Tetelonome 30 - Tosi Tapu

E toe liliu loa Iselaele ki le Eteleno

¹ Kapau e soko loa folafola fuli anei kiate koe, le tapuakina mo le malaia ala e kau tuku ki ou mua, kapau e ke toe too loa latou i lou loto katoa i loto malie o puleaga fuli ala na fakamavete loa a koe ki ai e le Eteleno, lou Atua ;

² Ti kapau e ke toe liliu loa ki le Eteleno, lou Atua, ti kapau e ke fakalogo loa ki lona leo i lou loto katoa, mo lou laumalie katoa, a koe mo au fanau, o mulimuli ki le nea katoa leia e kau fakatotonu atu kiate koe i le aso nei,

³ ti e toe aumai loa e le Eteleno, lou Atua, lou kakai popula ki lona fenua, ti e toe alofa loa a ia kiate koe, o toe fakatasii loa a koe mei loto malie o puleaga fuli ala na fakamavete a koe ki ai e le Eteleno.

⁴ Pe kaku foki lou fakamavete ki le potupotu o le lagi, e toe fakatasii loa a koe mei ai e le Eteleno, lou Atua, talie e ano loa a ia o toe too a koe mei ai.

⁵ E toe fakaliliu loa a koe e le Eteleno, lou Atua ki le fenua leia na maua e ou tamana, ti e ke toe maua tofiga loa a ia. E fai loa e le Eteleno kiate koe le malie, ti e toe fakaliliu loa e ia a koe o toe api ake i ou tamana.

⁶ E silikosisio loa e le Eteleno, lou Atua, lou loto mo le loto o lou sakoga, o tupu ke ke alofa loa ki le Eteleno, lou Atua, i lou loto katoa mo lou laumalie katoa, o tupu ke ke mauli ai loa.

⁷ E fakavilo loa e le Eteleno, lou Atua, a malaia fuli ana ki ou fili, kia latou ala e vesia loa kiate koe ti mo fakaveliveli loa kiate koe.

⁸ Ti ko koe, e ke toe liliu loa, ti e ke toe fakalogo loa ki le leo o le Eteleno, ti e ke toe fai loa a folafola fuli anei ala e kau tuku atu kiate koe i le aso nei.

⁹ E fakaapele loa a koe e le Eteleno, lou Atua, ki nea malilie, ti e fakamanuia loa e ia le gaoi katoa o ou lima, mo fua o lou manava, mo le fua o lau kau manu, mo le fua o lou kele, talie e toe maua loa e le Eteleno lona fiafia i le afa o lou manuia, ofaipe lana maua lona fiafia i le afa o le manuia o ou tamana,

¹⁰ mo kapau e ke fakalogo loa ki le leo o le Eteleno, lou Atua, o tausi ana lao mo ana lekula ala e tuu i le tosi leinei o le lao, ti mo kapau e ke toe liliu loa ki le Eteleno, lou Atua, i lou loto katoa mo lou laumalie katoa.

¹¹ Talie ko le folafola leinei e kau tuku atu kiate koe i le aso nei, e leaise taualuga ake a ia i lou makeke, ti e leaise mamao a ia meiate koe.

¹² E leaise tuku a ia i le lagi ke ke pati loa : Ko ai leia e pale loa kia matou ki le lagi, o aumai a ia kia matou, ke motou logo ki ai, o tupu ke motou fai a ia ?

¹³ E leaise tuku a ia i leia atu fetuu o le tai, ke ke pati loa : Ko ai leia e fakalaka loa ki leia atu fetuu o le tai, o aumai a ia kia matou, ke motou logo ki ai, o tupu ke motou fai a ia ?

¹⁴ Kae ko se nea leia e ofi fua iate koe, i lou gutu mo lou loto, o tupu ke ke fai a ia.

¹⁵ Ke ke tio, e kau tuku i le aso nei ki ou mua le mauli mo le malie, le mate mo le veli,

¹⁶ talie e kau fakatotonu atu kiate koe i le aso nei ke ke alofa ki le Eteleno, lou Atua, o saele i ona ala, ti mo tausi ana folafola, mo ana lao, mo ana lekula, o tupu ke ke mauli ti mo ke liuliuga, ti ke tapuakii a koe e le Eteleno, lou Atua, i le fenua leia e ke ulu loa ki ai o maua tofiga.

¹⁷ Kae kapau e maliu kese loa lou loto, ti kapau e leaise ke fakalogo loa, ti kapau e ke tuku loa a koe ke ano o punou ti mo tausi ki ni atua kese,

¹⁸ e kau fakasa kia koutou i le aso nei e kotou mamate loa, ti e leaise kotou tologa loa i le fenua leia e kotou ano loa o maua tofiga, mo ka kotou fakalaka loa i le Solotane.

¹⁹ E kau too i le aso nei ke fakamaoki kia koutou le lagi mo le kele : E kau tuku ki ou mua le mauli mo le mate, le tapuakina mo le malaia. Ke ke filifili le mauli, o tupu ke ke mauli, a koe mo lou sakoga,

²⁰ o alofa ki le Eteleno, lou Atua, ti mo fakalogo ki lona leo, ti mo pipiki kiate ia : Ko ia leia ko lou mauli, ti ko ia leia e fakatologa ia ou aso, o tupu ke ke nofo i le fenua leia na fakapapau e le Eteleno ke soli ki ou tamana, ko Apalaamo, mo Isaake, mo Sakopo.