ! E kau tokaga loa ki nea fuli ala e aoga kiate koe, e leaise tonu ke ke nofo i le pouli i le lapalasi.

²¹ Ti na fakaulu loa latou e le matua ki lona fale, ti na soli loa e ia se nea kai ki asino. Na fufulu loa e le kau fanoga olatou vae, ti na lotou kai loa ti mo inu loa.

²² I le lolotoga o lolatou taupau mauli, ko leinei, kua takatakai loa le fale e ni tagata o le kolo, ni tagata veli, ti kua lotou ta loa le matapa. Na lotou pati loa ki le matua, pule o le fale : Ke ke fakaulu mai ki fafo le tagata leia na ke aga o tali i lou fale, e motou fia iloa a ia.

²³ Na ulu loa le matua ki fafo, o pati kia latou : Ei oku fetaina, e kau kolekole atu kia koutou, ke aua na kotou fai loa le agasala fakalialia lena ! Ke aua na kotou fai loa le aga fakavalea lena ki le tagata leinei, talie kua ulu mai a ia ki loku loto fale.

²⁴ Kae ko leinei, e kau nofo mo loku taine koi taupoou, ti e nofo le tagata mo lona lua avaga ; e kau aumai loa laua ki fafo kia koutou, ti e kotou fai loa kia laua le nea leia e kotou loto ki ai, kae ke aua na kotou fai loa le nea fakalumaluma lena ki le tagata leinei.

²⁵ Na leaise fia logo fua a tagata ana ki se nea. Koia na too ai loa e le tagata Levi lona avaga o ave kia latou ki fafo. Ti na lotou fai fakamakeke loa ki le fafine, o fai a nea veveli mo fakavalevale kiate ia i le po katoa o kaku ki le mafoata. Ti na lotou tuku loa a ia ke ano i le mafoa o le ao.

²⁶ I le usu na kaku ake loa le fafine o teka i mua o le matapa o le fale o le matua, leia na nofo ai lona avaga. Ti na nofo loa le fafine i le ganea lena o kaku ki le usu.

²⁷ I le usu, na ano loa lona avaga o fakamavaa le matapa o le fale, ti na ulu loa a ia ki fafo ke soko atu lona fanoga. Ti na maua loa e ia lona avaga e tuku i mua o le matapa o le fale, kua falo ona lima ki le mua matapa.

²⁸ Na pati loa a ia ki lona avaga : Ke ke tuu ki aluga kae tou ano ! Kae na leaise maua loa se tali ! Ti na teki loa e ia le tino o lona avaga ki lana asino ti na toe liliu loa a ia ki lona kaiga.

Ita o la ake faasiga

²⁹ Na ulu loa a ia ki lona fale, o too se sele, ti na tutuuti loa e ia lona avaga i ni vaega e kau agafulu tupu lua. Ti na tufa loa e ia a vaega ki faasiga fuli o Iselaele.

³⁰ Na pati loa latou fuli ala na tio ki le nea lena : koi tio nei ki se nea feneeki ti koi fai nei le nea leinei talu mei le mavae o fanau a Iselaele i Esipito. E tonu ke tokaga ki le nea leinei, ke fai se talaga, ti ke fai se puleaki ki ai.