Tetelonome 9 - Tosi Tapu

Fakamanatu o agatuu a Iselaele

¹ Ke ke fakalogo, Iselaele ! E ke fakalaka loa i le aso nei i le Solotane, o ano loa o maua ni puleaga ala e lalasi ake mo makeke ake iate koe, mo ni kolo lalasi ala kua fakamakeke o kaku ki le lagi,

² mo se kakai makeke mo lalasi, ko fanau a Anake, ala e ke iloa, ti na ke logo e pati ki ai : ko ai e feala loa ke tuu i mua o vosa o Anake ?

³ Ke ke iloa i le aso nei e muamua loa iate koe le Eteleno, lou Atua, ofaipe se afi maumau, ti ko ia leia e maumaui ia loa latou, mo fakamamae ia loa latou i ou mua ; ti e ke kapu loa latou, ti e ke tamate fakatavili loa latou, ofaipe le pati a le Eteleno kiate koe.

⁴ Ka kapu loa latou e le Eteleno, lou Atua, i ou mua, ke aua na ke pati loa i lou loto : ko loku maokioki leia e fakaulu ai au e le Eteleno o maua tofiga le fenua leinei. Talie e kapu latou e le Eteleno i ou mua, o tupu ko le agaveli o puleaga ana.

⁵ Leai, e leaise se tupu ai ko lou maokioki mo le agatonu o lou loto leia e ke ulu ai loa o maua tofiga lolatou fenua ; kae e tupu ko le agaveli o puleaga ana leia e kapu ai latou e le Eteleno, lou Atua, i ou mua, ti ke fakamaoki ai le folafola leia na fakapapau e le Eteleno ki ou tamana, kia Apalaamo, mo Isaake, mo Sakopo.

⁶ Koia ke ke iloa ai e leaise tupu ko lou maokioki leia e soli ai e le Eteleno, lou Atua, ke ke maua tofiga le fenua malie leinei ; talie ko koe ko se kakai ua fefeka.

⁷ Ke ke manatui, ti ke aua na galo iate koe le aso leia na ke fakatupu ai le sausau o le Eteleno, lou Atua, i le toafa. Na ke fakafesagai ki le Eteleno mei le aso leia na ke mavae ai i le fenua o Esipito o kaku ki le aso leia na ke kaku mai ai ki le ganea leinei.

⁸ I Olepe, na kotou fakatupu ia le sausau o le Eteleno ; ti na sausaua le Eteleno kia koutou, o loto a ia ke maumaui koutou.

⁹ I le aso lena na kau pale ai loa ki le mauga, o tali a laui fatu o le sai leia na fai e le Eteleno mo koutou. Na kau nofo loa i le mauga i aso e kau fa mo po e kau fa, ti na leaise kau kai fua se pane ti mo inu fua se vai ;

¹⁰ ti na tuku mai loa kiate au e le Eteleno a laui fatu e lua, ala kua tosi ai e lona lima totonu a folafola fuli ala na fakasa e ia kia koutou mei loto malie o le afi, i le aso leia na kotou fakatasi ai i lalo o le mauga.

¹¹ I le oki o aso e kau fa mo po e kau fa, na soli mai loa e le Eteleno kiate au a laui fatu e lua o le sai.

¹² Na pati mai loa le Eteleno kiate au : Ke ke tuu ki aluga, o ifo vave i leinei, talie ko le kakai leia na ke fakamavae mei Esipito kua fai ia se agasala veli, ti kua lotou mavae fakatavili mei le ala leia na kau fakasa kia latou, ti kua lotou fai kia latou se fakatata ki le ukamea saka.

¹³ Na pati mai loa le Eteleno kiate au : E kau tio ko le kakai leinei ko se kakai ua fefeka.

¹⁴ Tuku ke kau maumaui latou mo soloi lolatou igoa i lalo o le lagi ; ti e kau fai loa meiate koe se puleaga leia e makeke ake mo api ake i le kakai lena.

¹⁵ Na kau toe liliu loa ti na kau ifo loa mei le mauga, leia na ulaula katoa, mo laui fatu e lua o le sai i oku lima.

¹⁶ Na kau tio loa, ti ko leinei, kua kotou agasala ki le Eteleno, lokoutou Atua : kua kotou fai se uviki pipi ki se ukamea saka ; kua kotou mavae fakatavili mei le ala leia na fakasa e le Eteleno kia koutou.

¹⁷ Na kau too loa a fatu e lua, ti na kau ti loa laua mei oku lima, ti na kau maumaui loa laua i okoutou mua.

¹⁸ Na kau punou loa o fakatau oku mata ki le kele i mua o le Eteleno, ti na kau nofo loa i ai, ofaipe mua, i aso e kau fa mo po e kau fa, e leaise kai ti e leaise inu, o tupu ko agasala fuli ala na kotou fai, o fai le nea leia e veli ki mata o le Eteleno ke tupu ai lona sausau.

¹⁹ Talie na kau i ai i laku tio ki le sausau leia kua nofo mo le Eteleno kia koutou, talie kua loto a ia ke maumaui e ia koutou. Kae na toe tali loa e le Eteleno laku tagi i le faiaga lena.

²⁰ Na sausaua veli foki le Eteleno kia Alone, o loto ke maumaui a ia : Kae na kau toe tagi foki o uiga mo Alone i le temi lena.

²¹ Na kau too loa le uviki pipi, le fua o lakoutou agasala, ti na kau tutu loa a ia i le afi. Na kau fatifatii loa a ia, ti na kau tuki loa a ia o momomomo ofaipe se efu, ti na kau tiaki loa le efu lena ki le liua leia e ifo mei le mauga.

²² I Tapela, mo Masa, mo Kipiloti-Ataava, na kotou fakatupu loa le sausau o le Eteleno.

²³ Ti ko le aso leia na kakau ai koutou e le Eteleno ki Katesi-Palenea, o pati kia koutou : ke kotou pale ti ke kotou maua tofiga le fenua leia e kau soli kia koutou, na kotou agatuu loa ki le fakatotonu a le Eteleno, lokoutou Atua, ti na leaise kotou tui loa kiate ia, ti na leaise kotou fakalogo loa ki lona leo.

²⁴ E talu laku iloa koutou, mo lakotou fakatutuu tuumau ki le Eteleno.

²⁵ Na kau punou loa o fakatuu oku mata ki le kele i mua o le Eteleno, ti na kau nofo loa o punou i le kele i aso e kau fa mo po e kau fa, o tupu na pati le Eteleno kua loto a ia ke maumaui e ia koutou.

²⁶ Na kau kole ki le Eteleno, o kau pati : Aliki Eteleno, ke aua na ke maumaui lou kakai, lou tofiga, leia na ke saofaki i lou mafimafi, leia na ke fakamavae mei Esipito ki lou lima makeke.

²⁷ Ke ke manatui au tagata fakasausau ko Apalaamo, mo Isaake, mo Sakopo. Ke aua na ke tio ki le patigataa o le kakai leinei, mo lona agaveli, mo lana agasala.

²⁸ E leaise tonu ke pati loa le kakai o le fenua leia na ke fakamavae matou mei ai : E tupu kua leaise mafai e le Eteleno le fakaulu o le kakai lena ki le fenua leia na fakapapau e ia ke soli kia latou, ti e tupu na vesia le Eteleno kia latou, o fakamavae e ia latou ke maumaui latou i le toafa.

²⁹ Kae e maoki ko lou kakai latou, ko lou tofiga, leia na ke fakamavae ki lou makeke lasi mo lou lima falo.