Tuifakamaau 18 - Tosi Tapu

Afa o se tofiga e Tane

¹ I le temi a ia, na leaise sau i Iselaele ; ti na afa e le faasiga o Tane se tofiga ke nofo ai, talie na kaku mai loa ki le temi lena, na leikiaise tuku loa se tofiga kiate ia i loto malie o faasiga o Iselaele.

² Na filifili loa e vosa o Tane ia latou ni tagata loto makeke e toka lima, ala na lotou kakau loa mei Solea mo Esitaoli, ke tioi ia le fenua ti mo sivisivi a ia. Na lotou pati loa kia latou : Kotou ano, ti kotou sivisivi loa le fenua. Na lotou kaku loa ki le mauga o Efalaimi, ti na lotou tutuu loa i le fale o Mika, ti na lotou nonofo loa i le ganea lena i le pouli.

³ Talie na lotou feofi loa ki le fale o Mika, na lotou iloa loa le leo o le tagata Levi, ti na lotou fakafeofi loa kiate ia, o pati kiate ia : Ko ai na aumai ia a koe ki leinei ? Kolea e ke fai ia i le ganea leinei ? Kolea le nea leia e taofi ia a koe i leinei ?

⁴ Na tali loa le Levi kia latou : E fai kiate aua e Mika le nea leia mo leia, e soli mai e ia kiate au se totogi, ti e kau fai kiate ia pe se tagata faisakilifisio.

⁵ Ti na lotou pati loa kiate ia : Afa ki le Atua, ke motou iloa pe manuia loa le fanoga leia e motou lolotoga fai pe leai.

⁶ Ti na tali loa le tagata faisakilifisio kia latou : Kotou ano i le tokamalie ; e ano le Eteleno mo koutou i le fanoga leia e kotou fai.

⁷ Na ano loa a tagata e toka lima, ti na lotou kaku loa ki Laisi. Na lotou tio loa ki le kakai leia na nofo i ai, ala na mauli i le tokamalie, ofaipe le kau Sitone. Na leaise tasi na fai ia se valoki fua e tasi ki leia na pule kia latou. Na nofo le kakai lena o mamao mei le kau Sitone ti na leaise lotou fakalogo ki se tasi.

⁸ Na toe liliu loa a tagata ana ki olatou fetaina i Solea mo Esetaoli, ti na vesili loa olatou fetaina kia latou : Kolea le logo e kotou au mo ia ?

⁹ Na lotou tali loa : Tou pale kia latou ; talie kua motou tio ki le fenua, ti ko leinei, e malie ai a ia. Kolea e kotou fakalologo ai ! Ke aua na kotou gasueveli i le saele o ano ke too le fenua lena !

¹⁰ Ka kotou ulu loa ki ai, e kotou maua loa se kakai leia e nofo fakafulufulumalie. E lasi ai le fenua, ti kua tuku atu a ia e le Atua ki okoutou lima ; ko se ganea leia e leaise puli ai se nea fua e tasi i nea fuli ala e maua i le malama nei.

¹¹ Na ano loa mei Solea mo Esitaoli a tagata e tino lelau ono o le faasiga o Tane, mo alatou masafu tau.

¹² Na lotou pale loa, ti na lotou fakatuu loa lolatou nofolaga tau i le fetuu uesite o Kiliate-Sealimi, i le fenua o Suta ; koia leia na fakaigoa ai le ganea lena, leia e tuu i muli o Kiliate-Sealimi, ko Masane-Tane o kaku mai ki le aso nei.

¹³ Na lotou mavae loa i lena ki le mauga o Efalaimi, ti na lotou kaku loa ki le fale o Mika.

¹⁴ Ti na masau loa a tagata e toka lima ala na ano o tioi le fenua o Laisi, o pati loa ki olatou fetaina : Pe kotou iloa e i ai i fale anei se efoti, mo ni telafimi, mo se fakatata ta, ti mo se fakatata ukamea saka ? Ke kotou tio i le temi nei pe kolea le nea leia e tonu ke kotou fai !

¹⁵ Na lotou fakafeofi ake loa, ti na lotou ulu loa ki loto o le fale o le tagata tupulaga Levi, i le fale o Mika, ti na lotou vesili loa kiate ia pe malolo a ia !

¹⁶ Na tutuu loa a tagata e tino lelau ono o vosa o Tane i mua o le matapa o le fale mo alatou masafu tau.

¹⁷ Ti na pale loa a tagata e toka lima, ala na ano o sivisivi le fenua, ti na lotou ulu loa ki le fale ; na lotou too loa le fakatata ta, mo le efoti, mo telafimi, ti mo le fakatata ukamea saka, kae tuu loa le tagata faisakilifisio i mua o le matapa mo le kau tagata e tino lelau ono ala na too ia alatou masafu tau.

¹⁸ I lana tio kua lotou ulu ki le fale o Mika, ti kua lotou too le fakatata ta, mo le efoti, mo telafimi, ti mo le fakatata ukamea saka, na pati loa le tagata faisakilifisio kia latou : Kolea e kotou aga o fai ?

¹⁹ Na lotou tali loa kiate ia : fakalologo, tapono lou gutu ki lou lima, ti ke au mo matou. E ke tausi loa kia matou ofaipe se tamana mo se tagata faisakilifisio. Kofea e malie ake ke ke tausi ofaipe se tagata faisakilifisio ki le fale o se tagata e toka tasi, pe ke tausi ofaipe se tagata faisakilifisio ki se faasiga katoa o Iselaele ?

²⁰ Na logoi loa e le tagata faisakilifisio se fiafia lasi i lona loto ; na too loa e ia le efoti, mo telafimi, ti mo le fakatata ta, ti na ano loa a ia mo le solia.

²¹ Na lotou soko atu loa lolatou fanoga, ti na lotou ano loa. Na lotou fakamuamua loa a toe, mo manu, ti mo kavega.

²² Ti kua lotou kaku foki o mamao mei le fale o Mika, kae na fakatasi loa a Mika mo latou ala na nonofo i ona tafatafa, o lotou kamata tuli loa a vosa o Tane.

²³ Na lotou kalaga loa ki vosa o Tane, ala na maliu ake loa o vesili kia Mika : Kolea e ke taukalaga fenaaki ai ?

²⁴ Na tali loa Mika kia latou : Kua kotou kaia ia a atua ala na kau aga o fai, ti kua kotou ave laku tagata faisakilifisio : E leaise nea fua e tasi e toe mai kiate au, ti e kotou matasoka o vesili mai kiate au pe kolea e kau kalaga ai ?

²⁵ Na tali loa a vosa o Tane kiate ia : Ke aua na motou toe logo loa ki lou leo, talie e feala loa ke kaekae ni iki o matou, ti ke lotou tamate loa koutou, ti e ke fakatupu ia loa lou puli mo lou famili.

²⁶ Ti na soko atu loa e vosa o Tane lolatou fanoga. I le tio a Mika na lotou makeke ake iate ia, na toe liliu loa a ia ki lona fale.

Na too o Laisi e Tane

²⁷ Na lotou too loa i lena le nea leia na fai e Mika, ti na lotou ave foki mo le tagata faisakilifisio leia na gaoi kiate ia, ti na lotou osoi loa Laisi, o tamate se kakai leia na nofo i le fulufulumalie mo le fanaki ; na lotou taai a ia ki le mata o le seleta, kae na lotou tutu le kolo ki le afi.

²⁸ Na leaise tasi ke saofaki ia a ia, talie na tuu mamao a ia mei Sitone, ti na leaise kau a ia mo se tasi. Na tuu a ia i le vaivailiua leia e ano o kaku ki Pete-Leopi. Na toe lagai loa e vosa o Tane le kolo, ti na lotou nonofo loa i ai ;

²⁹ na lotou fakaigoa loa a ia ko Tane, ki le igoa o lotatou tamana ko Tane, vosa o Iselaele ; kae na igoa le kolo i mua ko Laisi.

³⁰ Na fakatuu loa e vosa o Tane le fakatata ta leia na fai e Mika, ke liliu ko lolatou atua. Ti ko Sonata, vosa o Kelesoni, vosa o Manase, a ia mo ona vosa, na liliu loa ko tagata faisakilifisio ki le faasiga o Tane, o kaku ki le temi leia na ave ai loa le kakai o fakapopula.

³¹ Na lotou taupau loa le fakatata ta a Mika i le temi katoa leia na tuu ai le fale tapu o le Atua i Silo.