Tetelonome 7 - Tosi Tapu

E tonu ke maumaui le kau Kanaane mo olatou taulaatua

¹ Ka fakaulu loa a koe e le Eteleno, lou Atua, ki le fenua leia ka ke maua tofiga loa, ti ka kapu loa e ia i ou mua ni puleaga api : le kau Iti, mo le kau Kilikasi, mo le kau Amole, mo le kau Kanaane, mo le kau Pelesi, mo le kau Evi, mo le kau Sepusi, ko puleaga e fitu ala e lalasi ake mo makeke ake iate koe,

² E tuku atu loa e ia latou kiate koe, ke ke pule kia latou, ti e ke malo loa ia latou, ti e ke tamate loa latou. Ke aua na ke fai loa se sai mo latou, ti ke aua na ke maua ia loa se ga alofa fakaikiiki fua kia latou.

³ Ke aua na ke fai ia loa se avaga mo puleaga ana : ke aua na ke soli loa ou taineliki ki olatou vosa, ti ke aua na ke too ia loa olatou taineliki ki ou vosa ;

⁴ talie e lotou fakamaliu ia loa ou vosa meiate au, o lotou tausi loa ki ni atua kese, ti e mu loa le sausau o le Eteleno kia koutou : Ti e maumaui loa e ia koutou fakafokifa.

⁵ Kae ko leinei le nea leia e kotou fai loa kia latou : Ke kotou maumaui loa olatou aletale, ti ke kotou fatifatii loa olatou fakatata fatu, ti ke kotou tutuuti loa olatou pou tapu, ti ke kotou tutu loa i le afi olatou taulaatua.

⁶ Talie ko se kakai a koe leia kua fakatapui ki le Eteleno, lou Atua. Ti kua filifili a koe e le Eteleno, lou Atua, ke ke liliu ko se kakai alofaina kiate ia, i kakai fuli ala e maua i aluga o le kele.

⁷ Na leaise tuku e le Eteleno lona alofa mo lana filifili kia koutou, o tupu e kotou api ake i puleaga fuli ; talie koutou ikiiki oki i kakai fuli o le kele.

⁸ Kae na alofa le Eteleno kia koutou, ti na fakasoko e ia le fakapapau leia na fai e ia ki okoutou tamana. Koia na fakamavae ai koutou e le Eteleno ki lona lima makeke, ti na fakalauatea ai koutou e ia mei le popula, meia Falaone, sau o Esipito.

⁹ Koia, ke ke iloa ko le Eteleno ko lou Atua, ko le Atua a ia e tasi, ko le Atua agatonu : E taupau e ia lana sai mo lona manava alofa o kaku ki le afe o tautupu kia latou ala e alofa kiate ia, mo tausi ia ana folafola.

¹⁰ Kae fakatuaa loa e ia latou ala e vesia kiate ia, ti e tamate e ia latou ; e leaise toe fai fakatuvai e ia ki leia e vesia kiate ia : E tuku fakasako e ia kiate ia lona tua.

¹¹ Koia ke ke tausi ai loa a folafola, mo lao, mo lekula ala e kau soli kiate koe i le aso nei, o fai latou.

¹² Kapau e kotou fakalogo loa ki lekula ana, ti mo kotou tausi loa latou, ti mo kotou fai loa latou, ti e taupau loa e le Eteleno, lou Atua, lana sai mo lona manava alofa kiate koe, ala na fai e ia ki ou tamana.

¹³ E alofa loa a ia kiate koe, ti e tapuaki loa a ia kiate koe, ti e liuliuga loa e ia a koe. E tapuaki loa a ia ki fua o lou manava mo fua o lou kele, ki lau fulumeto, mo lau vino foou, mo lau lolo, ki le fua o lau kau pipi fafine, mo le fua o lau kau ovi fafine, i le fenua leia na fakapapau e ia ki ou tamana ke soli atu kiate koe.

¹⁴ E tapuaki loa a ia kiate koe o lasi ake i kakai fuli ; e leaise maua loa iate koe se tagata pe ko se fafine paa, pe ko se manu paa i au kau manu.

¹⁵ E fakamamao loa e le Eteleno iate koe a masaki fuli ; e leaise tuku loa e ia kiate koe a masaki veveli ala na ke iloa i Esipito, kae tuku loa e ia latou kia latou fuli ala e vesia kiate koe.

¹⁶ Ke ke tamate loa a kakai fuli ala e tuku atu loa kiate koe e le Eteleno, lou Atua. Ke aua na maua loa e lou mata se alofa kia latou, ti ke aua na ke tausi loa ki olatou atua, talie ko se masele loa a ia kiate koe.

¹⁷ Kapau e ke pati loa i lou loto : e api ake a puleaga anei iate au, pe feaki loa laku kapu latou ?

¹⁸ Ke aua na ke i kia latou. Kae ke ke manatui le nea leia na fai e le Eteleno, lou Atua, kia Falaone mo Esipito katoa,

¹⁹ a asiasi lalasi ala na tio ki ai ou mata, mo milakulo, mo nea fakaofolele, mo le lima makeke mo le lima falo, i le aso leia na fakamavae ai a koe e le Eteleno, lou Atua. Ko lena le nea leia e fai loa e le Eteleno, lou Atua, ki kakai fuli ala e ke i ki ai.

²⁰ E kakau foki e le Eteleno, lou Atua, ni lago utiuti kia latou, o kaku ki le maumaui o latou ala na sao loa ti na mumuni loa i ou mua.

²¹ Ke aua na ke i o tupu ko latou ; talie e nofo le Eteleno, lou Atua, i loto malie o ou, le Atua lasi mo fakaii.

²² E kapu mamalie loa e le Eteleno, lou Atua, a puleaga ana o mamao mei ou mata. E leaise feala loa ke ke tamate latou i se temi e tasi, ke aua na tupu loa o lasi a manu o le vao kiate koe.

²³ E tuku loa latou kiate koe e le Eteleno, lou Atua ; ti e kapu loa e ia latou o kaku ki lolatou maumaui fuli.

²⁴ E tuku loa e ia olatou sau ki ou lima, ti e ke fakapuli loa olatou igoa i lalo o le lagi : e leaise toe tuu loa se tasi i ou mua, o kaku ki lau maumaui latou fuli.

²⁵ Ke kotou tutu loa i le afi a fakatata o olatou atua. Ke aua na ke manumanu loa ki le paaga, mo le aulo o puleaga ana, ti ke aua na ke too loa a nea ana ma au, o tupu na liliu loa a nea ana kiate koe ko se masele ; talie e fakalialia ki ai le Eteleno, lou Atua.

²⁶ Ke aua na ke fakaulu loa ki lou fale se nea fakalialia, o tupu ke aua na ke liliu loa o fakalialia pe ia ; kae ke ke tio loa ki le nea lena ofaipe se nea fakalialia mo fuluveli, talie ko se nea fakamalaia ai a ia.