Tetelonome 34 - Tosi Tapu

Mate o Moisese

¹ Na pale loa Moisese mei le toafa o Moape ki le mauga o Nepo, ki le tumutumu o Pisika, leia e tuu i mua o Seliko. Na fakatio loa a ia e le Eteleno ki le fenua katoa :

² Ki Kalaate o kaku ki Tane, mo Nefetali katoa, mo le fenua o Efalaimi mo Manase, mo le fenua katoa o Suta o kaku ki le tai Metitelanea,

³ mo le fenua o Nekepi, mo le fenua o le Solotane, mo le vaivailiua o Seliko, mo le kolo o palemie, o kaku ki Soa.

⁴ Na pati loa le Eteleno kiate ia : Ko lena le fenua leia na kau fakapapau kia Apalaamo, mo Isaake, mo Sakopo, o pati : E kau soli loa a ia ki okoutou sakoga. E kau fakatio a koe ki ai, kae e leaise ke ulu loa ki ai.

⁵ Na mate loa Moisese, tagata fakasausau a le Eteleno i lena, i le fenua o Moape, o mulimuli ki le fakatotonu a le Eteleno.

⁶ Na tanu loa a ia e le Eteleno i se vaivailiua o le fenua o Moape, i mua o Pete-Peoli. Na leaise iloa e se tasi lona tanuma o kaku mai ki le aso nei.

⁷ Na fetuu kau lelau kau lua Moisese i le aso leia na mate ai loa a ia ; kae na leaise gaegae lana tio, ti na leaise teifo lona makeke.

⁸ Na tagi loa kia Moisese a fanau a Iselaele i aso e kau tolu, i le toafa o Moape, o kaku ki le oki o le temi katoa o lona putu.

⁹ Na apele loa Sosue, vosa o Nune, i le Laumalie o le poto, talie na teki e Moisese ona lima kiate ia. Na fakalogo loa fanau a Iselaele kiate ia, ti na lotou mulimuli loa ki fakatotonu ala na tuku e le Eteleno kia Moisese.

¹⁰ Na leaise toe sa loa i Iselaele se polofeta ofaipe Moisese, leia na masau mo le Eteleno, o tio le mata ki le mata.

¹¹ E leaise feala ke fakatatau se tasi mo ia i fakamailoga fuli mo milakulo fuli ala na kakau a ia e le Eteleno ke ano o fai i le fenua o Esipito kia Falaone, mo ana tagata fakasausau, mo lona fenua katoa,

¹² mo gaoi fakaii fuli ala na fai e Moisese i mata o fanau fuli a Iselaele.