Tuifakamaau 11 - Tosi Tapu

Sefete, tui fakamaau i Iselaele

¹ Ko Sefete, tagata o Kalaate, ko se tagata tau na loto toa. Ko le vosa a ia o se tagata na igoa ko Kalaate ki se fafine faiaga.

² Na toe fanaui foki e le avaga totonu o Kalaate ni iki a vosa kiate ia. Ti na lalasi ake loa a vosa o le fafine lena, ti na lotou kapu loa Sefete, o pati kiate ia : E leaise ke maua ia loa se tofiga i le fale o lomatou tamana talie ko koe ko le vosa ki se fafine kese.

³ Ti na sola loa Sefete o mamao mei ona fetaina, ti na nofo loa a ia i le fenua o Topi. Na fakatasi ake loa ni tagata noa kia Sefete, ti na lotou ano loa o tau mo ia.

⁴ Na leaise fualoa, ti na ano loa a vosa o Amone o tau ki Iselaele.

⁵ I le teuteu tau a vosa o Amone ki Iselaele, na ano loa le kau matua o Kalaate o afa Sefete i le fenua ko Topi.

⁶ Ti na lotou pati loa kia Sefete : Au mo matou, ti e ke liliu loa ko lomatou pule tau, ti e motou tau loa ki vosa o Amone.

⁷ Na tali loa Sefete ki le kau matua o Kalaate : Pe na leaise kotou vesia loa kiate au, o kapu loa au mei le fale o loku tamana ? Kolea kua kotou au ai loa kiate au i le temi leinei kua kotou nofo ai loa i le mamae ?

⁸ Na tali loa le kau matua o Kalaate kia Sefete : E motou toe au loa kiate koe i le temi leinei, o tupu ke ke saele mo matou, ke ke taui a vosa o Amone, ti ke ke liliu loa ko lomatou pule, ti mo le pule o le kakai katoa o Kalaate.

⁹ Na tali loa Sefete ki le kau matua o Kalaate : Kapau e kotou ave loa au ke tau ki vosa o Amone, ti kapau e tuku loa latou e le Eteleno ki oku lima, e kau liliu loa ko lokoutou pule.

¹⁰ Na pati loa le kau matua o Kalaate kia Sefete : Ke logo mai le Eteleno kia matou, ti ke fakamaau a ia, mo kapau e leaise motou fai loa le nea leia e ke pati ki ai.

¹¹ Ti na ano loa Sefete mo le kau matua o Kalaate. Na tuku loa a ia e le kakai ki lona ulu, o fakanofo loa a ia ko lolatou pule, ti na toe lau loa e Sefete i mua o le Eteleno, i Misipa, a masau fuli ala na fai e ia.

¹² Na kakau loa e Sefete ni tagata avelogo ki le sau o vosa o Amone, o pati kiate ia : Pe i ai se nea i le vasa o ou mo au ke ke au ai o taui au i loku fenua ?

¹³ Na tali loa le sau o vosa o Amone ki tagata avelogo a Sefete : Talie na too loa loku fenua e Iselaele, i le aso leia na mavae ai a ia i Esipito, mei Alenone o kaku ki Sapoke mo le Solotane. Ke ke toe tuku mai a ia kiate au i le aso nei mo le loto malie.

¹⁴ Na toe kakau loa e Sefete ni iki tagata avelogo ki le sau o vosa o Amone,

¹⁵ o pati kiate ia : Ko leinei le masau a Sefete : Na leaise too e Iselaele le fenua o Moape, ti mo le fenua o vosa o Amone.

¹⁶ Talie, i le aso na mavae ai a Iselaele mei le fenua o Esipito, na saele loa a ia i le toafa o kaku ki le tai kula, ti na nofo loa a ia i Katesi.

¹⁷ Ti na kakau loa e Iselaele ni tagata avelogo ki le sau o Etome, o pati kiate ia : Fakataga mai kiate au ke kau fakalaka i lou fenua. Kae na leaise tali loa e le sau o Etome. Na toe kakau foki e Iselaele ni iki ake tagata avelogo ki le sau o Moape, kae na leaise tali e ia.

¹⁸ Ti na saele loa Iselaele i le toafa, o foli takai le fenua o Etome mo le fenua o Moape, ti na au loa a ia i le fetuu esite o le fenua o Moape ; na lotou fakatuu loa lolatou nofolaga i leia atu fetuu o le liua o Alenone, kae na leaise lotou ulu loa ki le fenua o Moape, talie ko le Alenone ko le koiga a ia o Moape.

¹⁹ Na kakau loa e Iselaele ni tagata avelogo kia Sioni, sau o le kau Amole, sau o Eseponi, ti na pati loa Iselaele kiate ia : Fakataga mai ke motou fakalaka i lou fenua o kaku ki le ganea leia e motou ano ki ai.

²⁰ Kae na leaise fanaki loa Sioni kia Iselaele o tuku a ia ke fakalaka i lona fenua ; ti na fakatasii loa e Sioni lona kakai katoa i Saatesi o taui Iselaele.

²¹ Na tuku loa e le Eteleno, le Atua o Iselaele, a Sioni mo lona kakai katoa ki lima o Iselaele leia na tamate ia loa latou. Ti na maua loa e Iselaele le fenua katoa o le kau Amole ala na nofo i le fenua lena.

²² Na lotou maua loa le fenua katoa o le kau Amole, mei le Alenone o kaku ki le Sapoke, ti mei le toafa o kaku ki le Solotane.

²³ Ti ko leinei ko le Eteleno, le Atua o Iselaele, leia na kapu ia le kau Amole i mua o le kakai o Iselaele, pe ko koe, leia e loto loa i le aso nei ke ke toe too a ia ?

²⁴ Pe leaise ke maua ia le fenua leia na soli atu kiate koe e lou atua ko Kemosi ? Ti ko matou foki, e tonu ke motou maua ia a nea fuli ala na soli mai kia matou e le Eteleno ko lomatou Atua !

²⁵ Pe ke masalo e ke makeke ake ia Palaki, vosa o Tesipoli, sau o Moape ? Kae ko ia, na leaise afa e ia ke fefele mo Iselaele pe ke tau kiate ia.

²⁶ Ko fetuu anei e kau lelau tolu mo le nofo a Iselaele i Eseponi mo ona kolo liliki, mo Aloeli mo ona kolo liliki, ti mo kolo fuli ala e tuu i kauvai o Alemone : kolea na leaise kotou too ai a kolo ana i le temi fuli lena ?

²⁷ E leaise ko au leia kua agaveli kiate koe, ko koe leia kua agaveli mai kiate au, o taui au. Ke tuu i le aso nei le Eteleno, leia ko le tui fakamaau o tagata fuli, o fakamaaui a fanau a Iselaele mo fanau a Amone !

²⁸ Na leaise fakalogo loa le sau o vosa o Amone ki masau a Sefete kiate ia.

Malo i Amone ; taine o Sefete

²⁹ Na ifo loa le Laumalie o le Eteleno kia Sefete, ti na fakalaka loa a ia i Misipa o Kalaate ; mei Misipe o Kalaate, na saele loa a ia ki vosa o Amone.

³⁰ Na fai loa e Sefete se fakapapau ki le Eteleno, o pati : Kapau e ke tuku loa ki oku lima a vosa o Amone,

³¹ ti ko leia e ulu mai loa ki fafo mei le matapa o loku fale o fakafetaulaki mai kiate au, i le aso leia e kau liliu mai ai loa mo le malo i vosa o Amone, e fakatapui loa ki le Eteleno, ti e kau momoli loa a ia i se failaulau.

³² Na saele loa Sefete ki vosa o Amone, ti na tuku loa latou e le Eteleno ki ona lima.

³³ Na tamate fakaveliveli loa latou e Sefete, ti na too loa e ia a kolo e kau lua, mei Aloele o kaku ki Miniti mo Apele-Kelamime. Ti na popula loa a vosa o Amone ki fanau a Iselaele.

³⁴ Na toe liliu loa Sefete ki lona fale i Misipa. Ti ko leinei na ulu ake loa ki fafo lona taine o fakafetaulaki kiate ia mo ni tapulini ti mo ni mako. Ko lana fanau lena e tasi ; na leaise maua e ia sona vosa pe ko se tasi ake taine.

³⁵ I lana tio ki lona taine, na sae loa e ia lona kofu, o pati : Oi ! ei loku taine, e ke tuku au ki le malaia, ko koe totonu leia e fakatupu ia loku mamae ! Na kau fakamavaa loku gutu o lasi i mua o le Eteleno, ti kua leaise kau toe mafai ia ke toe liliu ki muli.

³⁶ Na pati loa lona taine kiate ia : Tamana, na ke fakamavaa lou gutu o lasi i mua o le Eteleno, ke ke fai kiate au o mulimuli ki le nea leia kua puaki e lou gutu, talie i le aso nei kua totogi kiate koe e le Eteleno ou fili, a vosa o Amone.

³⁷ Ti na pati loa a ia ki lona tamana : Ke ke tali laku kole leinei : Tuku mai kiate au ni masina e lua ! E kau ano loa o taka i le atu mauga, o tagi i ai ki loku taupoou, e au mo oku kaukaufafine.

³⁸ Na tali loa Sefete kiate ia : Ano ! Ti na tuku loa e ia kiate ia a masina e lua. Ti na ano loa le taine mo ona kaukaufafine, ti na tagi loa e ia lona taupoou i le atu mauga.

³⁹ I le oki o masina e lua, na toe liliu loa a ia ki lona tamana, ti na fakasoko loa e Sefete kiate ia le fakapapau leia na fai e ia. Na leikiaise iloa e ia se tagata. Mei le aso lena, na tuu loa i Iselaele le lekula leinei :

⁴⁰ I fetuu fuli e ano loa taineliki o Iselaele o fakamanatu le taine o Sefete, tagata Kalaate, i aso e fa.