Tuifakamaau 12 - Tosi Tapu

Tautea o Efalaimi

¹ Na tanaki loa a tagata o Efalaimi, ti na lotou ano loa ki le noleto, ti na lotou pati loa kia Sefete : Kolea na ke ano ai o taui a vosa o Amone, kae na leaise ke kalagai mai matou ke motou ano mo koe ? E motou loto ke tutu lou fale ti ke tutu a koe mo ia.

² Na tali loa Sefete kia latou : Ko au mo loku kakai, na motou visi lasi mo vosa o Amone ; ti na kau kalaga atu kia koutou, kae na leaise kotou saofaki loa matou mei olatou lima.

³ I laku tio na leaise kotou au loa o saofaki au, na kau titua loa ki loku mauli, kae na kau ano loa o tau ki vosa o Amone. Na tuku loa latou e le Eteleno ki oku lima. Kolea e kotou au ai i le aso nei o fakalaga tau mai kiate au ?

⁴ Na tanaki loa e Sefete a tagata fuli o Kalaate, ti na tau loa a ia kia Efalaimi. Na tamate loa e tagata o Kalaate a Efalaimi, talie na pati le kau Efalaimi : Ko koutou, kau Kalaate, ko ni kau sosola koutou o Efalaimi, ala na fakalaka mei Efalaimi ki Manase.

⁵ Na maua loa e Kalaate a aleso o le Solotane i le fetuu o Efalaimi. Ti ka pati loa se tasi o le kau sosola o Efalaimi : Tuku ke kau fakalaka ! Na vesili loa a tagata o Kalaate kiate ia : Pe ke Efalaimi ? Ti ka tali loa a ia : leai !

⁶ Ti na lotou pati loa kiate ia : ke ke pati Sipoleti. Ti na pati loa a ia Sipoleti, talie na leaise puaki malie loa e ia le kupu lena. Ti na too loa a ia e tagata o Kalaate, o tamate i tafa o le Solotane. Na mate loa i le temi lena a tino fa tupu lua afe o tagata o Efalaimi.

⁷ Na tui fakamaau loa Sefete i Iselaele i fetuu e ono ; ti na mate loa a Sefete, tagata Kalaate, ti na tanu loa a ia i Kalaate i lona kolo tupu.

Ipisani, Eloni, Apitone

⁸ I ona muli, na tui fakamaau i Iselaele a Ipisani o Peteleemi.

⁹ Na maua loa e ia ni vosa e tino tolu mo ni taine e tino tolu. Na soli loa e ia ona taineliki ke avaga ki tafa o lona faasiga, ti na aumai loa e ia ni fafine e tino tolu mei tafa ke avaga mo ona vosa. Na tui fakamaau a ia i Iselaele i fetuu e fitu.

¹⁰ Ti na mate loa Ipisani, ti na tanu loa a ia i Peteleemi.

¹¹ I ona muli, na tui fakamaau loa i Iselaele a Eloni o Sapulone. Na tui fakamaau a ia i fetuu e kau agafulu ;

¹² Ti na mate loa Eloni, ti na tanu loa a ia i Asaloni, i le fenua o Sapulone.

¹³ I ona muli, na tui fakamaau loa i Iselaele a Apitone, vosa o Ilele, tagata Pilatoni.

¹⁴ Na maua loa e ia ni vosa e tino fa mo ni makopuna e kau tolu, ala na eke loa i ni asino e kau fitu. Na tui fakamaau a ia i Iselaele i le lolotoga o fetuu e valu ;

¹⁵ ti na mate loa Apitone, vosa o Ilele, tagata Pilatoni, ti na tanu loa a ia i Pilatoni, i le fenua o Efalaimi, i le mauga o le kau Amaleke.