Tuifakamaau 14 - Tosi Tapu

Avaga o Samisoni mo le fafine Filisitini

¹ Na ifo loa Samisoni ki Timina ti na tio loa a ia i ai ki se taine i taineliki o le kau Filisitini.

² I lana toe liliu, na fakasa loa e ia ki lona tamana mo lona tinana, o pati : Na kau tio i Timina ki se taine i taineliki o le kau Filisitini, ke kolua too a ia i le temi nei ke avaga mo au.

³ Na pati loa lona tamana mo lona tinana kiate ia : Pe leaise maua se taine i taineliki o lou famili mo lou kakai katoa ke ke ano ai o too se taine i taineliki o le kau Filisitini lena e leaise silikosisio ? Ti na pati loa Samisoni ki lona tamana : Ke ke too a ia kiate au, talie ko ia leia e kau loto ki ai.

⁴ Na leaise iloa loa e lona tamana mo lona tinana na au le nea lena mei le Eteleno : talie na afa loa e Samisoni se nea ke fefele ai mo le kau Filisitini. I le temi lena, na pule loa le kau Filisitini ki Iselaele.

Na tamate e Samisoni se laione

⁵ Na ifo loa Samisoni mo lona tamana ti mo lona tinana ki Timina, ti na lotou kaku loa ki faisaga vite o Timina ; ti fokifa kua oso ake se laione muli kiate ia.

⁶ Na too loa e le Laumalie o le Eteleno a Samisoni, leia na saei ia loa le laione ofaipe se saei o se uviki koti, kae na leaise too e ia se nea i lona lima. Na leaise fakasa loa e ia ki lona tamana mo lona tinana le nea leia fai e ia.

⁷ Na ifo loa Samisoni, o masau ki le taine, ti na malie loa le taine kiate ia.

⁸ Na leaise fualoa, ti na toe ifo a ia ki Timina ke avaga mo le taine, ti na mavae kese loa a ia mei le ala ke tio ki le tino o le laione. Ti ko leinei kua nofo i ai se fuiga lago meli mo se sua meli.

⁹ Na too loa e ia i lona lima se potu meli susua o kai saele i le ala. I lana tau ki le kaiga o lona tamana mo lona tinana, na soli loa e ia kia laua se potui meli, ti na la kai loa a ia. Kae na leaise fakasa loa e ia kia laua na too e ia le meli lena mei le tino o le laione.

¹⁰ Na ifo loa le tamana o Samisoni ki le kaiga o le avaga o Samisoni. Ti na fai loa e Samisoni i ai se kai lasi, talie ko le fai masani lena a le kau tupulaga.

¹¹ I le tio a le kau Filisitini ki le tamana o Samisoni, na lotou filifili loa ni tagata e kau tolu ke soa mo ia.

¹² Na pati loa Samisoni kia latou : E kau tuku kia koutou se nea ke kotou aga o mate. Kapau e kotou fakamatala mai loa lona uiga i le lolotoga o aso e fitu o le fai avaga, kapau e kotou maua loa lona tali, ti e kau soli loa kia koutou ni kofu loto e kau tolu mo ni kofu loloa e kau tolu.

¹³ Kae kapau e leaise kotou maua loa lona tali, ti kapau e leaise kotou maua loa lona fakamatala, ti e kotou soli mai loa kiate au ni kofu loto e kau tolu mo ni kofu loloa e kau tolu. Na lotou pati loa kiate ia : Tuku mai lau nea ke mate, e motou fakalogo atu kiate koe.

¹⁴ Na pati loa Samisoni kia latou : Na tupu se nea kai mei leia e kaikai, ti na tupu mei leia e makeke le nea leia e sua malie. I le lolotoga o aso e tolu, na leaise lotou maua ia le fakamatala o le mate !

¹⁵ I le fitu o aso, na lotou pati loa ki le avaga o Samisoni : Ke ke fakakolekole ki lou avaga ke fakamatala mai e ia kia matou le mate, talie na motou tutu loa a koe mo le fale katoa o lou tamana. Pe na kotou fakaafe matou ke kotou aga o fakamativa matou ?

¹⁶ Na kamata tagi loa le avaga o Samisoni i ona mua, o pati : E ke vesia kiate au, e leaise ke alofa kiate au ! Na ke tuku se masau fakamisitelio ki vosa o loku kakai, ti na leai fua se ke fakamatala mai a ia kiate au ! Kae na tali Samisoni kiate ia : Na leai fua se kau fakamatala a ia ki loku tamana mo loku tinana ; pe ko koe leia e kau fakamatala loa a ia ki ai ?

¹⁷ Na tagi loa le avaga o Samisoni i ona mua i aso e fitu o le fai avaga ; i le fitu o aso, na fakamatala loa e Samisoni le mate, talie na fakafiu loa e lona avaga lona loto o mamae veli. Ti na fakamatala loa a ia e le fafine ki vosa o lona kakai.

¹⁸ Na pati loa le kakai o le kolo kia Samisoni i le fitu o aso, i mua o le vilo o le laa : Kolea e sua malie ake i le meli, ti ko lea e makeke ake i le laione ? Ti na pati loa Samisoni kia latou : Ka na leaise kotou gaoi mo laku pipi fafine muli, na leaise kotou maua ia loa laku mate.

¹⁹ Na too loa e le Laumalie o le Eteleno a Samisoni, ti na ifo loa a ia ki Asakaloni. Na tamate loa e ia i ai ni tagata e kau tolu, ti na too loa e ia olatou teu o soli kia latou ala na fakamatala ia le mate. Ti na toe liliu loa a ia ki le fale o lona tamana mo se ita lasi.

²⁰ Na soli loa le avaga o Samisoni ki lona soa leia na fai kiate ia pe se kaukau soa maoki.