Tetelonome 29 - Tosi Tapu

Fakafoou o le sai

¹ Ko nei a folafola o le sai leia na fakatotonu e le Eteleno kia Moisese ke fai mo fanau a Iselaele i le fenua o Moape, kae kese fai le sai leia na fai e ia mo latou i Olepe.

² Na tanaki loa e Moisese a Iselaele katoa, o pati kia latou : Kua kotou tio ki nea fuli ala na fai e le Eteleno i okoutou mata, i le fenua o Esipito, kia Falaone, mo ana tagata fakasausau, mo lona fenua katoa.

³ Na tio okoutou mata ki asiasii lalasi ala na tuku e le Eteleno kia latou, mo milakulo, mo nea fakaofolele lalasi.

⁴ Kae, o kaku mai ki le aso leinei, na leaise tuku e le Eteleno kia koutou se loto ke matala, mo ni mata ke tio, mo ni taliga ke logo.

⁵ Na kau taki a koe i le toafa i le lolotoga o fetuu e kau fa : na leaise popo fua ou teu iate koe, ti na leaise popo fua lou taka i lou vae ;

⁶ na leaise kotou kai se pane, ti na leaise kotou inu se vino pe ko se kava makeke, o tupu ke kotou iloa ko au ko le Eteleno, lokoutou Atua.

⁷ Na kotou kaku mai loa ki le ganea leinei ; ti na au loa Sioni, sau o Eseponi, mo Oki, sau o Pasani, o fakafelavei mai kia tatou ke taui tatou, kae na tou malo loa ia latou.

⁸ Na tou too loa lolatou fenua ti na tou tuku loa a ia ki le kau Lupeni, mo le kau Kate, mo le vaelua o le kau Manase.

⁹ Koia ke kotou tausi loa a folafola o le sai leinei ti ke kotou fai loa latou, o tupu ke kotou malo i nea fuli ala e kotou fai loa.

¹⁰ I le aso nei e kotou tutuu fuli loa i mua o le Eteleno, lokotou Atua, mo okoutou pule faasiga, mo okoutou fakamatuatua, mo okoutou ofisa, mo tagata fuli o Iselaele,

¹¹ mo okoutou fanau, mo okoutou fafine, mo le matapule leia e nofo i loto malie o lou nofolaga, mei leia e tuuti ia lau fafie o kaku ki leia e asu ia lau vai.

¹² E fai loa e le Eteleno, lou Atua, se sai mo koe i le aso nei, ti e fakaafe loa e ia a koe ke ke fakamaoki a ia ki sau fakapapau fakaalialiki,

¹³ o tupu ke ke liliu i le aso nei ko lona kakai ti ke nofo a ia ko lou Atua, o fai ki lana pati atu kiate koe, mo lana fakapapau leia na fai ki ou tamana ko Apalaamo, mo Isaake, mo Sakopo.

¹⁴ E leaise kau fai le sai leinei mo koutou fua, io, le sai leia kua fakamaoki ki se fakapapau.

¹⁵ Kae e kau fai a ia mo latou fuli ala e tutuu i le aso nei i mua o le Eteleno, lotatou Atua, mo latou fuli ala e pupuli i leinei ia tatou i le aso nei.

Fua o le pati gataa

¹⁶ Ke kotou iloa le temi leia na tou nonofo ai i le fenua o Esipito, ti mo le temi leia na tou fakalaka ai i loto malie o puleaga ala na tou saele ai i lolatou fenua.

¹⁷ Na kotou tio ki taulaatua fakalialia fuli ala e atolasio ki ai a puleaga ana, ko ni atua ala e fau ki laakau mo fatu, ti e teuteu ki le paaga mo le aulo.

¹⁸ Ke aua na maua loa ia koutou se tagata pe ko se fafine, pe ko se famili pe ko se faasiga, leia e veli lona loto ke maliu i le aso nei mei le Eteleno, lotatou Atua, o ano o tausi ki atua o puleaga ana. Ke aua na maua loa ia koutou se aka leia e fakatupu ia se au kona mo se kava kona.

¹⁹ Ke aua na i ai loa se tasi, leia e oki loa lana logo ki folafola o le sai leinei, ti e fia nealasi loa lona loto, o pati : E kau maua loa le tokamalie, logo ai e kau mulimuli loa ki olioli o loku loto, ti e kau fakalasi loa le fia inu ki le kona.

²⁰ E leaise toe loto loa le Eteleno ke fakamolemole ki le tagata lena. Kae e mu loa le sausau mo le finenonofo o le Eteleno ki le tagata a ia, ti e vilo loa malaia fuli ala e tuu i le tosi leinei kiate ia, ti e soloi loa e le Eteleno lona igoa i lalo o le lagi.

²¹ E tuku loa a ia e le Eteleno ki le malaia, o fakamavae oki loa a ia mei le kakai o Iselaele, o mulimuli ki malaia fuli o le sai leia e tuu i le tosi leinei o le lao.

²² Ko tautupu ka au, okoutou vosa ala e tupu ake loa i muli o koutou, mo le matapule leia e au loa mei se fenua mamao, - i le tio ki malaia mo masaki ala e tautea loa ki ai e le Eteleno le fenua leinei, i le tio ki le sufele mo le patai,

²³ mo le vela katoa o le fenua leinei, leia e leaise maua loa i ai se pulapula, mo se fua, mo se mutie leia e somo, ofaipe le tutu o Sotoma mo Komola, mo Atema mo Sepoimi, ala na maumaui e le Eteleno i lona sausau mo lona finenonofo, -

²⁴ e pati loa puleaga fuli ana : Kolea na fai fenaaki ai e le Eteleno ki le fenua leinei ? Kolea kua veli fenaaki ai le sausau o le Eteleno ?

²⁵ Ti e tali loa : E tupu na lotou tiaki le sai leia na fakamaoki mo latou e le Eteleno, Atua o olatou tamana, i le aso leia na fakamavae ai e ia latou mei le fenua o Esipito.

²⁶ Ti e tupu na lotou ano o tausi ki ni atua kese ti mo atolasio kia latou, atua ala na leaise lotou iloa i mua ti na tapui e le Eteleno kia latou.

²⁷ Koia na mu ai loa le sausau o le Eteleno ki le fenua leinei, ti na kakau mai loa e ia kiate ia a malaia fuli ala e tuu i le tosi leinei.

²⁸ Na liligi loa e le Eteleno lona sausau kaka mo fakaii ki lona kakai, ti na taaki loa e ia a ia mei lona fenua, ti na kapu loa e ia a ia ki se fenua kese, leia e nofo ai i le aso nei.

²⁹ Ko nea ala koi munia a le Eteleno, lotatou Atua ; ko nea ala kua fakasa a tatou mo tou fanau, o lee gato, o tupu ke tou fai a folafola fuli o le lao leinei.