Tito 1 - Tosi Tapu

Fakaalofa

¹ Ko au Paulo, tagata fakasausau a le Atua, ti ko le apositolo a Sesu-Kilisito ki le tui a le kau filifiliia a le Atua, ti mo le iloa o le maoki leia e mulimuli ki le aga fakaatua,

² ala e fakatafito ki le amanaki malie o le mauli lee gato, leia na fakapapau i mua o sekulo fuli e le Atua leia e leaise loi,

³ ti kua fakasa ia lana folafola i lona temi i le akonaki leia kua tuku mai kiate au o mulimuli ki le fakatotonu a le Atua ko lotatou Fakamauli,

⁴ kia Tito, ko laku fanau totonu i le tui leia e ta fakatasi ai : Ko le kalasia mo le tokamalie ke soli atu kiate koe e le Atua ko le Tamana ti mo Sesu-Kilisito ko lotatou Fakamauli !

Kavega na tuku kia Tito ke fakatuutuu le Ekelesia o Kelete

⁵ Na kau tuku a koe i Kelete, o tupu ke ke fakatokatoka le nea leia koi toe ke fakatokatoka, ti ke ke fakanofo, o mulimuli ki aku fakatotonu, ni fakamatuatua i kolo taki tasi,

⁶ mo kapau e maua i ai se tagata leia e lee sala, ko le avaga o se fafine e tasi, e tui ana fanau, ti e leaise valoki latou i le mauli fakalialia pe ko le patigataa.

⁷ Talie e tonu ke lee sala le epikopo, ofaipe se tagata taupau koloa a le Atua ; ke aua na fia nealasi a ia, mo itaita, mo inu kava, mo agamakeke, mo manumanu ki koloa fakalumaluma,

⁸ kae ke fakatalitali kaiga malie a ia, ti ke kaukau nea a ia mo tagata malilie, mo fakapotopoto, mo faitotonu, mo maokioki, mo loto lolomi,

⁹ ti ke pipiki a ia ki le folafola maoki ofaipe lona akonaki atu, o tupu ke mafai foki e ia lana ekenaki mo lana valoki ki le akonaki totonu latou ala e fakafesagai.

¹⁰ Talie e toka api latou, tafito i le kau silikosisio kua tafoki, ala e agatuu, mo masau noa, ti mo kaka :

¹¹ Ti e tonu ke tapono olatou gutu. E lotou kakai ni famili katoa, o akonaki le nea leia e leaise tonu ke akonaki o tupu ko se totogi fakalumaluma.

¹² Ko se tasi o latou, ko lolatou polofeta totonu, na pati : Kau Kelete gutu loiloi tuumau, kau manu fekai, kau manava gasueveli.

¹³ E maoki le fakamaoki lena. Koia ke ke valoki fakamakeke ai latou, o tupu ke lotou maua se tui mea,

¹⁴ ti ke aua na lotou pipiki ki fanaga fakasutea mo ni fakatotonu a ni tagata ala e titua ki le maoki.

¹⁵ E mea nea fuli kia latou ala e mea ; kae e leaise mea se nea kia latou ala e kelekele mo tui gataa ; talie kua kelekele olatou atamai mo olatou loto.

¹⁶ E lotou pati kua lotou iloa le Atua, kae e lotou fakafiti kiate ia i alatou gaoi : talie e lotou aga fakalialia, mo patigataa, ti e leaise lotou mafai ia fua se gaoi malie e tasi.