Tetelonome 3 - Tosi Tapu

Tau o le puleaga o Oki

¹ Na tou maliu loa, o pale i le ala o Pasani. Na au loa a Oki, sau o Pasani, kia tatou, a ia mo lona solia katoa, o taui tatou i Etelei.

² Na pati mai loa le Eteleno kiate au : Ke aua na ke i kiate ia ; talie e kau tuku a ia ki ou lima, a ia mo lona kakai, mo lona fenua ; ke ke fai loa kiate ia le nea leia na ke fai kia Sioni, sau o le kau Amole, leia na nofo i Eseponi.

³ Ti na toe tuku loa e le Eteleno, lotatou Atua, ki otatou lima a Oki, sau o Pasani, mo lona kakai katoa ; na tou tamate loa a ia, o leaise sao fua se fa toka tasi o lona kakai.

⁴ Na tou too loa i le temi lena ona kolo fuli ; na leai fua se kolo e tasi na leaise tou aga o too : ko kolo e kau ono o le fenua o Alekopi, i le Pasani, ala na sau ai a Oki.

⁵ Ko kolo ana na fakamakeke, ti na takatakai e ni kaua taualuga, ti na tapono ki ni matapa lokai. Na i ai foki ni kolo ala na leaise a, ti na lotou lasi ai.

⁶ Na tou maumaui katoa loa a kolo ana, ti na tou tamate loa a tagata, mo fafine, mo toe, ofaipe le nea leia na tou fai ki le fenua o Sioni, sau o Eseponi.

⁷ Kae na tou too loa ma tatou a manu, mo koloa ala na maua i kolo.

⁸ I le temi lena, na tou too loa le fenua o sau e lua o le kau Amole, ala na nonofo i le fetuu esite o le Solotane, mei le liua o Alenone o kaku ki le mauga o Elemoni.

⁹ Na fakaigoa e le kau Sitone le Elemoni ko Silioni, ti ko le kau Amole ko Senili.

¹⁰ Na tou maua foki a kolo fuli o le potu taualuga, mo le fenua katoa o Kalaate, mo Pasani o kaku ki Salaka mo Etelei, ko kolo o le puleaga o Oki i Pasani.

¹¹ Ko Oki, sau o Pasani, ko le sau fakamuli a ia o le kau Lefaimi. E feala ke tio i Lapa, kolo mua o le kau Amone, ki lona pusa mate, ko se pusa ukamea leia na meta fa tupu lona loa, ti na meta lua lona lau lasi.

Kalaate kia Lupeni, mo Kate, mo le vaelua o Manase

¹² I le temi lena na tou maua loa le fenua leinei. Ti na kau soli loa ki fanau a Lupeni mo fanau a Kate le vaelua o le mauga o Kalaate, mo kolo ala na tuu i ai ;

¹³ Ti na kau soli loa ki le vaelua o le faasiga o Manase leia na nofo i le potu esite le toe o Kalaate, mo le Pasani katoa, leia ko le puleaga afea o Oki. Ko le fenua katoa lena o Alekopi mo Pasani leia e iloa foki i le igoa ko le fenua o le kau Lefaimi.

¹⁴ Ko Saili, vosa o Manase, na too ia loa le fenua katoa o Alekopi, i Pasani, o kaku ki le koiga o le kau Kesuli mo le kau Maaka ; na lotou fakaigoa loa a kolo liliki o le fenua lena ko kolo liliki o Saili, igoa leia na lotou maua loa o kaku mai ki le aso nei.

¹⁵ Ti na kau soli loa Kalaate kia Makile.

¹⁶ Ki vosa o Lupeni mo Kate, na kau soli loa kia latou le tasi a koga o Kalaate, o kaku ki le liua o Alenone, leia na koiga o kaku ki le liua o Sapoke, koiga o le kau Amone.

¹⁷ Na mulimuli loa le koiga uesite i le tafeaga o le Solotane, i le vasa o le vai ko Senesaleti mo le tai Mate, o kaku ki vae o le mauga ko Pisika, leia e tuu i le fetuu esite.

¹⁸ I le temi lena na kau tuku loa kia koutou le fakatotonu leinei : Ko leinei, kua soli loa e le Eteleno, lokoutou Atua, kia koutou le fenua leinei e tuu i le fetuu esite o le Solotane ; ke too loa e tagata tau fuli o koutou alatou masafu, o fakalaka i le Solotane i mua okoutou fetaina, ala ake fanau a Iselaele.

¹⁹ Kae e nofo loa okoutou avaga, mo okoutou fanau, mo okoutou kau manu, ti e kau iloa e lasi ai akoutou kau manu, i kolo ala na kau soli atu kia koutou,

²⁰ o kaku ki le tuku loa e le Eteleno o le malolo ki okoutou fetaina ofaipe koutou, ti ke lotou maua foki le fenua leia e soli loa kia latou e le Eteleno, lokoutou Atua, i le fetuu uesite o le Solotane. I le aso lena e feala loa ke kotou toe liliu ki okoutou tofiga i le fenua leia kua kau soli atu kia koutou.

²¹ I le aso lena, na kau tuku loa ni fakatotonu kia Sosue, o pati : Na tio ou mata ki nea fuli ala na fai e le Eteleno, lokoutou Atua, ki sau e lua o le kau Amole. E fai fenaaki loa e le Eteleno ki sau o puleaga fuli ala e ke fakalaka ai loa.

²² Ke aua na ke i kia latou ; talie e tau loa le Eteleno, lokoutou Atua, kia koutou.

E leaise ulu loa Moisese ki Kanaane

²³ I le temi lena na kau tagi loa ki le Eteleno, o pati :

²⁴ Aliki Eteleno, na ke kamata fakasa ki lau tagata fakasausau lou lasi mo lou makeke ; talie ko ai le atua, i le lagi mo le kele, e mafai ia le fakatautau o au gaoi mo au nea fakatalatupua ?

²⁵ E kau kole atu kiate koe ke fakataga mai kiate au ke fakalaka i le Solotane, o tio ki le fenua malie i leia kauvai, ki ona mauga fulumalilie mo le Lipane.

²⁶ Kae na sausaua loa le Eteleno kiate au, o tupu ko koutou, ti na leaise tali loa e ia laku tagi. Na pati mai loa le Eteleno kiate au : kua feauga, ke aua na ke toe masau loa ki le nea lena.

²⁷ Pale ki le tumutumu o le mauga ko Pisika, ti ke fakamavaa lasi loa ou mata, o tio ki le uesite, mo le noleto, mo le saute, mo le esite ; talie e leaise ke fakalaka loa i le Solotane lena.

²⁸ Tuku au fakatotonu kia Sosue, ti ke tokoi kiate ia, ti ke fakamakeke lona loto ; talie ko ia leia e fakalaka loa i mua o le kakai lena i le Solotane, ti ko ia leia e tuku ia loa ki fanau a Iselaele le fenua lena kua ke tio ki ai mei mamao.

²⁹ Na tou nonofo loa i le vaivailiua lena, i mua o Pete-Peoli.