Tetelonome 4 - Tosi Tapu

Fakamakeke ki tautupu foou

¹ I le aso nei, ei Iselaele, fakalogo ki lao mo fakatotonu e kau ako kia koutou. Kotou tausi latou, o tupu ke kotou mauli loa ti ke kotou ulu loa o maua le fenua leia e soli kia koutou e le Eteleno, ko le Atua o okoutou tamana.

² E leaise kotou fakalasi loa se nea ki le nea leia kua kau fakatotonu kia koutou, ti e leaise kotou fakaikiiki loa se nea ; kae e kotou tausi loa a folafola a le Eteleno, lokoutou Atua, ofaipe laku tuku atu latou kia koutou.

³ Kua tio okoutou mata ki le nea leia na fai e le Eteleno o tupu ko Paale-Peoli : na maumaui loa e le Eteleno, lou Atua, latou fuli ala na kau ki le atolasio o Paale-Peoli.

⁴ Kae ko koutou, ala na pipiki loa ki le Eteleno, lokoutou Atua, koi kotou mauli fuli i le aso nei.

⁵ Ko leinei, kua kau ako kia koutou ni lao mo ni fakatotonu, o mulimuli ki le nea leia na fakatotonu mai kiate au e le Eteleno, loku Atua, o tupu ke kotou tausi latou i le fenua leia ka kotou ulu loa ki ai, o too ma koutou.

⁶ Kotou tausi loa latou ti kotou fai loa latou ; talie ko lokoutou poto mo lokoutou atamai loa a ia ki mata o atu puleaga, ala e logo loa ki le masaui o lao fuli ana ti e lotou pati loa : ko le puleaga lasi leinei, mo poto ai, mo atamai ai !

⁷ Talie ko ai le puleaga lasi leia e maua ia ni atua ala e nofo ofi mo ia o tatau mo le Eteleno, lotatou Atua, leia e ofi kia tatou i temi fuli ala e tou fetapa ai kiate ia ?

⁸ Ti ko ai le puleaga lasi leia e maua ia ni lao mo ni lekula faitotonu, o tatau mo le lao katoa leinei e kau tuku atu kia koutou i le aso nei ?

⁹ Koleia fua ke ke tokaga kiate koe totonu, o tausi fakamalotoloto lou loto, i aso fuli o lou mauli, ke aua na galo loa iate koe a nea fuli ala na tio ki ai ou mata, ti ke aua na ke fakamamao loa a nea ana i lou loto, kae ke ke fakamatala loa latou ki ou vosa mo vosa o ou vosa.

¹⁰ Ke ke manatui le aso leia na ke tuu ai i mua o le Eteleno, lou Atua, i Olepe, i le temi leia na pati mai ai le Atua kiate au : Fakatasii mai le kakai ki oku tafa ! E kau loto ke lotou logo ki aku folafola, o tupu ke lotou iloa le i kiate au i le temi katoa o lolatou mauli i le malama nei, o tupu ke lotou ako latou ki alatou fanau !

¹¹ Na kotou fakafeofi ake loa ti na kotou tutuu loa i lalo o le mauga. Na ulaula katoa le mauga o kaku ki le lagi, ti na kofu a ia e se kokofu, mo se ao, mo se fakapouli matotolu.

¹² Ti na masau loa le Eteleno kia koutou mei loto malie o le afi. Na kotou logo loa ki le leo o masau, kae na leaise kotou tio loa ki ni mata, na kotou logo fua ki le leo.

¹³ Na fakasa loa e ia lana fakapapau, leia na fakatotonu e ia ke kotou tausi, a folafola e kau agafulu ; ti na tosi loa e ia latou i ni fatu e lua.

¹⁴ I le temi lena, na fakatotonu mai loa e le Eteleno kiate au ke ako kia koutou ni lao mo ni fakatotonu, o tupu ke kotou fai latou i le fenua leia ka kotou too loa mo tofiga.

¹⁵ Koia ke kotou tokaga ai kia koutou totonu, talie na leaise kotou tio ki ni mata i le aso leia na masau ai le Eteleno kia koutou i le mauga o Olepe, mei loto malie o le afi,

¹⁶ ke aua na kotou vilo ki le agasala, o kotou fai loa se taulaatua o fakatata ki se tagata pe ki se fafine,

¹⁷ pe ki se manu leia e mauli i aluga o le kele, pe ki se manu lele leia e lele i le lagi,

¹⁸ pe ki se manu leia e totolo i le kele, pe ki se ika leia e mauli i lalo o le kele.

¹⁹ Ke ke tokaga ai ki lou laumalie, ke aua na ke siki ake ou mata ki le lagi o tio ki le laa, mo le masina, mo fetuu, mo nea fuli o le lagi, ti ke siga loa ki le agasala, o atolasio kia latou ti mo tausi kia latou : kua tuku latou e le Eteleno lou Atua ki atu puleaga fuli o le malama nei katoa ;

²⁰ Kae ko koutou, kua too koutou e le Eteleno, ti na fakamavae e ia koutou mei le gutuumu ukamea o Esipito, ke kotou soko ko le kakai o lona tofiga totonu, ofaipe lakotou nofo i le aso nei.

²¹ Ti na sausaua loa le Eteleno kiate au o tupu ko koutou, ti na fakapapau loa e ia e leaise kau fakalaka loa i le Solotane, ti e leaise kau ulu loa ki le fenua malie leia e soli kiate koe e le Eteleno, lou Atua, ko lou tofiga.

²² E kau mate loa i le fenua leinei, e leaise kau fakalaka loa i le Solotane. Kae ko koutou, e kotou fakalaka loa, ti e kotou maua loa le fenua malie lena.

²³ Ke kotou tokaga ai kia koutou totonu, ke aua na kotou galoi loa le fakapapau leia kua sai e le Eteleno, lokoutou Atua, mo koutou, ti ke aua na kotou fai loa se fakatata o se nea fua e tasi, leia kua tapui atu kiate koe e le Eteleno, lou Atua.

²⁴ Talie ko le Eteleno, lou Atua, ko se afi maumau a ia, ko se Atua finenonofo.

²⁵ Ka kotou nonofo loa i le fenua o le fakapapau o fualoa, ti ka kotou maua loa ni fanau mo ni makopuna, ti kapau e kotou vilo loa ki le agasala, o fai loa ni fakatata ta, pe ko ni fakatata paaki, pe ko ni nea ala e veli ki le Eteleno lokoutou Atua, ke tupu ai lona sausau,

²⁶ e kau fakamaoki atu kia koutou i le aso nei, i mua o le lagi mo le kele, e kotou maumau loa i se mate vave i le fenua leia ka kotou ano loa ki ai, o maua tofiga i leia atu fetuu o le Solotane. E leaise kotou fualoa loa i ai, talie e kotou maumau katoa loa.

²⁷ E fakamavetevete loa koutou e le Eteleno i atu puleaga, ti e toe loa se ga toka teiki fua i puleaga ala e ave loa koutou ki ai e le Eteleno.

²⁸ I lena, e kotou tausi loa ki ni atua, ko gaoiaga o lima o le tagata, ko ni potu laakau mo ni fatu, ala e leaise feala ke tio, mo logo, mo kai, mo nanamu.

²⁹ I lena foki, e ke toe afa loa le Eteleno, lou Atua ; ti e ke maua loa a ia, mo kapau e ke afa loa a ia i lou loto katoa mo lou laumalie katoa.

³⁰ I le mamae, mo ka soko loa a nea fuli ana kiate koe, e soko loa i se temi ki muli, e ke toe liliu loa ki le Eteleno, lou Atua, ti e ke fakalogo loa ki lona leo ;

³¹ talie ko le Eteleno, lou Atua, ko se Atua manava alofa, leia e leaise tiaki ia loa a koe ti e leaise maumaui oki ia loa a koe : e leaise galoi loa e ia le fakapapau leia na fai e ia ki ou tamana.

³² Ke ke vesili ki aso o le temi mago, ala na muamua iate koe, mei le aso leia na fakatupu ai e le Atua le tagata i le kele, mei leia potupotu ki leia potupotu : Pe kua soko i se aso se nea fenaaki ? Pe kua logo se tasi ki se masaui o se nea fenaaki ?

³³ Pe ku i ai se puleaga leia kua logo ki le leo o le Atua leia e masau mei se afi, ofaipe lau logo ki ai, ti na ke mauli ?

³⁴ Pe ku i ai se Atua leia kua au o too kiate ia se puleaga i loto malie o se tasi puleaga, ki ni asiasi, mo ni fakamailoga, mo ni milakulo, mo ni tau, ki le lima makeke mo le lima falo, ki ni nea fakaii, ofaipe nea fuli ala na fai kia koutou e le Eteleno, lokoutou Atua, i Esipito i okoutou mata ?

³⁵ Kua ke soko ko se fakamaoki ki nea ana, o tupu ke ke iloa e Atua le Eteleno, ti e leaise tasi ake atua kese iate ia.

³⁶ Mei le lagi, na fakasa e ia lona leo kiate koe, o ako a koe ke poto i le fakalogo ki lona leo. I le kele, kua fakatio e ia a koe ki se afi lasi, ti kua ke logo ki lana masau mei loto o le afi.

³⁷ Kua alofa a ia ki ou tamana, ti na filifili e ia lolatou sakoga ; ti na fakamavae e ia totonu a koe mei Esipito ki lona makeke lasi ;

³⁸ na kapu e ia i ou mua ni puleaga ala e lalasi ake mo makeke ake iate koe, o tupu ke fakaulu e ia a koe ki lolatou fenua ke ke maua tofiga a ia, ofaipe lau tio ki ai i le aso nei.

³⁹ Koia ke ke iloa ai i le aso nei, ti ke taofi i lou loto e Atua le Eteleno, i aluga i le lagi mo lalo i le kele, ti e leaise tasi ake Atua kese iate ia.

⁴⁰ Ti ke ke tausi ana lao mo ana folafola ala e kau tuku atu kiate koe i le aso nei, o tupu ke ke manuia, a koe mo au fanau i ou muli, ti ke ke fakatologa loa ou aso i le fenua leia e soli loa kiate koe e le Eteleno, lou Atua o lee gato.

⁴¹ Ti na filifili loa e Moisese a kolo e tolu i le fetuu esite o le Solotane,

⁴² ke sola ki ai le tagata tukipo leia na tamate ia se tasi i se tutamaki, kae na leaise vesia a ia kiate ia i mua, ti ke feala ke saofaki ai lona mauli o sola ki se kolo i kolo ana.

⁴³ Ko kolo ana : ko Petesele, i le toafa, i le mauga o le kau Lupeni ; mo Lamoti, i Kalaate, i le fenua o le kau Kate ; mo Kolani, i Pasani, i le fenua o le kau Manase.

Toe lau o le lao e Moisese

⁴⁴ Ko leinei le lao leia na tuku e Moisese ki mua o fanau a Iselaele.

⁴⁵ Ko nei a fakamaoki, mo lekula, mo fakatotonu ala na fakasa e Moisese ki fanau a Iselaele, i le oki o le mavae mei Esipito.

⁴⁶ Na fai loa le nea lena i le fetuu esite o le Solotane, i le vaivailiua, i mua o Pete-Peoli, i le fenua o Sioni, sau o le kau Amole, leia na nofo i Eseponi ti na tamate e Moisese mo fanau a Iselaele.

⁴⁷ Na lotou too loa lona fenua mo le fenua o Oki, sau o Pasani. Na nonofo a sau ana e lua o le kau Amole i le fetuu esite o le Solotane.

⁴⁸ Na maua loa e fanau a Iselaele le fenua katoa lena, mei Aloele i le kauvai o le liua ko Alenone o kaku ki le mauga o Sioni leia ko le Elemoni,

⁴⁹ ti mo le potu esite o le Solotane, o kaku ki le tai Mate, i vae o le mauga ko Pisika.