Tetelonome 8 - Tosi Tapu

Le fenua o le fakapapau mo le loto fakafetai ki le Atua

¹ Ke kotou tausi loa ti mo kotou fai loa a folafola fuli ala e kau tuku kia koutou i le aso nei, o tupu ke kotou mauli, ti ke kotou liuliuga, ti ke kotou ulu o maua tofiga le fenua leia na fakapapau e le Eteleno ke soli ki okoutou tamana.

² Ke ke manatui le ala katoa leia na taki ai a koe e le Eteleno, lou Atua, i fetuu ana e kau fa i le toafa, ke fakamamae ai a koe, ti ke asiasii ai a koe, ti ke iloa ai a anoaga o lou loto, pe ke tausi loa pe leai ana folafola.

³ Na fakamamae e ia a koe, na fakapakupaku e ia a koe, na fagai e ia a koe ki le mane, leia na leaise ke iloa, ti na leaise iloa e ou tamana, ke ako kiate koe e leaise mauli fua le tagata ki le pane, kae e mauli a ia ki nea fuli ala e ulu mei le gutu o le Eteleno.

⁴ Na leaise popo lou lava iate koe, ti na leaise fufula lou vae i fetuu ana e kau fa.

⁵ Ke fakamaoki lou loto e tautea a koe e le Eteleno, lou Atua, ofaipe se tagata leia e ako ia lana fanau.

⁶ Ke ke tausi loa a fakatotonu a le Eteleno, lou Atua, ti mo ke saele i ona ala, ti mo ke i kiate ia.

⁷ Ko leinei, ka fakaulu loa a koe e le Eteleno, lou Atua, ki se fenua malie, fenua o liua, mo matapuna, mo vai, ala e mapuna ake mei le kele loloto i vaivailiua mo mauga ;

⁸ fenua o le fulumeto, mo le olese, mo le vite, mo le fiki, mo le kelenati ; fenua o le olive mo le meli ;

⁹ fenua leia e ke kai ai loa le pane i le mou, leia e leaise toe puli ai loa se nea kiate koe ; fenua leia e fatu ko ukamea, ti e ta mei ona mauga le kapa.

¹⁰ Ka ke kai loa ti e ke makona loa, ke ke fakafetai loa ki le Eteleno, lou Atua, o tupu ko le fenua malie leia na soli atu e ia kiate koe.

¹¹ Ke ke tokaga ai na galo loa iate koe le Eteleno, lou Atua, o ke tiaki loa ana folafola, mo ana fakatotonu, mo ana lao, ala e kau tuku kiate koe i le aso nei.

¹² Ka ke kai loa ti e ke makona loa, ka ke fakatuu loa ti e ke nofoi loa ni fale fulumalie,

¹³ ka ke tio loa kua tupu o lasi lau kau manu liliki mo lau kau manu lalasi, ti kua tupu o lasi lau paaga mo lau aulo, ti kua tupu o lasi au nea fuli,

¹⁴ ke ke tokaga ai na makita loa lou loto, o ke galoi loa le Eteleno, lou Atua, leia na fakamavae ia a koe mei le fenua o Esipito, mei le fale o le popula,

¹⁵ leia na fakasaele ia a koe i le toafa lasi leinei mo fakaii, leia e maua ai a gata kona, mo sekolopio, mo le laaina, mo le malo ; leia na fakasali ia kiate koe se vai mei le utu fefeka ;

¹⁶ leia na fagai ia a koe i le toafa ki le mane leia na leaise iloa e ou tamana, o tupu ke fakamamae ai a koe mo asiasii ai a koe, talie ke fai kiate koe se nea leia e malie loa ki muli.

¹⁷ Ke aua na ke pati loa i se aso i lou loto : ko loku makeke mo le makeke o loku lima leia kua kau maua ai a koloa anei.

¹⁸ Ke ke manatui le Eteleno, lou Atua, talie ko ia leia e soli ia loa kiate koe le makeke ke fakatupu ai a koloa ana, o tupu ke fakamaoki ai, ofaipe lana fai i le aso nei, lana fakapapau leia na fai ki ou tamana.

¹⁹ Kapau e ke galoi loa le Eteleno, lou Atua, o ke pipiki loa ki ni iki atua kese, ti kapau e ke tausi loa ti mo ke atolasio loa kia latou, e kau fakapapau atu kia koutou i le aso nei e kotou mamate loa.

²⁰ Io, e kotou mamate loa ofaipe puleaga ala na tamate e le Eteleno i okoutou mua, talie na leaise kotou fakalogo ki le leo o le Eteleno, lokoutou Atua.