Tuifakamaau 16 - Tosi Tapu

Samisoni mo Talila

¹ Na ano loa Samisoni ki Kasa ; ti na tio loa a ia i ai ki se fafine faiaga, ti na ulu loa a ia ki lona fale.

² Na fakasa loa ki le kakai o Kasa : Kua tau mai a Samisoni ki leinei. Ti na lotou takatakai loa le fale, ti na lama loa a ia i le po katoa lena i le matapa o le kolo. Na leaise latou fai ia se nea kia Samisoni i le lolotoga o le pouli katoa, o lotou pati : E tou tamate loa a ia i le usu apogipogi.

³ Na moe loa Samisoni o kaku ki le vaeluapo. I le vaeluapo, na tuu ake loa a ia ki aluga ; ti na fa loa a ia ki kau matapa o le matapa o le kolo mo pou e lua, o taaki fakatasi latou mo ukamea, o teki latou ki ona tuauma, ti na ave loa e ia latou ki le tumutumu o le mauga leia e tuu i mua o Epelone.

⁴ I le oki o le nea lena, na alofa loa Samisoni ki se fafine i le vaivailiua o Soleki. Ko le igoa o le fafine lena ko Talila.

⁵ Na pale ake loa a pule o le kau Filisitini ki le fafine, o pati kiate ia : Ke ke fakakolekole loa kia Samisoni ke fakasa atu e ia kiate koe pe au meifea lona makeke lasi, ti e feaki loa ke motou pulei a ia ; e motou sai loa a ia ke fakalogo malie, ti e motou soli atu loa kiate koe, e le tagata taki toka tasi, ni fa piesi paaga e afe mo le kau lelau.

⁶ Ti na pati loa Talila kia Samisoni : E kau kolekole atu kiate koe ke ke fakasa mai kiate au pe au meifea lou makeke lasi, ti kolea le nea e tonu ke sai a koe ki ai ke ke fakalogo malie.

⁷ Na pati loa Samisoni kiate ia : Kapau e sai loa au ki ni maea foou e fitu, ala e leikiaise malo, e kau liliu loa o gaegae ti e kau fai loa pe se tagata masani.

⁸ Na ave loa e pule o le kau Filisitini kia Talila ni maea foou e fitu, ala na leikiaise malo. Ti na sai loa e Talila a Samisoni ki maea ana.

⁹ Ti na mumuni loa ni tagata i le kaiga o Talila, i se kogafale. Na pati loa Talila kiate ia : Samisoni, kua au le kau Filisitini kiate koe ! Ti na motumotusi loa e Samisoni a maea ofaipe se ga filo vavai mo ka lave ki ai le afi. Ti na leaise iloa loa pe au meifea lona makeke.

¹⁰ Na pati loa Talila kia Samisoni : Ko leinei, na ke manogii au, o ke fakamatala mai kiate au ni loi. E kau kolekole atu kiate koe i le temi nei ke ke fakasa mai kiate au le nea leia e tonu ke sai a koe ki ai.

¹¹ Kapau e sai loa au ki ni maea foou, ala na leikiaise fakaaoga, e kau liliu loa o gaegae, ti e kau fai loa pe se tagata masani.

¹² Na too loa e Talila ni maea foou, o sai ki ai Samisoni. Ti na pati loa Talila kiate ia : Kua au le kau Filisitini kiate koe, Samisoni ! Talie na mumuni loa ni tagata Filisitini i le kogafale. Ti na motumotusi loa e Samisoni a maea ala na nonoa ki ai ona lima ofaipe se ga filo noa.

¹³ Na pati loa Talila kia Samisoni : Kua ke toe manogii au, o ke toe fakamatala mai kiate au ni iki a loi. Ke ke fakasa mai la le nea leia e tonu ke sai a koe ki ai. Na pati loa Samisoni kiate ia : Ke ke fili fakatasi a kau filiga e fitu o loku lau ulu, ti ke nonoa loa a ia ki le vae o le masini lalaga kie.

¹⁴ Ti na fakamaumau loa e Talila le kau filiga o lona ulu ki se pou o le masini, ti na pati loa a ia kia Samisoni : Kua au le kau Filisitini kiate koe, Samisoni ! Ti na ala ake loa Samisoni i lana moe, o taaki le pou mo le masini lalaga kie.

¹⁵ Na pati loa a Talila kiate ia : Pe feaki ke ke mafai ia le pati mai kiate au : e kau alofa kiate koe ! kae e leaise nofo lou loto mo au ? Ko le tua tolu leinei o lau manogii au, ti mo lau fufu mai kiate au le tupuaga o lou makeke lasi.

¹⁶ Na fakamamae e Talila le loto o Samisoni i aso fuli ki ana masau, ti na kaekae loa lona laumalie o kaku ki le mate,

¹⁷ koia na fakamavaa ai loa e Samisoni lona loto kia Talila, o pati : Na leaise fakalaka le tele i loku ulu, talie kua vaei au ki le Atua mei le manava o loku tinana. Kapau e tele loa loku ulu, ti e puli loa loku makeke iate au, ti e kau liliu loa o gaegae, ti e kau fai loa pe tagata fuli.

¹⁸ Na tio loa Talila kua fakamavaa e Samisoni lona loto kiate ia, ti na kakau loa e ia ke fakasa ki pule o le kau Filisitini : Kotou au i le faiaga leinei talie kua fakamavaa mai e ia lona loto kiate au. Ti na pale ake loa a pule o le kau Filisitini kia Talila, o ave loa kiate ia le paaga i olatou lima.

¹⁹ Na fakamoemoe loa e Talila a Samisoni i ona tega, ti na pati loa a ia ki se tagata ke tuuti ia a kau filiga e fitu o le ulu o Samisoni. Na kamata loa i ai le gaegae o Samisoni, talie na mavae loa lona makeke iate ia.

²⁰ Ti na pati loa Talila : Samisoni, kua au le kau Filisitini kiate koe ! Na ala ake loa a ia i lana moe, o pati : E fai loa pe le masani, e leaise lotou mafai ia loa se nea kiate au, e kau saosaoa loa ! Kae na leaise iloa e ia kua mavae le Eteleno meiate ia.

²¹ Na too loa a ia e le kau Filisitini, ti na lotou kape loa ona mata ; na lotou ave loa a ia ki Kasa, ti na lotou saisai loa a ia ki ni tini kapa. Na mio loa e ia le masini mio fulumeto i le fale pilisoni.

Totogi o Samisoni ; lona mate

²² Kae na toe kamata sosomo loa lona lau ulu, i le oki o lona tele.

²³ I se aso, na fakatasi loa a pule o le kau Filisitini o momoli se sakilifisio lasi ki lolatou atua ko Takone, ti mo fakafiafia. Talie na lotou pati : Kua tuku e lotatou atua lotatou fili ko Samisoni ki otou lima.

²⁴ I le temi leia na tio ai loa le kakai kia Samisoni, na lotou sua fakavikiviki loa ki lolatou atua, o pati : Kua tuku e lotatou atua ki otatou lima lotatou fili ko Samisoni, le malaiaaga o lotatou puleaga, leia na tamate ia lotatou kakai.

²⁵ I le lasi o le fiafia o olatou loto, na lotou pati loa : Ke aumai Samisoni, ti ke fai e ia ni manogi ke fakafiafia ai otou loto ti ke tou kakata ai. Na lotou too loa Samisoni mei loto o lona pilisoni, ti na lotou kakata loa i le tio kiate ia. Na lotou fakatuu loa a ia i loto malie o pou o le fale tapu.

²⁶ Ti na pati loa Samisoni ki le tama leia na takitaki ia a ia i le lima : Fakatuu au ke feala ke kau fafa ki pou ala e taofi ia le fale tapu ti ke kau fafanaki ki ai.

²⁷ Na apele loa le fale tapu i tagata mo fafine : Na nofo loa a pule fuli o le kau Filisitini i ai, ti na nonofo foki i fata o le fale a tino afe e tolu, tagata mo fafine, o tio ki le manogi fakakata a Samisoni.

²⁸ Ti na fai loa e Samisoni le kole leinei ki le Eteleno, o pati : Aliki Eteleno ! E kau kole atu kiate koe ke ke manatu mai kiate au ! Ei Atua, ke ke soli mai kiate au se makeke i le faiaga fua leinei, ke kau totogi ai, i se faiaga e tasi, ki le kau Filisitini oku fa mata e lua !

²⁹ Ti na taufa loa Samisoni ki pou loto ala na taofi ia le fale tapu, ti na fa loa lona lima atamai ki se tasi a pou mo lona lima sema ki le tasi a pou.

³⁰ Ti na pati loa Samisoni : Ke kau mate mo le kau Filisitini ! Ti na tekei loa e ia i lona makeke katoa a pou, ti na solo loa le fale tapu ki pule mo le kakai katoa leia na nonofo i ai. Ko latou ala na mate mo Samisoni na api ake ia latou ala na tamate e ia i le lolotoga o lona mauli katoa.

³¹ Na ifo ake loa ona fetaina mo lona famili fuli, o too lona tino, ti na lotou ave loa a ia, o tanu i le tanuma o lona tamana ko Manoa, i le vasa o Sola mo Esitaoli. Na tui fakamaau a ia i Iselaele i fetuu e kau lua.