Tito 2 - Tosi Tapu

Taupau le akonaki maoki

¹ Kiate koe, fakasa a nea ala e gali mo le akonaki totonu.

² Fakasa ki le kau matua, e tonu ke lotou tokaga, mo agatonu, mo fakapotopoto, ti mo saosaoa i le tui, mo le alofa, ti mo le kataki fualoa.

³ Fakasa ki fafine matutua, e tonu foki ke lotou maua se aga leia e gali mo le maokioki, ti ke aua na lotou fatufatu, pe fakavalevale ki le kava ; kae e tonu ke lotou tuku ni tokoi malilie,

⁴ o tupu ke lotou ako ki le kau fafine tupulaga ke alofa ki olatou avaga mo alatou fanau,

⁵ ti ke lotou fakapotopoto, mo mea, mo tokaga ki gaoi fakalotofale, mo agamalie, mo fakataulalo ki olatou avaga, o tupu ke aua na lauvelii le folafola a le Atua.

⁶ Ke ke ekenaki foki le kau tupulaga ke lotou fakapotopoto,

⁷ o ke fakasa e koe totonu i nea fuli se faifaitakiaga o gaoi malilie, ti mo ke tuku se akonaki mea, mo gali,

⁸ ti mo se folafola maoki, mo lee sala, o tupu ke luma ai leia e fakafesagai, talie e leaise maua e ia se nea leia ke lauveli ai kia tatou.

⁹ Ke ke ekenaki le kau fakasausau ke lotou fakataulalo ki olatou pule, ke lotou malilie i nea fuli kia latou, ke aua na lotou taugutu,

¹⁰ ke aua na lotou kaia, kae ke lotou fakasa tuumau se agatonu mo agamalie tuumau kia latou i nea fuli, o tupu ke lotou fakasa i nea fuli le kololia o le akonaki a le Atua ko lotatou Fakamauli.

Fakasa o le kalasia o le Atua

¹¹ Talie kua fakasa le kalasia o le Atua, matapuna o le mauli ki tagata fuli.

¹² E ako mai e ia kia tatou ke tiaki le aga lee fakaatua mo olioli fakamalama, kae ke tou mauli i le sekulo leinei o mulimuli ki le poto, mo le maokioki, ti mo le agamalie ki le Atua,

¹³ o talitali ki le amanaki malie manuia, ti mo le fakasa o le kololia o lotatou Atua lasi ti mo lotatou Fakamauli ko Sesu-Kilisito.

¹⁴ Na soli e ia a ia totonu o tupu ko tatou, o tupu ke totogi ai tatou mei agaveli fuli, ti ke fai e ia kia tatou se kakai maokioki ma ana, leia e mafi lasi ki gaoi malilie.

¹⁵ Fakasa a nea ana, ekenaki, ti mo valoki i le makeke katoa. Ke aua na nukinuki se tasi kiate koe.