Tuifakamaau 10 - Tosi Tapu

Tola mo Saili, tui fakamaau i Iselaele

¹ I muli o Apimeleke, na tuu ake loa a Tola, vosa o Pua, vosa o Toto, tagata o Isakale, o saofaki Iselaele ; na nofo loa a ia i Samili, i le mauga o Efalaimi.

² Na tui fakamaau loa a ia i Iselaele i fetuu e kau lua ; ti na mate loa a ia, ti na tanu loa a ia i Samili.

³ I ona muli, na tuu ake loa Saili, tagata o Kate, leia na tui fakamaau loa i Iselaele i fetuu e kau lua tupu lua.

⁴ Na maua loa e ia ni vosa e tino tolu, ala na eke i ni asino e kau tolu ti na maua ia ni kolo e kau tolu, ala na fakaigoa ko kolo o Saili o kaku mai ki le aso nei, ti na tuu i le fenua o Kalaate.

⁵ Ti na mate loa Saili, ti na tanu loa a ia i Kamoni.

Mamae o Iselaele i le kau Filisitini mo le kau Amone

⁶ Na toe fai loa e fanau a Iselaele le nea leia na veli ki mata o le Eteleno : Na lotou tausi loa Paale mo Asetalate, ko atua o Silia, mo atua o Sitone, mo atua o Moape, mo atua o Amone, ti mo atua o le kau Filisitini. Na lotou tiaki loa le Eteleno ti na leaise lotou toe tausi loa kiate ia.

⁷ Na vilo loa le sausau o le Eteleno ki Iselaele, ti na tuku loa e ia latou ki lima o le kau Filisitini mo lima o vosa o Amone.

⁸ Na lotou fakavelivelii loa ti na lotou fakamamae loa a fanau a Iselaele i le fetuu lena, ti mo fanau fuli a Iselaele ala na nonofo i le fetuu esite o le Solotane i le fenua o le kau Amole i Kalaate i fetuu e kau agafulu tupu valu.

⁹ Na fakalaka loa a fanau o Amone i le Solotane o taui a Suta, mo Pesamino ti mo le fale o Efalaimi. Ti na mamae lasi ai Iselaele.

¹⁰ Na tagi loa fanau a Iselaele ki le Eteleno, o pati : Kua motou agasala loa kiate koe, talie kua motou tiaki loa lomatou Atua, o motou tausi loa kia Paale.

¹¹ Na pati loa le Eteleno ki fanau a Iselaele : Pe na leaise kau saofaki loa koutou mei le kau Esipito, mo le kau Amole, mo vosa o Amone, mo le kau Filisitini ?

¹² Pe na leaise kau saofaki loa koutou mei le lima o le kau Sitone, mo le kau Amaleke ti mo le kau Maoni, ala na fakamamae ia loa koutou, i le aso leia na kotou tagi mai ai loa kiate au ?

¹³ Kae ko koutou, na kotou tiaki loa au kae kotou tausi loa ki ni atua kese. Koia na leaise kau toe saofaki ai loa koutou.

¹⁴ Kotou ano, kotou tagi ki atua ala na kotou aga o filifili ; ke lotou saofaki koutou i le temi o lokoutou mamae !

¹⁵ Na pati loa fanau a Iselaele ki le Eteleno : kua motou agasala loa ; fai kia matou lou finegalo. Ko leia fua, saofaki matou i le aso nei !

¹⁶ Ti na lotou too loa a atua kese ala na nofo mo latou kae lotou tausi loa ki le Eteleno, leia na logoi ia loa i lona loto a mamae o Iselaele.

¹⁷ Na fakatasi loa a vosa o Amone i Kalaate, kae na fakatasi loa a fanau a Iselaele i Misipa.

¹⁸ Na femasauaki loa le kakai, mo pule o Kalaate : Ko ai le tagata e kamata ia loa le tau ki vosa o Amone ? E pule loa a ia ki le kakai katoa o Kalaate.