Tuifakamaau 13 - Tosi Tapu

Isitolia o Samisoni : lona tupu

¹ Na toe fai loa e fanau a Iselaele le nea leia e veli ki mata o le Eteleno ; ti na tuku loa latou e le Eteleno ki lima o le kau Filisitini i fetuu e kau fa.

² Na i ai loa se tagata o Tesoa, mei le famili o Tane, ti na igoa a ia ko Manoa. Na paa loa lona avaga, ti na leaise fanau loa a ia.

³ Na sa loa le aselo o le Eteleno ki le fafine, o pati kiate ia : Ko leinei, e ke paa, ti na leaise ke maua sau fanau ; e ke faitoe loa ti e ke fanaui loa se tama.

⁴ Ko leinei, ke ke tokaga ke aua na ke inu loa se vino pe ko se kava, ti ke aua na ke kai loa se nea kelekele.

⁵ Talie e ke faitoe loa, ti e ke fanaui loa se tama. E leaise lave loa le tele ki le ulu, talie e fakatapui loa le fanau lena ki le Eteleno mei le manava o lona tinana ; ti ko ia leia e kamata ia loa le saofaki o Iselaele mei le lima o le kau Filisitini.

⁶ Na ano loa le fafine o fakasa le nea lena ki lona avaga : Na au loa kiate au se tagata a le Atua, ti na fai a ia pe se aselo o le Atua, na fakaii a ia. Na leaise kau vesili loa kiate ia pe na au a ia meifea, ti na leaise fakasa mai loa e ia kiate au lona igoa.

⁷ Kae na pati mai loa a ia kiate au : Ko leinei, e ke faitoe loa, ti e ke fanaui loa se tama ; ti e kamata atu loa i le aso nei, ke aua na ke toe inu loa se vino mo se kava, ti e ke aua na ke toe kai loa se nea kelekele, talie e fakatapui loa le fanau lena ki le Atua i le manava o lona tinana o kaku ki le aso o lona mate.

Kole a Manoa

⁸ Na fai loa e Manoa le kole leinei ki le Eteleno : Ei Aliki, ke toe liliu mai kia maua le tagata a le Atua leia na ke kakau mai, ti ke ako mai e ia kia maua le nea leia e tonu ke ma fai ki le toe leia ka tupu loa !

⁹ Na tali loa e le Atua le kole a Manoa, ti na toe au loa le aselo o le Atua ki le fafine. Na tonatona loa le fafine i se faisaga, ti na leaise nofo foki Manoa, lona avaga, mo ia.

¹⁰ Ti na makape vave loa le fafine o fakasa ki lona avaga ; na pati loa le fafine kiate ia : Ko leinei kua sa mai kiate au le tagata leia na au kiate au i le tasi a aso.

¹¹ Ti na tuu ake loa Manoa ki aluga, o mulimuli i lona avaga, o ano ki le tagata, o pati kiate ia : Pe ko koe leia na masau ki le fafine leinei ? Na tali loa le tagata : Ko au.

¹² Ti na pati loa Manoa : Ko leinei, kapau e soko loa au masau, kolea le nea leia e tonu ke ma mulimuli loa ki ai o uiga mo le toe ? Koa a nea ala e tonu ke ma fai loa kiate ia ?

¹³ Na tali loa le aselo o le Eteleno kia Manoa : E tonu loa lou avaga ke tokaga ki nea fuli ala na kau fakasa kiate ia.

¹⁴ Ke aua na kai loa a ia ki se nea leia e maua mei le fua o le vite, ke aua na inu loa a ia ki se vino pe ko se kava, ti ke aua na kai loa e ia se nea kelekele ; ke taupau e ia a nea fuli ala na kau fakasa kiate ia.

¹⁵ Na pati loa Manoa ki le aselo o le Eteleno : Fakataga mai kia maua ke ma fakaafe a koe, ti ke ma teuteui kiate koe se koti muli.

¹⁶ Na tali loa le aselo o le Eteleno kia Manoa : E logo ai kua ke fakaafe au, e leaise kau kai loa lau nea kai ; kae kapau e ke loto ke momoli loa se failaulau ki le Eteleno, ti ke fai a ia ! Na leaise iloa e Manoa ko le aselo a ia o le Eteleno.

¹⁷ Ti na pati loa Manoa ki le aselo o le Eteleno : Ko ai lou igoa, ke ma fakakololia kiate koe i le aso leia e soko ai loa lau pati ?

¹⁸ Na tali loa le aselo o le Eteleno kiate ia : Kolea e ke vesili mai ai loku igoa ? Ko se misitelio a ia.

¹⁹ Na too loa e Manoa le koti muli mo le moliga nea kai, ti na momoli loa e ia se failaulau ki le Eteleno i aluga o le fatu. Ti na soko loa se nea fakamisitelio, o tio loa ki ai a Manoa mo lona avaga :

²⁰ Na pale ake loa le ula o le failaulau i aluga o le aletale ki le lagi, ti ko leinei, kua pale ake loa le aselo o le Eteleno i loto malie o le ula o le aletale. I le tio a Manoa mo lona avaga ki le nea lena, na la fakavilo loa o fakatau ola mata ki le kele.

²¹ Na leaise toe sa loa le aselo o le Eteleno kia Manoa mo lona avaga. Ti na matala loa kia Manoa ko le Aselo o le Eteleno,

²² ti na pati loa a Manoa ki lona avaga : E ta mamate loa, talie kua ta tio ki le Atua.

²³ Na tali loa le fafine kiate ia : Kapau na loto loa le Eteleno ke ta mate, na leaise tali loa e ia le failaulau mo le moliga mei ota lima, ti na leaise fakatio loa e ia taua ki nea fuli ana, ti na leaise fakasa loa e ia kia taua a nea lalasi anei.

^24-25 Na fanaui loa e le fafine se vosa, ti na tuku loa e ia kiate ia le igoa ko Samisoni. Na tupu ake loa le toe o lasi, ti na tapuaki loa kiate ia le Eteleno. Ti na kamata gaoi loa le Laumalie o le Eteleno iate ia i Masane-Tane, i le vasa o Solea mo Esetaoli.