Tuifakamaau 15 - Tosi Tapu

Malo o Samisoni i le kau Filisitini

¹ Na leaise fualoa, i le temi tuuti o le fulumeto, na toe ano loa a Samisoni o fakatele ki lona avaga mo se koti muli. Na pati loa a ia : E kau fia ulu ki le kogafale o loku avaga. Kae na leaise tali loa e le tamana o le fafine ke ano a ia ki lona avaga.

² Ti na pati loa a ia kia Samisoni : Na kau tuku kua ke vesia kiate ia, ti na kau soli loa a ia ki lou kaukau soa. Pe leaise tupulaga ake lona ga taina muli ? Ke ke too loa a ia ke fetogi ai lou avaga.

³ Na pati loa Samisoni kia latou : I le faiaga leinei e leaise kau sala loa ki le kau Filisitini, mo kapau e kau fai loa kia latou se nea e veli.

⁴ Ti na ano loa Samisoni. Na tapo loa e ia ni lenato e kau lelau tolu, ti na too loa e ia ni taume ; ti na nonoa loa e ia le siku ki le siku, ti na sai loa e ia se taume i loto malie o siku.

⁵ Ti na tutu loa e ia a taume, ti na tuku loa e ia a lenato ke ano ki faisaga fulumeto a le kau Filisitini, o vela ai loa le fulumeto leia kua saisai, mo le fulumeto leia e leikiaise tuuti, ti mo faisaga olive.

⁶ Na pati loa le kau Filisitini : Ko ai na fai ia le nea lena ? Ti na tali loa : Ko Samisoni, le fugao leia o le tagata Timina, leia na fai ia le nea lena, o tupu na soli e le tagata Timina le avaga o Samisoni ki lona kaukau soa. Ti na pale ake loa le kau Filisitini, o tutu mauli le fafine mo lona tamana.

⁷ Na pati loa Samisoni kia latou : Pe ko lena lakotou fai ? Koi kau fimalie mo ka kau totogi ia loa kia koutou le nea leia na kotou fai kiate au.

⁸ Na tamate loa latou e Samisoni ; ti na ano loa a ia, o nofo i le ana o le utu ko Etami.

⁹ Ti na saele loa le kau Filisitini, o fakatuu lolatou nofolaga tau i le fenua o Suta, ti na lotou mafola loa o kaku ki Lei.

¹⁰ Na pati loa a tagata o Suta kia latou : Kolea na kotou pale mai ai kia matou ? Na lotou tali loa : Na motou pale mai o sai Samisoni, o tupu ke fai kiate ia le nea leia na fai e ia kia matou.

¹¹ Ti na ano loa ni kau tagata o Suta e tino afe tolu ki le ana o le utu ko Etami, o pati kia Samisoni : Pe leaise ke iloa e pule le kau Filisitini kia tatou ? Pe leaise ke tio ki le veli leia na ke aga o fai kia tatou ? Na tali loa a ia kia latou : Na kau fai kia latou le nea leia na lotou aga o fai kiate au.

¹² Na lotou pati loa kia Samisoni : Kua motou ifo mai o sai a koe, talie ke tuku a koe ki lima o le kau Filisitini. Na pati loa Samisoni kia latou : Kotou fakapapau mai kiate au e leaise kotou tamate loa au.

¹³ Na lotou tali loa kiate ia : Leai ; e motou loto fua ke sai a koe ti ke tuku a koe ki lima o le kau Filisitini, kae e leaise motou tamate ia loa a koe. Ti na lotou sai loa a ia ki maea foou e lua, ti na lotou taki ake loa a ia ki fafo o le ana.

¹⁴ I lana kaku ki Lei, na kalaga fakafiafia loa le kau Filisitini i le tio kiate ia. Ti na too loa a ia e le Laumalie o le Eteleno. Na liliu loa a maea ala na sai ki ai ona lima ofaipe ni vavai ala kua tutu e le afi, ti na vivilo loa ona sai mei ona lima.

¹⁵ Na maua loa e ia se ivi o le kaugutu o se asino leia nao tamate fua, ti na falo loa e ia lona lima o too a ia, ti na tamate loa e ia le kau tagata e tino afe.

¹⁶ Ti na pati loa Samisoni : Ki se ivi o le kaugutu o se asino, na kau fai se tuuga e tasi, ni tuuga e lua ; Ki se ivi o le kaugutu o se asino, na kau tamate ni tagata e tino afe.

¹⁷ I le oki o lana pati, na tiaki loa e ia le ivi o le kaugutu o le asino. Ti na fakaigoa loa le ganea lena ko Lamati-Lesi.

¹⁸ I le lasi o lona fia inu, na kole loa e ia ki le Eteleno, o pati : Ko koe leia na fakataga ia le malo lasi leinei ki le lima o lau tagata fakasausau ; pe ke tuku loa i le lakaga nei ke kau mate i le fia inu, ti ke kau vilo ki lima o ni tagata lee silikosisio ?

¹⁹ Na fakamavaa loa e le Atua le mafaa o le utu leia e tuu i Lesi, ti na tafe loa mei ai le vai. Na inu loa Samisoni, ti na toe malama loa ona mata, o toe maua loa lona makeke.

²⁰ Na tui fakamaau Samisoni i Iselaele, i le temi o le kau Filisitini, i fetuu e kau lua.