Tolu tosi a Soane 1 - Tosi Tapu

Fakaalofa

¹ Ko le tagata fakamatuatua, kia Kaiusi, ko le alofaaga, leia e kau alofa ki ai i le maoki.

² Ei alofaina, e kau fakaamu ke ke manuia i au nea fuli ti mo ke malolo, ofaipe le manuia o lou laumalie.

Ko le agatonu o Kaiusi

³ Kua kau fiafia lasi ai, i le tau mai o ni fetaina o fakamaoki ki le maoki leia e nofo iate koe, ti mo lau saele i le maoki.

⁴ E leaise kau maua se fiafia lasi ake, mo ka kau logo e saele aku fanau i le maoki.

⁵ Alofaina, e ke agatonu i le nea leia e ke fai ki fetaina, ti mo fetaina matapule foki,

⁶ ala kua fakamaoki ki lou alofa i mua o le Ekelesia. E kau kole atu kiate koe, ke ke tokoi kia latou ke soko atu lalatou folau, i se tokoi leia e gali mo le Atua.

⁷ Talie kua lotou ano, o tupu ko le suafa o Sesu-Kilisito, ti na leaise lotou tali se tokoi mei le kau pagani.

⁸ Koia e tonu ai ke tou tali a tagata fenaaki, o tupu ke tou kau gaoi fakatasi mo latou ki le maoki.

Tiotelefo mo Temetiliusi

⁹ Na kau tosi ni ga kupu ki le Ekelesia ; kae ko Tiotelefo leia e fia tuu mua ia latou, e leaise koi fakatalitali e ia matou.

¹⁰ Koia, kapau e kau natu, e kau fakamanatu loa le veli katoa leia e fai e ia, a masau veveli mo loi ala e lau e ia kia matou. Kae e leaise feauga le nea lena kiate ia, e leaise fakatalitali e ia fetaina, ti e taofi e ia latou ala e loto ki ai, o kapu latou mei le Ekelesia.

¹¹ Alofaina, aua na ke faifaitaki ki le veli, kae ki le malie. Ko leia e fai ia le malie e kau a ia ki le Atua, kae ko leia e fai ia le veli, na leaise tio a ia ki le Atua.

¹² Kua fakamaoki malie kia Temetiliusi le kakai fuli, ti mo le maoki foki ; ti ko matou foki, e motou fakamaoki kiate ia, ti e ke iloa e maoki lamatou fakamaoki.

¹³ E lasi a nea ala e kau loto ke tosi atu kiate koe, kae e leaise kau loto ke fai a ia ki le vaitosi mo le peni.

¹⁴ E kau amanaki malie kua vave saku tio kiate koe, ti e ta masasau gutu loa.

¹⁵ Ke nofo iate koe le tokamalie ! E fakaalofa atu kiate koe a fetaina fuli ; fakaalofa atu ki fetaina fuli i lena, kia latou taki toka tasi.