Tito 3 - Tosi Tapu

Tokoi ki le mauli fakakilisiteano

¹ Fakamanatu kia latou ke lotou fakataulalo ki le kau takitaki mo le kau pule, ke lotou fakalogo kia latou mo nofo teuteu ki gaoi malilie fuli ;

² ke aua na lotou lauveli ki se tasi, ke lotou fakatokatoka, mo fakapotopoto, mo apele i le agamalu ki tagata fuli.

³ Talie ko tatou foki, na tou valelea i mua, mo patigataa, mo sese, mo popula ki olioli noa mo manumanu fuli, na tou mauli i le agaveli mo le loto veli, ti na tou vesia ti na vesia mai foki kia tatou.

⁴ Kae i le oki o le fakasa o le agamalie o le Atua ko lotatou Fakamauli ti mo lona alofa ki le tagata,

⁵ kua saofaki e ia tatou, o leaise tupu ko gaoi o le faitotonu ala na tou fai, kae o mulimuli ki lona manavaalofa, ki le maanu o le tupu foou mo le fakafoou a le Laumalie Maokioki.

⁶ Na liligi e ia a ia kia tatou o lasi ai ia Sesu-Kilisito, ko lotatou Fakamauli,

⁷ o tupu ke fakamatatonu tatou ki lona kalasia, ti ke tou mau tofiga le mauli lee gato leia e tou amanaki malie ki ai.

⁸ E maoki le folafola lena, ti e kau loto ke ke fakasa fakamakeke tuumau a nea ana, o tupu ke tokaga latou ala kua tui ki le Atua o fai ni gaoi malilie. Ko lena le nea leia e malie mo aoga ki tagata.

⁹ Kae ke ke tekei a vesili fakavale, mo visi sologa, mo fefele, mo visi ki le lao, talie e lotou lee aoga mo vaiga.

¹⁰ Ke ke fakamamao meiate koe leia e fakatupu mavaevae, i le oki o lona akonakii tua tasi pe tua lua ;

¹¹ Ke ke iloa ko se tagata fenaaki, kua mavae a ia i le ala o le maoki, ti e fakasa e ana agasala kua nofo a ia i le fai sala.

Fakatotonu fakaoki

¹² Ka kau kakau atu loa kiate koe a Aletemasi pe ko Tisike, ke ke fakavilivili loa o au kiate au i Nikopolisi, talie ko lena le ganea leia kua kau fakatotonu ke kau nofo ai i le temi momoko.

¹³ Ke ke tokaga o tokoi ki le folau a Senasi, ko le toketa o le lao, ti mo Apolosio, ke aua na puli se nea kia laua.

¹⁴ E tonu ke ako e latou foki ala o tatou, ke lotou fai a gaoi malilie ala e aoga ki nea fakavilivili, o tupu ke lotou mauli aoga.

¹⁵ E fakaalofa atu kiate koe latou fuli ala e nonofo mo au. Fakaalofa atu kia latou ala e alofa mai kia matou i le tui. Ke nofo ia koutou fuli le kalasia !