Tuifakamaau 17 - Tosi Tapu

Mika mo lona aletale pagani.

¹ Na i ai loa se tagata o le mauga o Efalaimi, na igoa ko Mika.

² Na pati loa a ia ki lona tinana : Ko fa sikele paaga e afe tasi mo le kau lelau e tasi, ala na kaia iate koe, ti na ke tuku ai loa ni malaia ki leia na kaia i oku mua, ko nei latou e tuku i loku fale, talie ko au leia na too ia latou. Ti na pati loa lona tinana : Ke tapuaki le Eteleno ki loku vosa !

³ Na liufaki loa e Mika ki lona tinana a fa sikele e afe tasi mo le kau lelau e tasi ; ti na pati loa lona tinana : E kau loto ke fakatapui le paaga leinei ki le Eteleno, o tupu ke fai ki ai se fakatata kua ta mo se fakatata kua saka ki loku vosa : Ko leinei, e kau toe tuku atu loa a ia kiate koe.

⁴ Na toe tuku loa e ia ki lona tinana le paaga. Na too loa e lona tinana a fa sikele paaga e kau lelau lua. Ti na tuku loa e ia le paaga ki le tagata saka ukamea, leia na fai ia loa ki ai se fakatata ta mo se fakatata ukamea saka. Na fakatuu loa laua i le fale o Mika.

⁵ Na maua loa e Mika se fale o le Atua ; na fai loa e ia se efote mo ni telafimi, ti na fakatapui loa e ia le tasi o ona vosa ke nofo o faisakilifisio.

⁶ I le temi lena, na leaise se sau i Iselaele. Na tasi fai e le tagata le nea leia na malie kiate ia.

⁷ Na i ai loa se tagata tupulaga mei Peteleemi o Suta, mei le famili o Suta ; na Levi a ia, ti na nofo loa a ia i ai.

⁸ Na mavae loa a ia mei Peteleemi o Suta, o afa se nofoaga e malie kiate ia. I le soko atu o lana fanoga, na kaku loa a ia ki le fale o Mika i le mauga o Efalaimi.

⁹ Na pati loa Mika kiate ia : Pe ke au meifea ? Ti na tali loa a ia kia Mika : Ko au ko se tagata levita, e kau au mei Peteleemi o Suta, ti e kau ano o afa se ganea ke kau nofo ai.

¹⁰ Na pati loa Mika kiate ia : Nofo i leinei mo au ; e ke liliu loa kiate au ofaipe se tamana mo se tagata faisakilifisio, ti e kau soli loa kiate koe ni fa sikele paaga e kau agafulu i le fetuu, mo teu ala e aoga kiate koe, ti mo nea kai. Ti na ulu loa le Levi ki fale.

¹¹ Na tali loa e le tagata Levi ke nofo mo Mika, leia na tio loa ki le tagata tupulaga ofaipe sona vosa totonu.

¹² Ti na fakatapui loa e Mika le tagata Levi ke gaoi kiate ia ofaipe se tagata faisakilifisio, ti na nofo loa a ia i le fale o Mika.

¹³ Ti na pati loa Mika : I le aso nei, e kau iloa e tapuaki loa le Eteleno kiate au, talie kua kau nofo mo se tagata Levi ke fai ia ni sakilifisio kiate au.